Virat Kohli: ఐపీఎల్ చరిత్రలో విరాట్ కోహ్లీ సరికొత్త రికార్డు.. సీఎస్కే, ఎంఐ కాదు టాప్‌లో కేకేఆర్!

Virat Kohli Becomes Highest-Earning Player In IPL History: టీమిండియా స్టార్ బ్యాటర్, రికార్డుల రారాజు విరాట్ కోహ్లీ సరికొత్త ఘనత అందుకున్నాడు. ఇండియన్ ప్రీమియర్ లీగ్ (ఐపీఎల్) చరిత్రలోనే అత్యధిక మొత్తం ఆర్జించిన ఆటగాడిగా రికార్డుల్లో నిలిచాడు. ప్రముఖ సంస్థలు ఫెనాటిక్ స్పోర్ట్స్, హురూన్ సంయుక్తంగా విడుదల చేసిన తాజా నివేదిక ఈ విషయాన్ని వెల్లడించింది. ఐపీఎల్ ద్వారా ఇప్పటివరకు ఏకంగా రూ. 230 కోట్ల ఆదాయాన్ని విరాట్ ఆర్జించాడు. లీగ్ ప్రారంభ సీజన్ నుంచి ఇప్పటివరకు కోహ్లీ ఒకే ఒక్క ఫ్రాంచైజీకి ఆడాడు. 2008 నుంచి రాయల్ ఛాలెంజర్స్ బెంగళూరు జట్టుకే కింగ్ ప్రాతినిధ్యం వహించడం విశేషం.

విరాట్ కోహ్లీ తర్వాత అత్యధిక సంపాదన కలిగిన ఆటగాళ్ల జాబితాలో ముంబై ఇండియన్స్ మాజీ కెప్టెన్ రోహిత్ శర్మ, చెన్నై సూపర్ కింగ్స్ దిగ్గజం ఎంఎస్ ధోనీ తర్వాతి స్థానాల్లో నిలిచారు. రోహిత్ రూ. 227.2 కోట్ల ఆర్జనతో రెండో స్థానంలో నిలవగా.. ధోనీ రూ. 200 కోట్ల ఆదాయంతో మూడో స్థానాన్ని కైవసం చేసుకున్నాడు. ఇక ఐపీఎల్‌లోని మొత్తం 10 ఫ్రాంచైజీల ఉమ్మడి మార్కెట్ విలువ అక్షరాలా రూ. 1.63 లక్షల కోట్లుగా ఉన్నట్లు ఈ నివేదిక అంచనా వేసింది.

బాలీవుడ్ బాద్‌షా షారుఖ్ ఖాన్ సహ-యజమానిగా ఉన్న కోల్‌కతా నైట్ రైడర్స్ ఫ్రాంచైజీ అన్నిటికంటే అత్యధిక విలువైన జట్టుగా అగ్రస్థానంలో నిలిచింది. కేకేఆర్ ప్రస్తుత మార్కెట్ విలువ రూ.19,200 కోట్లుగా ఉందని నివేదిక పేర్కొంది. మార్కెట్ విలువలో కోల్‌కతా తర్వాతి స్థానాల్లో ముంబై ఇండియన్స్, చెన్నై సూపర్ కింగ్స్ జట్లు నిలిచాయి. ఈ రెండు విజయవంతమైన ఫ్రాంచైజీలు చెరో రూ.18,400 కోట్ల విలువతో సంయుక్తంగా రెండో స్థానాన్ని పంచుకున్నాయి.