Jasprit Bumrah Wicketless: బుమ్రా మెరుపుల్లేవ్.. వరుసగా ఐదో మ్యాచ్‌, నో వికెట్.. ఇక కష్టమేనా!

Jasprit Bumrah Wicketless in IPL 2026: ఐపీఎల్‌ 2026లో ముంబై ఇండియన్స్ స్టార్ పేసర్ జస్ప్రీత్ బుమ్రా ఆశించిన స్థాయిలో రాణించలేకపోతున్నాడు. ప్రపంచ అత్యుత్తమ బౌలరైన బుమ్రా ఇప్పటివరకు ఆడిన ఐదు మ్యాచ్‌లలో ఒక్క వికెట్ కూడా తీయకపోవడం ఆశ్చర్యానికి గురిచేస్తోంది. అంతేకాదు పరుగులు కట్టడి చేయడంలోనూ తన ప్రత్యేకతను చాటుకోలేకపోతున్నాడు. గురువారం వాంఖెడే స్టేడియంలో పంజాబ్ కింగ్స్‌తో జరిగిన మ్యాచ్‌లో భారీగా రన్స్ ఇచ్చుకున్నాడు. 4 ఓవర్లలో 41 పరుగులు ఇచ్చి.. వికెట్ పడగొట్టలేకపోయాడు. బుమ్రా ఎకానమీ రేట్ 8.63గా ఉండటం ముంబైకి ఆందోళన కలిగిస్తోంది.

ముంబై ఇండియన్స్ తరఫున జస్ప్రీత్ బుమ్రా ఎన్నో ఏళ్లుగా ఉత్తమ ప్రదర్శన చేస్తున్నాడు. 2013లో బుమ్రా అరంగేట్రం చేశాడు. ఎంఐ ఐదు సార్లు కప్పు గెలవడంలో అతడి పాత్ర అత్యంత కీలకం. చివరగా 2020లో ముంబై కప్పు గెలిచింది. ఆ తర్వాత ముంబై ఆధిపత్యం పూర్తిగా తగ్గిపోయింది. అయితే బుమ్రా మాత్రం ఎప్పుడూ నిరాశపర్చలేదు. ఐపీఎల్ 2026లో మాత్రం తన స్థాయికి తగ్గ ప్రదర్శన చేయలేకపోతున్నాడు. 1-2 మ్యాచ్‌ల్లో వికెట్లు పడలేదంటే ఏదో అనుకోవచ్చు. కానీ వరుసగా ఐదు మ్యాచ్‌ల్లో వికెటే లేదు. పైగ కోల్‌కతా మ్యాచ్‌లో 35, రాజస్థాన్‌ మ్యాచ్‌లో 32, బెంగళూరు మ్యాచ్‌లో 35, పంజాబ్ మ్యాచ్‌లో 41 పరుగులు సమర్పించుకున్నాడు. కేవలం ఢిల్లీ మ్యాచ్‌లో మాత్రమే 21 పరుగులు ఇచ్చి పొదుపుగా బౌలింగ్‌ చేశాడు.

Also Read: Hardik Pandya vs Bumrah: హార్దిక్-బుమ్రా మధ్య వాగ్వాదం.. ముంబై ఇండియన్స్‌లో అంతా బాగానే ఉందా?

కుర్రాడు వైభవ్‌ సూర్యవంశీ కూడా జస్ప్రీత్ బుమ్రా బౌలింగ్‌లో రెండు సిక్సర్లు బాదడం పెద్ద చర్చనీయాంశంగా మారింది. మరికొందరు బ్యాటర్లు కూడా అలవోకగా ఎదుర్కొన్నారు. బుమ్రా వైఫల్యం ముంబై ఇండియన్స్ జట్టుపై గట్టి ప్రభావమే చూపుతోంది. ఎప్పుడూ లేని విధంగా టోర్నీని విజయంతో ఆరంభించిన ముంబై.. తర్వాత వరుసగా నాలుగు ఓటములు చవిచూసింది. బుమ్రా మాత్రమే కాదు.. ముంబై జట్టులో ఏ బౌలరూ నిలకడగా రాణించట్లేదు. మరోవైపు అప్పుడప్పుడు బ్యాటర్ల మెరుపు ఇన్నింగ్స్‌లు తప్పితే.. నిలకడగా రాణించిన సందర్భాలు తక్కువ. ఇప్పటికైనా బూమ్​ బూమ్ బుమ్రా సహా బ్యాటర్లు రాణించకపోతే.. ముంబై ప్లే ఆఫ్స్ ఆశలు వదులుకోవాల్సిందే.