IPL 2026 Players: ఐపీఎల్ ప్లేయర్స్ ఫిట్‌నెస్.. ఫ్రాంచైజీల బాధ్యతపై చర్చ..

ఇండియన్ ప్రీమియర్ లీగ్ (ఐపీఎల్) లీగ్ దశ ముగింపుకు చేరిన వేళ, ఆటగాళ్ల శారీరక శ్రమ, ఫిట్‌నెస్ నిర్వహణ (వర్క్‌లోడ్ మేనేజ్‌మెంట్) అంశం ఇప్పుడు క్రికెట్ వర్గాల్లో పెద్ద చర్చకు దారితీసింది. ప్లేఆఫ్స్ రేసు ఉత్కంఠగా సాగుతున్నప్పటికీ, కీలకమైన భారతీయ ఆటగాళ్లకు తగినంత విశ్రాంతి ఇవ్వడంలో ఫ్రాంచైజీలు విఫలమవుతున్నాయనే ఆందోళన వ్యక్తమవుతోంది.

ముంబై ఇండియన్స్ కీలక బౌలర్ జస్‌ప్రీత్ బుమ్రా మోకాలి నొప్పితో బాధపడుతున్నప్పటికీ, జట్టు ప్లేఆఫ్స్ రేసు నుండి తప్పుకున్న తర్వాత కూడా అతనికి విశ్రాంతి ఇవ్వకపోవడంపై విమర్శలు వస్తున్నాయి. టోర్నీ ప్రారంభానికి ముందే అతనికి సమస్య ఉన్నట్లు తెలిసినా, వరుసగా మ్యాచ్‌లు ఆడించడం గమనార్హం. దీనిపై బీసీసీఐ కార్యదర్శి దేవజిత్ సైకియా స్పందిస్తూ, ఐపీఎల్ సమయంలో ఆటగాళ్ల ఫిట్‌నెస్ విషయాల్లో బోర్డు నేరుగా జోక్యం చేసుకోలేదని, అది ఫ్రాంచైజీల పరిధిలోని అంశమని స్పష్టం చేశారు.

బుమ్రా మాత్రమే కాకుండా, కోల్‌కతా నైట్ రైడర్స్ స్పిన్నర్ వరుణ్ చక్రవర్తి స్వల్ప గాయంతోనే ఆడాడని, అలాగే రాజస్థాన్ రాయల్స్ కెప్టెన్ రియాన్ పరాగ్ కూడా తాను పూర్తిగా ఫిట్‌గా లేనని స్వయంగా అంగీకరించాడు. పంజాబ్ కింగ్స్ బౌలర్ అర్ష్‌దీప్ సింగ్ సైతం కొన్ని శారీరక పరిమితులతోనే బౌలింగ్ చేశాడు. ఐపీఎల్ ముగిసిన వెంటనే భారత ఆటగాళ్లు అంతర్జాతీయ మ్యాచ్‌లు ఆడాల్సి ఉంది. ఇలాంటి కీలక సమయంలో ఆటగాళ్లు గాయాల బారిన పడకుండా చూసుకోవడం చాలా ముఖ్యం. ఆటగాళ్లకు ఆడే ఉత్సాహం ఉన్నప్పటికీ, వారి భవిష్యత్తును దృష్టిలో ఉంచుకుని బీసీసీఐ, ఐపీఎల్ ఫ్రాంచైజీలు కలిసికట్టుగా ఒక సరైన నిర్ణయానికి రావలసిన అవసరం ఎంతైనా ఉంది.