CSK Vs GT: ఒంటరి పోరాటం చేసిన రుతురాజ్ గైక్వాడ్.. చెపాక్‌లో కెప్టెన్ వీరోచిత ఇన్నింగ్స్..

ఐపీఎల్ 2026లో భాగంగా చెన్నైలోని చిదంబరం స్టేడియంలో ఆదివారం జరిగిన ఉత్కంఠభరిత పోరులో చెన్నై సూపర్ కింగ్స్ కెప్టెన్ రుతురాజ్ గైక్వాడ్ అద్భుతమైన పోరాట పటిమను కనబరిచాడు. ఒకవైపు వికెట్లు పడుతున్నా, ఏమాత్రం ఆత్మవిశ్వాసం కోల్పోకుండా జట్టును గౌరవప్రదమైన స్కోరు వైపు నడిపించాడు. టాస్ గెలిచిన గుజరాత్ టైటాన్స్ కెప్టెన్ శుభ్‌మన్ గిల్ మొదట బౌలింగ్ ఎంచుకోగా, బ్యాటింగ్‌కు దిగిన చెన్నైకి ఆదిలోనే షాక్ తగిలింది.

టాప్ ఆర్డర్ కుప్పకూలినా..
గుజరాత్ పేసర్ కగిసో రబడ నిప్పులు చెరిగే బంతులతో చెన్నై టాప్ ఆర్డర్‌ను కకావికలం చేశాడు. సంజు శాంసన్ (11), ఉర్విల్ పటేల్ (4), సర్ఫరాజ్ ఖాన్ (0), డెవాల్డ్ బ్రెవిస్ (2) స్వల్ప వ్యవధిలోనే పెవిలియన్ చేరారు. కేవలం 47 పరుగులకే 4 కీలక వికెట్లు కోల్పోయి చెన్నై పీకల్లోతు కష్టాల్లో పడింది. ఈ దశలో క్రీజులోకి వచ్చిన శివమ్ దూబే (22)తో కలిసి రుతురాజ్ నెమ్మదిగా ఇన్నింగ్స్‌ను నిర్మించాడు.

కెప్టెన్ ఇన్నింగ్స్: 74 నాటౌట్
ఒకవైపు పిచ్ స్లోగా మారుతున్నా, మరోవైపు గుజరాత్ బౌలర్లు కట్టుదిట్టంగా బౌలింగ్ చేస్తున్నా రుతురాజ్ మొక్కవోని దీక్షతో నిలబడ్డాడు. మొత్తం 60 బంతుల్లో 6 ఫోర్లు, 4 సిక్సర్ల సాయంతో 74 పరుగులు చేసి అజేయంగా నిలిచాడు. ఇన్నింగ్స్ చివరలో జేమీ ఓవర్టన్ (6 బంతుల్లో 18) మెరుపులు మెరిపించడంతో చెన్నై నిర్ణీత 20 ఓవర్లలో 158/7 పరుగులు చేయగలిగింది.

 

Instagramలో ఈ పోస్ట్‌ని వీక్షించండి

 

Divy Chaturvedi (@crickwithdivy) ద్వారా పోస్ట్ భాగస్వామ్య చేయబడింది

చెపాక్ మైదానంలో సాధారణంగా 170-180 పరుగులు సగటు స్కోరు. అయితే, ఇక్కడ పిచ్ బ్యాటర్లకు చుక్కలు చూపించింది. రబడ 3 వికెట్లతో చెలరేగగా, అర్షద్ ఖాన్ 2 వికెట్లు తీశారు. ఇన్ని కష్టాల నడుమ రుతురాజ్ ఆడిన ఈ ఇన్నింగ్స్ జట్టుకు ప్రాణం పోసింది. ఒకవేళ రుతురాజ్ త్వరగా అవుట్ అయ్యుంటే చెన్నై కనీసం 100 పరుగులు కూడా దాటడం కష్టమయ్యేది. ఇప్పుడు 159 పరుగుల లక్ష్యం గుజరాత్‌కు సవాలుతో కూడుకున్నదే. చెన్నై బౌలర్లు అప్రమత్తంగా ఉంటే, ఈ స్వల్ప లక్ష్యాన్ని కాపాడుకునే అవకాశం ఉంది. రుతురాజ్ చేసిన ఈ ‘ఒంటరి పోరాటం’ ఈ సీజన్‌లో వన్ ఆఫ్ ది బెస్ట్ ఇన్నింగ్స్‌గా నిలిచిపోతుంది.