KL Rahul: కేఎల్ రాహుల్ అద్భుత సెంచరీ.. ఆ రికార్డుల జాబితాలోకి చేరిక..

భారత టెస్ట్ క్రికెట్ చరిత్రలో ఓపెనర్‌గా బరిలోకి దిగి సెంచరీలు బాదడం అనేది ఎప్పుడూ ఒక ప్రత్యేకమైన రికార్డు. తాజాగా సరికొత్త రికార్డులతో టీమిండియా ఓపెనర్లు దూసుకుపోతున్నారు. ప్రస్తుతం భారత్ , ఆఫ్ఘనిస్తాన్ మధ్య ఏకైక టెస్ట్ మ్యాచ్ జరుగుతోంది. ఈ మ్యాచ్‌లో భారత ఓపెనర్ కె.ఎల్. రాహుల్ అద్భుతమైన సెంచరీతో (100 పరుగులు) కదం తొక్కాడు. ఈ సెంచరీతో టెస్ట్ ఓపెనర్‌గా అత్యధిక సెంచరీలు చేసిన భారత ఆటగాళ్ల జాబితాలో రాహుల్ తన స్థానాన్ని మరింత పదిలం చేసుకున్నాడు.

భారత క్రికెట్ దిగ్గజం సునీల్ గవాస్కర్ 203 ఇన్నింగ్స్‌ల్లో అత్యధికంగా 33 సెంచరీలు చేసి ఈ జాబితాలో అగ్రస్థానంలో కొనసాగుతున్నారు. దశాబ్దాలు గడుస్తున్నా ఈ రికార్డు చెక్కుచెదరకుండా ఉంది. తన దూకుడైన ఆటతీరుతో టెస్ట్ క్రికెట్ స్వరూపాన్నే మార్చేసిన వీరేంద్ర సెహ్వాగ్ 168 ఇన్నింగ్స్‌ల్లో 22 సెంచరీలు సాధించి రెండో స్థానంలో ఉన్నాడు. ఇక క్లాసిక్ టైమింగ్‌తో ఆకట్టుకున్న మురళీ విజయ్ 100 ఇన్నింగ్స్‌ల్లో 12 సెంచరీలు చేసి మూడో స్థానంలో నిలిచాడు. ప్రస్తుతం ఫామ్‌లో ఉన్న రాహుల్ ఈ మ్యాచ్‌తో కలిపి 101 ఇన్నింగ్స్‌ల్లో 11 సెంచరీలు పూర్తి చేసుకుని మురళీ విజయ్ రికార్డుకు కేవలం ఒకే ఒక్క సెంచరీ దూరంలో ఉన్నాడు.

న్యూ చండీగఢ్‌లోని ముల్లాన్‌పూర్ లో గల మహారాజా యాదవీంద్ర సింగ్ ఇంటర్నేషనల్ క్రికెట్ స్టేడియంలో జరుగుతున్న ఈ టెస్ట్ మ్యాచ్‌లో టాస్ గెలిచి మొదట బ్యాటింగ్ ఎంచుకుంది భారత్. ఓపెనర్ రాహుల్ 165 బంతుల్లో 11 ఫోర్లతో 100 పరుగులు చేసి అవుట్ అవ్వగా, సాయి సుదర్శన్ (81 పరుగులు) రాణించాడు. ప్రస్తుతం కెప్టెన్ శుభ్‌మన్ గిల్ 59 పరుగులతో క్రీజులో ఉన్నాడు. కె.ఎల్. రాహుల్ సాధించిన ఈ సెంచరీ అతనికి ఓపెనర్‌గా మరింత ఆత్మవిశ్వాసాన్ని ఇస్తుందనడంలో సందేహం లేదు.