IPL 2022: ఢిల్లీ క్యాపిటల్స్ కోచ్‌లుగా వాట్సన్, అగార్కర్

ఈ ఏడాది ఐపీఎల్‌లో ఢిల్లీ క్యాపిటల్స్ కొత్తగా కనిపించనుంది. ఇప్పటికే హెడ్‌ కోచ్‌గా రికీ పాంటింగ్ బాధ్యతలను నిర్వర్తిస్తుండగా.. అసిస్టెంట్ కోచ్‌గా షేన్ వాట్సన్ సేవలు అందించనున్నట్లు తెలుస్తోంది. మరోవైపు బౌలింగ్ కోచ్‌గా అజిత్ అగార్కర్ వ్యవహరించనున్నట్లు సమాచారం. వీరిద్దరి పేర్లను ఢిల్లీ క్యాపిటల్స్ యాజమాన్యానికి రికీపాంటింగ్ సూచించినట్లు ప్రచారం జరుగుతోంది. పాంటింగ్, వాట్సన్ ఇద్దరూ ఆస్ట్రేలియా ఆటగాళ్లే కావడంతో వారిద్దరి మధ్య మంచి సాన్నిహిత్యం ఉంది. దీంతో కోచ్, అసిస్టెంట్ కోచ్ పాత్రల్లో పాంటింగ్, వాట్సన్ సరిపోతారని.. ఢిల్లీ జట్టు వీరి మార్గదర్శకత్వంలో టైటిల్ దిశగా అడుగులు వేస్తుందని యాజమాన్యం ఆశిస్తోంది.

త్వరలోనే షేన్ వాట్సన్, అజిత్ అగార్కర్ సేవలపై ఫ్రాంచైజీ అధికారికంగా ప్రకటన చేయనుంది. గతంలో షేన్ వాట్సన్ రెండు సార్లు ఐపీఎల్ టైటిల్స్ గెలిచిన జట్లలో సభ్యుడిగా ఉన్నాడు. 2008లో రాజస్థాన్ రాయల్స్ ఐపీఎల్ టైటిల్ గెలవడంలో కీలకపాత్ర పోషించాడు. 2018లో చెన్నై సూపర్‌కింగ్స్ తరఫున ఫైనల్‌లో షేన్ వాట్సన్ సూపర్ ఇన్నింగ్స్ ఆడాడు. అయితే వయసు మీద పడటంతో 2020 నుంచి ఐపీఎల్‌కు దూరమయ్యాడు. కాగా ఈ ఏడాది ఐపీఎల్ మార్చి 27 నుంచి ప్రారంభం కానుంది.