Kumar Sangakkara: “వైభవ్‌తో క్రికెట్ ముచ్చట్లు పెట్టను”.. బుడ్డోడి సీక్రెట్ లీక్ చేసిన రాజస్థాన్ హెడ్ కోచ్..

Kumar Sangakkara: ఐపీఎల్ (IPL 2026) సీజన్‌లో ఎవరైనా ఎక్కువగా వార్తల్లో నిలిచారంటే, అది ఖచ్చితంగా రాజస్థాన్ రాయల్స్ (RR) విధ్వంసకర బ్యాటర్ వైభవ్ సూర్యవంశీ మాత్రమే. కేవలం 15 ఏళ్ల చిన్న వయసులోనే భయం తెలియని బ్యాటింగ్‌తో అతను క్రికెట్ ప్రపంచాన్ని ఆశ్చర్యపరిచాడు. ఈ క్రమంలోనే రాజస్థాన్ రాయల్స్ హెడ్ కోచ్, శ్రీలంక మాజీ కెప్టెన్ కుమార్ సంగక్కర ఈ యువ సంచలనంపై ప్రశంసల వర్షం కురిపించారు. వైభవ్ పవర్ ప్లేలో బౌలర్లను సెట్ అవ్వనివ్వకుండా ఆడుతున్న దూకుడైన ఆటతీరు వల్లే రాజస్థాన్ జట్టు చాలా మ్యాచుల్లో తొలి 6 ఓవర్లలోనే 60-70 పరుగుల మార్కును దాటగలుగుతోంది. ఇక నిన్న ఢిల్లీ క్యాపిటల్స్‌తో జరిగిన మ్యాచ్‌లో కేవలం 21 బంతుల్లోనే 46 పరుగులు చేసి తుఫాన్ ఆరంభాన్ని ఇచ్చిన వైభవ్, ఈ సీజన్‌లో ఇప్పటివరకు 12 మ్యాచ్‌లలో ఒక సెంచరీ, రెండు హాఫ్ సెంచరీలతో కలిపి మొత్తం 486 పరుగులు సాధించాడు. కొన్నిసార్లు ఈ యువ ఆటగాడు భారీ ఇన్నింగ్స్‌లు ఆడలేకపోయినప్పటికీ, అతని వేగవంతమైన బ్యాటింగ్ జట్టుకు బలమైన పునాదిని ఇస్తోందని సంగక్కర పేర్కొన్నారు. అంత వేగంగా ఆడుతున్నప్పుడు 30 పరుగులు కూడా ఎంతో కీలకమని, ఆ మెరుపు ఆరంభం మిగిలిన బ్యాటర్ల పనిని సులువు చేస్తుందన్నారు. చాలామంది వైభవ్‌ది కేవలం హిట్టింగ్ మాత్రమే అనుకుంటారు, కానీ సంగక్కర మాత్రం అతను మ్యాచ్ పరిస్థితులను చక్కగా అర్థం చేసుకుని బ్యాటింగ్ చేస్తాడని నమ్ముతున్నారు.

వైభవ్‌తో ముచ్చట్లు పెట్టినట్లు తెలిపిన సంగక్కర కీలక విషయాలు వెల్లడించారు. అతను గంటల తరబడి బ్యాటింగ్ చేయడానికి ఇష్టపడతాడని, కేవలం పెద్ద షాట్లు ఆడటమే కాకుండా గేమ్‌ను క్లుప్తంగా అర్థం చేసుకుంటాడని సంగక్కర తెలిపారు. వైభవ్‌పై అనవసరమైన ఒత్తిడి పడకుండా ఉండేందుకు తాను అతనితో ఎక్కువ క్రికెట్ ముచ్చట్లు పెట్టనని, మానసికంగా ప్రశాంతంగా ఉంచేందుకు క్రికెట్టేతర విషయాలనే ఎక్కువగా మాట్లాడుతుంటానని చెప్పారు. అయినప్పటికీ, నెట్స్‌లో అతనికి షార్ట్ బాల్స్, స్వింగింగ్ యార్కర్లు, పేస్ బౌలర్ల వ్యూహాలను ఎదుర్కొనేలా ప్రత్యేకంగా సన్నద్ధం చేస్తున్నట్లు కోచ్ వివరించారు. మైదానంలో వైభవ్ తీసుకునే ఏ నిర్ణయాన్నైనా పూర్తి ఆత్మవిశ్వాసంతో అమలు చేయడమే అతని అతిపెద్ద బలం. వైభవ్‌కు కొద్దిపాటి సాయం అవసరమే కానీ, మరీ అంతగా అవసరం లేదని చెబుతూ.. “నిజం చెప్పాలంటే, అతను నాకంటే మెరుగైన ఆటగాడు” అని సంగక్కర లాంటి ఒక గొప్ప దిగ్గజం ప్రశంసించడం, ఈ చిన్న వయసులోనే వైభవ్ క్రికెట్ ప్రపంచంపై ఎంతటి బలమైన ముద్ర వేశాడో చూపిస్తుంది.