Axar Patel: ఐపీఎల్ 2026 సీజన్ ప్లేఆఫ్స్ రేసు ఉత్కంఠభరితంగా ముగిసింది. లీగ్ స్టేజ్ ముగిసే సమయానికి రాయల్ ఛాలెంజర్స్ బెంగళూరు (RCB), గుజరాత్ టైటాన్స్, సన్రైజర్స్ హైదరాబాద్ (SRH), రాజస్థాన్ రాయల్స్ జట్లు ప్లేఆఫ్స్ బెర్త్లను ఖరారు చేసుకున్నాయి. ఈ నేపథ్యంలో ఢిల్లీ క్యాపిటల్స్ కెప్టెన్ అక్షర్ పటేల్ కీలక వ్యాఖ్యలు చేశాడు. ఈ ఏడాది ఐపీఎల్ టైటిల్ను సన్రైజర్స్ హైదరాబాద్ గెలుచుకునే అవకాశం ఉందని విశ్వాసం వ్యక్తం చేశాడు. లీగ్ దశలో తమ చివరి మ్యాచ్ ముగిసిన తర్వాత అక్షర్ మాట్లాడుతూ… సన్రైజర్స్ హైదరాబాద్ టాప్ ఆర్డర్ బ్యాటింగ్ లైనప్ అత్యంత ప్రమాదకరమైనదని, ప్లేఆఫ్స్లో ఎస్ఆర్హెచ్ బ్యాటర్లు గనుక విజృంభిస్తే వారిని అడ్డుకోవడం ఏ జట్టుకైనా చాలా కష్టమని హెచ్చరించాడు.
సన్రైజర్స్ హైదరాబాద్ జట్టు టేబుల్ టాపర్ అయిన రాయల్ ఛాలెంజర్స్ బెంగళూరుపై 55 పరుగుల భారీ తేడాతో ఘన విజయం సాధించి ప్లేఆఫ్స్కు అర్హత సాధించింది. హైదరాబాద్లోని రాజీవ్ గాంధీ అంతర్జాతీయ స్టేడియంలో జరిగిన ఈ మ్యాచ్లో హైదరాబాద్ జట్టు ఈ సీజన్ లోనే అత్యుత్తమ ప్రదర్శనను కనబరిచి, పాయింట్ల పట్టికలో మూడో స్థానంలో నిలిచింది. ఈ నేపథ్యంలో మే 27న న్యూ చండీగఢ్లోని ముల్లన్పూర్ స్టేడియంలో జరగనున్న ఎలిమినేటర్ మ్యాచ్లో రాజస్థాన్ రాయల్స్తో సన్రైజర్స్ తలపడనుంది. కోల్కతా నైట్ రైడర్స్తో ఢిల్లీ క్యాపిటల్స్ మ్యాచ్ ముగిసిన అనంతరం బ్రాడ్కాస్టర్తో అక్షర్ పటేల్ మాట్లాడుతూ.. “SRH చాలా బలమైన జట్టు అని నేను భావిస్తున్నాను. ముఖ్యంగా వారి టాప్-3 బ్యాటర్లు విజృంభిస్తే, ఆ జట్టును ఓడించడం ఎవరికైనా సాధ్యం కాదు” అని పేర్కొన్నారు.
ఇక, ఈ సీజన్లో ఢిల్లీ క్యాపిటల్స్ ఆడిన 14 మ్యాచ్ల్లో 14 పాయింట్లతో ఆరో స్థానంలో నిలిచింది. టోర్నమెంట్ మధ్యలో వరుస ఓటములతో కుదేలైన ఢిల్లీ.. ఆ తర్వాత కోలుకోవడానికి చేసిన ప్రయత్నాలు ఫలించలేదు. లీగ్ చివర్లో వరుసగా మూడు మ్యాచ్లు గెలిచి సానుకూల ముగింపు పలికినప్పటికీ, టాప్-4 లోకి దూసుకెళ్లడానికి ఆ పాయింట్లు సరిపోలేదు. దీంతో వరుసగా ఐదో ఏడాది కూడా ఢిల్లీ ప్లేఆఫ్స్ చేరడంలో విఫలమైంది. ఇక, తమ జట్టు ప్రదర్శనపై స్పందించిన అక్షర్ పటేల్.. టోర్నమెంట్లో కీలక సమయాల్లో వచ్చిన అవకాశాలను తాము చేజార్చుకున్నామని అంగీకరించాడు. “మనం చేసిన తప్పులను ఒప్పుకున్నప్పుడే, ఇంకా ఏం చేయాలో అర్థమవుతుంది. ఒకటి రెండు మ్యాచ్లలో ఓటమి సహజమే. మేము మంచి క్రికెట్ ఆడాము, కానీ ఆ ఒకటి రెండు మ్యాచ్లలోని కీలక క్షణాలను మాకు అనుకూలంగా మార్చుకుని ఉంటే ఫలితం మరోలా ఉండేది” అని అక్షర్ అన్నాడు.