Rohit Sharma: రెండు డకౌట్లు, 7.50 సగటు మాత్రమే.. రోహిత్ శర్మ కెరీర్‌లోనే చెత్త రికార్డు!

Rohit Sharma Batting Form: టీమిండియా మాజీ కెప్టెన్, స్టార్ ఓపెనర్ రోహిత్ శర్మకు 2026 న్యూజిలాండ్ పర్యటన చేదు అనుభవాన్ని మిగిల్చింది. వన్డేల్లో దూకుడైన బ్యాటింగ్‌తో ఎన్నో రికార్డులు సృష్టించిన హిట్‌మ్యాన్.. ఈ పర్యటనలో మాత్రం రాణించలేకపోయాడు. వన్డే సిరీస్‌లో అతడి ప్రదర్శన అభిమానులను పూర్తిగా నిరాశపరిచింది. నాలుగు ఇన్నింగ్స్‌ల్లో కలిపి కేవలం 30 పరుగులే చేసిన రోహిత్.. 7.50 సగటుతో సిరీస్‌ను ముగించాడు. ఓపెనర్‌గా ఆడిన వన్డే సిరీస్‌లలో అతడికి ఇదే అత్యల్ప సగటు కావడం గమనార్హం. ఈ ప్రదర్శన 2027 వన్డే ప్రపంచ కప్‌కు ముందు టీమిండియా యాజమాన్యానికి ఆందోళన కలిగిస్తోంది.

ఓపెనర్‌గా అత్యంత చెత్త సిరీస్:

న్యూజిలాండ్‌తో సిరీస్‌లో రోహిత్ శర్మ నాలుగు ఇన్నింగ్స్‌ల్లో రెండు సార్లు డకౌట్ అయ్యాడు. కనీసం నాలుగు ఇన్నింగ్స్‌లు ఆడిన వన్డే సిరీస్‌లను పరిశీలిస్తే.. గతంలో 2012లో శ్రీలంకపై 2.5 సగటు, 2018లో దక్షిణాఫ్రికాపై 9.8 సగటుతో పరుగులు చేశాడు. అయితే తాజా న్యూజిలాండ్ పర్యటనలో ఓపెనర్‌గా అతడి సగటు 7.50కు పడిపోయింది. ఈ సిరీస్‌లో రోహిత్ మూడు ఇన్నింగ్స్‌ల్లో త్వరగానే పెవిలియన్ చేరాడు. ఆక్లాండ్‌ మ్యాచ్‌లో కైల్ జేమీసన్ అతడిని ఆరు బంతులకే డకౌట్ చేశాడు. మౌంట్ మాంగనూయిలో జరిగిన మ్యాచ్‌లో మాట్ హెన్రీ వేసిన తొలి బంతికే రోహిత్ వికెట్ కోల్పోయాడు. వెల్లింగ్టన్‌లో జరిగిన మ్యాచ్‌లో మాత్రమే కాస్త మెరుగ్గా ఆడి 28 బంతుల్లో 23 పరుగులు చేశాడు.

ఇదివరకు ఫామ్‌లోనే రోహిత్:
ఆదివారం జరిగిన ఐదో వన్డేలోనూ రోహిత్ శర్మ నిరాశపరిచాడు. 13 బంతులు ఎదుర్కొని ఏడు పరుగులే చేసిన అతడు.. మాథ్యూ ఫిషర్ వేసిన బంతిని లెగ్‌సైడ్ వైపు ఆడేందుకు ప్రయత్నించాడు. అయితే బ్యాట్‌కు సరిగ్గా తగలకపోవడంతో మిడ్‌వికెట్‌లో ఉన్న డీన్ ఫాక్స్‌క్రాఫ్ట్ చేతుల్లోకి బంతి వెళ్లింది. దీంతో రోహిత్ మరోసారి తక్కువ స్కోరుకే వెనుదిరిగాడు. అయితే ఈ పేలవ ప్రదర్శనకు ముందు 2026లో రోహిత్ మంచి ఫామ్‌లోనే ఉన్నాడు. ఇంగ్లాండ్‌పై 138 పరుగుల సెంచరీతో పాటు వెస్టిండీస్‌పై 101, 92 పరుగులు సాధించాడు. 2023 వన్డే ప్రపంచ కప్ తర్వాత భారత్ తరఫున అత్యధిక పరుగులు చేసిన ఆటగాళ్లలో రెండో స్థానంలోనూ కొనసాగుతున్నాడు. ఇలాంటి సమయంలో న్యూజిలాండ్ పర్యటనలో అతడి బ్యాటింగ్ గాడి తప్పడం చర్చనీయాంశంగా మారింది.

టాప్ ఆర్డర్ వైఫల్యంతో భారత్‌కు కష్టాలు:
ఐదో వన్డేలో టాస్ గెలిచిన న్యూజిలాండ్ కెప్టెన్ మిచెల్ సాంట్నర్ ముందుగా బౌలింగ్ ఎంచుకున్నాడు. దీంతో బ్యాటింగ్‌కు దిగిన భారత్ తొలి పది ఓవర్లలోనే మూడు వికెట్లు కోల్పోయి 37 పరుగులకే పరిమితమైంది. మాథ్యూ ఫిషర్ తొలుత రోహిత్ శర్మను పెవిలియన్‌కు పంపగా.. ఆ తర్వాత విరాట్ కోహ్లీని ఐదు పరుగులకే ఔట్ చేశాడు. అనంతరం జాకబ్ డఫీ బౌలింగ్‌లో రుతురాజ్ గైక్వాడ్ 18 పరుగుల వద్ద వెనుదిరిగాడు. దీంతో భారత టాప్ ఆర్డర్ మరోసారి ఒత్తిడిలో పడింది. చివరకు 209 పరుగులకు ఆలౌట్ అయింది. నాలుగో వన్డేలో భారత్ 244 పరుగుల భారీ తేడాతో ఓటమి పాలైన సంగతి తెలిసిందే. న్యూజిలాండ్ 334 పరుగుల లక్ష్యాన్ని నిర్దేశించగా.. భారత్ కేవలం 89 పరుగులకే ఆలౌటైంది.

ప్రపంచకప్‌కు ముందు ఆందోళన:
నాలుగో వన్డేలో ఎదురైన భారీ ఓటమిపై టీమిండియా హెడ్ కోచ్ గౌతమ్ గంభీర్ కూడా ఆందోళన వ్యక్తం చేశాడు. 2027 వన్డే ప్రపంచ కప్‌లో దక్షిణాఫ్రికా, జింబాబ్వే, నమీబియాలో ఎదురయ్యే పరిస్థితులను న్యూజిలాండ్ పిచ్‌లు గుర్తుచేస్తున్నాయని పేర్కొన్నాడు. విదేశీ గడ్డపై ఇలాంటి పరిస్థితులను ఎదుర్కొనేందుకు జట్టు సిద్ధంగా ఉండాల్సిన అవసరాన్ని ఆయన ప్రస్తావించాడు. రోహిత్ శర్మతో పాటు విరాట్ కోహ్లీ ఫామ్ కూడా టీమిండియాకు ఆందోళన కలిగిస్తోంది. తొలి వన్డేలో 74 పరుగులు చేసిన కోహ్లీ.. ఆ తర్వాత వరుసగా 7, 0, 5 పరుగులకే పరిమితమయ్యాడు. 2027 ప్రపంచ కప్‌కు ముందు ఈ ఇద్దరు సీనియర్ బ్యాటర్లు తిరిగి నిలకడ సాధించడం జట్టుకు కీలకం కానుంది. తదుపరి స్వదేశంలో శ్రీలంకతో జరిగే వన్డే సిరీస్ రోహిత్‌కు తిరిగి ఫామ్ అందుకునేందుకు మరో అవకాశం కానుంది. డిసెంబర్ 13న విశాఖపట్నంలో తొలి వన్డే జరగనుండగా.. డిసెంబర్ 16న బెంగళూరులో, డిసెంబర్ 19న అహ్మదాబాద్‌లో మిగిలిన మ్యాచ్‌లు జరగనున్నాయి. ఈ సిరీస్‌లో హిట్‌మ్యాన్ ఎలా ఆడతాడో చూడాలి.