Ravi Bishnoi-MOM: రవి బిష్ణోయ్ సంచలన ప్రదర్శన.. కష్టకాలం నుంచి ‘ప్లేయర్ ఆఫ్ ది మ్యాచ్’ అవార్డు వరకు!

Ravi Bishnoi Shines with 4 Wickets in IPL 2026 RR vs GT: ఐపీఎల్ 2026లో యువ లెగ్ స్పిన్నర్ రవి బిష్ణోయ్ అద్భుత ప్రదర్శనతో రాజస్థాన్‌ రాయల్స్ జట్టు ఊహించని విజయం అందుకుంది. శనివారం ఉత్కంఠ భరితంగా సాగిన మ్యాచ్‌లో గుజరాత్‌పై రాయల్స్‌ 6 పరుగుల తేడాతో నెగ్గింది. బిష్ణోయ్‌ తన మాయాజాలంతో (4/41) మ్యాచ్‌ను మలుపు తిప్పాడు. సాయి సుదర్శన్, గ్లెన్ ఫిలిప్స్, వాషింగ్టన్ సుందర్, రాహుల్ తేవాతియా లాంటి డేంజరస్ బ్యాటర్లను పెవిలియన్ చేర్చాడు. రాజస్థాన్‌ విజయంలో కీలక పాత్ర పోషించిన బిష్ణోయ్.. ‘ప్లేయర్ ఆఫ్ ది మ్యాచ్’ అవార్డును సొంతం చేసుకున్నాడు. మ్యాచ్ అనంతరం మాట్లాడిన బిష్ణోయ్.. తన ప్రయాణం, కష్టాలు, ఈ విజయానికి వెనుక ఉన్న శ్రమ గురించి ఆసక్తికర విషయాలు వెల్లడించాడు.

‘గత సీజన్ నాకు చాలా కష్టంగా గడిచింది. ఆ సమయంలో కూడా నా ప్రాసెస్‌ను వదల్లేదు. ముఖ్యంగా నా బౌలింగ్ లెంగ్త్‌పై ఎక్కువగా దృష్టి పెట్టాను. నా లెంగ్త్ తప్పితేనే బ్యాటర్లు సిక్సులు కొడతారు. అది నా బలహీనత అని తెలుసుకున్నా. అందుకే ఈసారి లెంగ్త్‌ను కచ్చితంగా పడేలా ప్రాక్టీస్ చేశాను. ఈ క్రమంలో మానసికంగా, సాంకేతికంగా, శారీరకంగా ఎంతో శ్రమించా. గత సీజన్ మొత్తం, భారత్ తరఫున కూడా ఆడుతూ నా లెంగ్త్‌పై ప్రత్యేకంగా పని చేశా. నా లెంగ్త్‌లో బంతులు వేసినా బ్యాటర్లు సిక్సులు కొడితే నాకు అభ్యంతరం లేదు. ఈరోజు నేను ఫుల్ లెంగ్త్ వేసినప్పుడు బౌండరీలు వచ్చాయి. కానీ గుడ్ లెంగ్త్ బంతులకు రన్స్ రాలేదు. మంచి లెంగ్త్‌లో బౌలింగ్ చేస్తే విజయవంతమవుతానని నమ్మకం కలిగింది. క్రమశిక్షణతో బౌలింగ్ చేయడం వల్లే ఈ ఫలితం వచ్చింది. ఇకపై ప్రతి మ్యాచ్ బాగా ఆడాలనుకుంటున్నా’ అని రవి బిష్ణోయ్ చెప్పాడు.

Also Read: Macharla CI: పరువు హత్య కేసు.. మాచర్ల సీఐ వెంకటరమణ సస్పెన్షన్!

ఈ మ్యాచ్‌లో తనకు అత్యంత ఇష్టమైన వికెట్ గురించి అడగగా.. రాహుల్ తేవాతియా వికెట్ ప్రత్యేకమని చెప్పాడు. ‘రాహుల్ మంచి ఫినిషర్. అతను క్రీజులో ఉంటే మ్యాచ్ ఎటు తిరుగుతుందో చెప్పలేం. అతడిని ఔట్ చేయడం చాలా కీలకం. నాకు చాలా ఆనందంగా అనిపించింది’ అని రవి బిష్ణోయ్ పేర్కొన్నాడు. వ్యక్తిగత ప్రదర్శన కంటే జట్టు విజయం తనకు ముఖ్యమని బిష్ణోయ్ స్పష్టం చేశాడు. ‘చివరి ఓవర్లలో తుషార్‌ దేశ్‌పాండే, ఆర్చర్ అద్భుతంగా బౌలింగ్ చేయడం వల్లే ఈ విజయం సాధ్యమైంది. ఇది పూర్తిగా టీమ్ ఎఫర్ట్. మేము యువ జట్టు. ఇలాగే ప్రేక్షకులను అలరించాలనుకుంటున్నాం’ అని బిష్ణోయ్ చెప్పుకొచ్చాడు.