ఇండియన్ ప్రీమియర్ లీగ్ (ఐపీఎల్) 2026లో న్యూజీలాండ్ బ్యాటర్ ఫిన్ అలెన్ విధ్వంసకర బ్యాటింగ్తో అదరగొట్టాడు. శుక్రవారం ఢిల్లీ క్యాపిటల్స్ (డీసీ)తో జరిగిన మ్యాచ్లో కోల్కతా నైట్ రైడర్స్ (కేకేఆర్) తరఫున ఆడుతూ శతకం బాదాడు. కేవలం 47 బంతుల్లోనే 5 ఫోర్లు, 10 సిక్సులతో సెంచరీ చేసి నాటౌట్గా నిలిచాడు. ఈ సెంచరీతో ఐపీఎల్లో కేకేఆర్ స్టార్ ఎన్నో అరుదైన రికార్డులు అందుకున్నాడు. అంతేకాదు కేకేఆర్ చరిత్రలో ఫిన్ అలెన్ ప్రత్యేక స్థానం సంపాదించాడు. ఆ రికార్డులు ఏంటో చూద్దాం.
ఓ ఇన్నింగ్స్లో అత్యధిక సిక్సర్లు:
ఫిన్ అలెన్ తన ఇన్నింగ్స్లో 10 సిక్సులు బాదాడు. దాంతో కేకేఆర్ తరఫున ఒక ఐపీఎల్ ఇన్నింగ్స్లో అత్యధిక సిక్సర్లు కొట్టిన బ్యాటర్ల జాబితాలో మూడో స్థానానికి చేరాడు. ఈ జాబితాలో బ్రెండన్ మెక్కల్లమ్ అగ్రస్థానంలో ఉన్నాడు. 2008లో బెంగళూరులో రాయల్ ఛాలెంజర్స్ బెంగళూరుపై మెకల్లమ్ 13 సిక్సర్లు బాదాడు. రెండో స్థానంలో ఆండ్రీ రస్సెల్ ఉన్నాడు. అతడు 2018లో చెన్నైలో చెన్నై సూపర్ కింగ్స్ జట్టుపై 11 సిక్సర్లు బాదాడు. ఇప్పుడు అలెన్ 10 సిక్సర్లతో ఆ జాబితాలో చోటు సంపాదించాడు.
కేకేఆర్ తరఫున సెంచరీ:
కేకేఆర్ తరఫున ఐపీఎల్లో శతకాలు సాధించిన బ్యాటర్ల జాబితాలో కూడా ఫిన్ అలెన్ చేరిపోయాడు. బ్రెండన్ మెకల్లమ్ 2008లో ఆర్సీబీపై 158 నాటౌట్, వెంకటేష్ అయ్యర్ 2023లో మబై ఇండియన్స్పై 104, సునీల్ నరైన్ 2024లో రాజస్థాన్ రాయల్స్పై 109 పరుగులు చేశారు. తాజాగా ఫిన్ అలెన్ ఢిల్లీ క్యాపిటల్స్పై సెంచరీతో ఈ జాబితాలో చేరాడు.
తొలి న్యూజీలాండ్ బ్యాటర్గా చరిత్ర:
ఈ ఏడాది ఫిన్ అలెన్ అద్భుత ఫామ్లో ఉన్నాడు. 2026 క్యాలెండర్ ఇయర్లో మూడు టీ20 శతకాలు చేసిన తొలి న్యూజీలాండ్ బ్యాటర్గా చరిత్ర సృష్టించాడు. పెర్త్ స్కార్చర్స్ తరఫున బీబీఎల్లో 101 పరుగులు చేసిన అలెన్.. టీ20 ప్రపంచ కప్ 226లో న్యూజీలాండ్ తరఫున శతకం (100 నాటౌట్) బాదాడు. ఇప్పుడు ఐపీఎల్లో కేకేఆర్ తరఫున కూడా శతకం సాధించి అరుదైన ఘనత అందుకున్నాడు.
మెక్కల్లమ్ తర్వాత ఫిన్ అలెన్:
ఐపీఎల్ చరిత్రలో శతకం చేసిన రెండో న్యూజీలాండ్ బ్యాటర్గా కూడా ఫిన్ అలెన్ నిలిచాడు. ఇప్పటివరకు ఈ ఘనత బ్రెండన్ మెక్కల్లమ్కు మాత్రమే సాధ్యమైంది. ఇప్పుడు అలెన్ కూడా ఆ జాబితాలో చేరి తన ప్రత్యేకతను నిరూపించుకున్నాడు. ఒక్క సెంచరీతో ఫిన్ అలెన్ ఎన్నో అరుదైన రికార్డులు అందుకున్నాడు.