Mahela Jayawardene: 13 మ్యాచ్‌ల్లో కేవలం 4 వికెట్లే.. బుమ్రా ఫెయిల్యూర్ వెనుక అసలు కారణం బయటపెట్టిన ముంబై కోచ్..

Mahela Jayawardene: ఐపీఎల్ 2026 సీజన్‌లో ముంబై ఇండియన్స్ (MI) స్టార్ పేసర్ జస్‌ప్రీత్ బుమ్రా ఆశించిన స్థాయిలో రాణించలేకపోవడానికి గల అసలు కారణాలను ఆ జట్టు హెడ్ కోచ్ మహేల జయవర్ధనే వివరించారు. ఈ సీజన్‌లో బుమ్రా తీవ్రంగా ఇబ్బంది పడ్డాడు. ఇప్పటివరకు ఆడిన 13 మ్యాచ్‌ల్లో కేవలం 4 వికెట్లు మాత్రమే పడగొట్టగలిగాడు. తమ ప్రధాన పేసరే ఫామ్‌లో లేకపోవడంతో ముంబై ఇండియన్స్ ఈ సీజన్‌లో భారీ మూల్యాన్ని చెల్లించుకుంది. ఇప్పటికే ఆ జట్టు ప్లేఆఫ్స్ రేసు నుంచే కాకుండా టోర్నమెంట్ మొత్తానికి దూరమైంది. ఇక, మే 22న వాంఖెడే స్టేడియంలో రాజస్థాన్ రాయల్స్‌తో తమ చివరి మ్యాచ్‌లో పరువు కోసం బరిలోకి దిగింది. ఈ మ్యాచ్‌కు ముందు జరిగిన ప్రెస్ కాన్ఫరెన్స్‌లో జయవర్ధనే మాట్లాడుతూ.. బుమ్రా ప్రదర్శనపై స్పందించారు. బుమ్రా టీ20 ప్రపంచకప్ ఆడుతున్న సమయం నుంచే ఓ చిన్న గాయం (Slight Niggle) సమస్యతో ఇబ్బంది పడుతున్నాడని, ఆ టోర్నమెంట్ అంతా అలాగే ఆడాడని జయవర్ధనే వెల్లడించారు. ఆ గాయం నుంచి కోలుకుని ఫామ్ అందుకోవడానికి అతనికి కొంత సమయం పట్టిందని చెప్పారు. ఐపీఎల్ ప్రారంభానికి ముందు అతనికి తగినంత విశ్రాంతి ఇచ్చామని, అందుకే మొదటి 4-5 మ్యాచ్‌ల్లో అతను పూర్తిగా కోలుకునేలా క్రమంగా అతనికి వర్క్‌లోడ్ పెంచామని తెలిపారు. ఆ సమయంలో గాయం ప్రభావం వల్ల బుమ్రా బౌలింగ్ వేగం (Pace) కూడా కాస్త తగ్గిందని పేర్కొన్నారు.

అయితే, గత 4-5 మ్యాచ్‌లుగా బుమ్రా మళ్లీ తన పాత వేగాన్ని అందుకున్నాడని, బాగానే బౌలింగ్ చేస్తున్నాడని జయవర్ధనే చెప్పుకొచ్చారు. కానీ, ఒక పక్క గాయాన్ని మేనేజ్ చేస్తూ బౌలింగ్ చేయడం వల్ల లైన్ అండ్ లెంగ్త్‌పై పట్టు కోల్పోయి, వికెట్లు తీయడంలో ఉండే పదును (Sharpness) కాస్త తగ్గిందని అభిప్రాయపడ్డారు. ఇక్కడ ఆసక్తికరమైన విషయం ఏమిటంటే… ఈ సీజన్‌లో బుమ్రాకు వికెట్లు దక్కకపోయినప్పటికీ, ముంబై ఇండియన్స్ బౌలర్లలో అతనే అత్యుత్తమ ఎకానమీ రేటు (8.36) కలిగి ఉన్నాడు. దీనిపై జయవర్ధనే మాట్లాడుతూ… ప్రత్యర్థి జట్టు బ్యాటర్లు బుమ్రా బౌలింగ్‌లో ఎక్కువగా రిస్క్ తీసుకోవడం లేదని, అతన్ని ఆచితూచి ఆడుతున్నారని చెప్పారు. అదే సమయంలో ముంబైలోని ఇతర బౌలర్లు అవతలి ఎండ్ నుండి ఒత్తిడిని కొనసాగించడంలో దారుణంగా విఫలమయ్యారని విమర్శించారు. “ప్రస్తుతం బుమ్రా ఆరోగ్యం 100 శాతం బాగుంది. దురదృష్టవశాత్తూ మాకు ఈ సీజన్ ముగిసిపోయింది. మా మిగిలిన బౌలర్లు ప్రత్యర్థిపై ఒత్తిడి తెలేకపోవడంతో, బ్యాటర్లు వ్యూహాత్మకంగా బుమ్రా ఓవర్లను డిఫెన్స్ ఆడుతూ ముగించేస్తున్నారు. అతని బౌలింగ్‌లో అనవసరపు షాట్లకు పోయి వికెట్లు సమర్పించుకోవడం లేదు. కాబట్టి బుమ్రా వికెట్లు తీయకపోవడానికి కేవలం ఒకే ఒక కారణం లేదు, ఇవన్నీ కలిపి ప్రభావం చూపించాయి. అయినప్పటికీ బుమ్రా గురించి ఆందోళన చెందాల్సిన అవసరం లేదు. అతను చాలా ఉత్సాహంగా ఉన్నాడు, త్వరలోనే మరింత బలంగా పునరాగమనం చేస్తాడు” అని జయవర్ధనే ధీమా వ్యక్తం చేశారు.