Jasprit Bumrah: కెనడా క్రికెట్‌ జట్టుకు ప్రాతినిధ్యం వహించాలనుకున్నా: జస్ప్రీత్ బుమ్రా

Jasprit Bumrah Wanted To Move Canada: భారత క్రికెట్‌లోనే అత్యుత్తమ పేసర్లలో ‘జస్ప్రీత్ బుమ్రా’ ఒకడు. 2013లో ముంబై ఇండియన్స్ జట్టులోకి వచ్చిన బుమ్రా.. 2016లో భారత టీంలోకి ఎంట్రీ ఇచ్చాడు. 8 ఏళ్లుగా తన అద్భుత బౌలింగ్‌తో భారత జట్టుకు ఎన్నో విజయాలు అందించాడు. మూడు ఫార్మాట్‌లలో టీమిండియాకు కీలక బౌలర్‌గా కొనసాగుతున్నాడు. మేటి పేసర్ అయిన బుమ్రా.. ఓ సమయంలో కెనడాకు వెళ్లి స్థిరపడాలనుకున్నాడట. కెనడా క్రికెట్‌ జట్టుకు జట్టుకు ప్రాతినిధ్యం వహించాలని అనుకున్నాడట. తన సతీమణి, స్పోర్ట్స్‌ ప్రెజెంటర్‌ సంజన గణేశన్‌తో కలిసి పాల్గొన్న ఓ ఇంటర్వ్యూలో బుమ్రా స్వయంగా ఈ విషయంను వెల్లడించాడు.

‘నువ్వు ఒకప్పుడు కెనడాకు వెళ్లి కొత్త జీవితం మొదలుపెట్టాలనుకున్నావు కదా’ అని జస్ప్రీత్ బుమ్రాను సంజన గణేశన్‌ అడిగారు. అందుకు బుమ్రా బదులిస్తూ… ‘నిజమే, అప్పట్లో ఆ ఆలోచన వచ్చింది. భారతదేశంలో ప్రతి కుర్రాడూ క్రికెట్‌ ఆడాలనుకుంటాడు. టీమిండియాకు ప్రాతినిధ్యం వహించాలని కలలు కనే కుర్రాళ్లు ప్రతి వీధిలోనూ ఓ పాతిక మంది ఉంటారు. అందుకే ప్రత్యామ్నాయ ప్రణాళిక వేసుకున్నా’ అని తెలిపాడు.

Also Read: Hyderabad Drugs: అమెజాన్ కొరియర్‌లో డ్రగ్స్ కలకలం.. 2 కేజీల గంజాయి సీజ్!

‘మా మేనమామ కెనడాలో ఉన్నారు. నేను చదువు పూర్తయ్యాక అక్కడికి వెళ్లి స్థిరపడాలనుకున్నా. అయితే అక్కడ భిన్నమైన సంస్కృతి ఉంటుందన్న కారణంతో మా అమ్మ నన్ను వెళ్లనివ్వలేదు. ఆ తర్వాత నాకు అంతా కలిసి వచ్చింది. ఐపీఎల్, భారత జట్టులో చోటు దక్కింది. లేదంటే నేను కెనడాకు వెళ్లి.. ఆ దేశ క్రికెట్‌ జట్టుకు ఆడేందుకు ప్రయత్నించేవాడిని. ఇక్కడే ఉన్నందుకు నేను చాలా అదృష్టవంతుడిని’ అని జస్ప్రీత్ బుమ్రా చెప్పాడు. బుమ్రా ఇప్పటివరకు భారత్ తరఫున 36 టెస్టులు, 89 వన్డేలు, 62 టీ20లు ఆడాడు. ఇక ఐపీఎల్‌లో 125 మ్యాచులు ఆడాడు.