ఐపీఎల్ 2026లో ఆలస్యంగా పుంజుకున్న కోల్కతా నైట్ రైడర్స్ (కేకేఆర్) వరుస విజయాలు అందుకుంటోంది. శుక్రవారం రాత్రి ఢిల్లీ క్యాపిటల్స్ (డీసీ)తో జరిగిన మ్యాచ్లో కేకేఆర్ 8 వికెట్ల తేడాతో గెలిచింది. ముందుగా డీసీ 8 వికెట్లకు 142 పరుగులే చేయగా.. లక్ష్యాన్ని కేకేఆర్ 14.2 ఓవర్లలో 2 వికెట్లు మాత్రమే కోల్పోయి ఛేదించింది. కోల్కతా విజయంలో న్యూజీలాండ్ ప్లేయర్ ఫిన్ అలెన్ కీలక పాత్ర పోషించాడు. 47 బంతుల్లో 5 ఫోర్లు, 10 సిక్సులతో 100 రన్స్ చేసి నాటౌట్గా నిలిచాడు. మెరుపు శతకం చేసిన ఫిన్ అలెన్కు ‘ప్లేయర్ ఆఫ్ ది మ్యాచ్’ అవార్డు దక్కింది. ఈ సందర్భంగా అతడు మాట్లాడుతూ.. తాను ఇప్పుడు ‘ఫిన్ అలెన్ 2.0’లా మారేందుకు ప్రయత్నిస్తున్నానని చెప్పాడు. కేవలం దూకుడుగా ఆడటమే కాకుండా.. పరిస్థితికి తగ్గట్టుగా బ్యాటింగ్ చేయడం నేర్చుకుంటున్నానని వెల్లడించాడు.
‘నా ఆట చూస్తే ఫిన్ అలెన్ 2.0లా అనిపిస్తుంది. నేను నా ఆటలో మరిన్ని కోణాలు తీసుకురావడానికి ప్రయత్నిస్తున్నాను. ఛేదనలో మా జట్టు తొందరగానే రెండు వికెట్లు కోల్పోయింది. అందుకే కొంచెం బాధ్యత తీసుకుని జట్టుకు విజయాన్ని అందించాలనుకున్నా. నేను ఇదివరకు చెప్పినట్టే.. ఇన్నింగ్స్ ప్రారంభంలో కాస్త ఓపికగా ఆడాలని అనుకున్నాను. మొదట్లో బ్యాటింగ్ అంత సులభంగా లేదు. ముఖ్యంగా అక్షర్ పటేల్ చాలా బాగా బౌలింగ్ చేశాడు. మమ్మల్ని అతడు కట్టడి చేశాడు. అందుకే ఎక్కువసేపు బ్యాటింగ్ చేయాలని చూసాను. నా బ్యాటింగ్లో మార్పులు తీసుకురావాలనుకుంటున్నా. పరిస్థితులు అనుకూలంగా లేకపోతే క్రీజులో నిలబడాలి. షేన్ వాట్సన్, అభిషేక్ నాయర్లతో కలిసి దీనిపై పని చేస్తున్నాను’ అని ఫిన్ అలెన్ చెప్పాడు.
‘నాకు నేను అవకాశం ఇవ్వాలని ప్రయత్నిస్తున్నాను. కొన్ని మంచి స్టార్ట్స్ వచ్చినా పెద్ద ఇన్నింగ్స్లుగా మార్చుకోలేకపోవడం నిరాశ కలిగించింది. కానీ ఈరోజు వ్యక్తిగతంగా మంచి విజయాన్ని అందుకోవడం ఆనందంగా ఉంది. ఇలాంటి పరిస్థితుల్లో నా సహజమైన ఆట గురించి మర్చిపోయి మ్యాచ్ పరిస్థితికి తగ్గట్టే ఆడాలి. నేను ఎక్కువసేపు క్రీజులో ఉంటే తర్వాత పరిస్థితిని మార్చగలనని నమ్మకం ఉంది. కనీసం 40 బంతులు ఆడాలని లక్ష్యంగా పెట్టుకుంటాను. అది ప్రతిసారి సాధ్యం కాదు. కానీ ఈరోజు ఆ ఆలోచన నన్ను ముందుకు నడిపించింది. జట్టులో చోటు కోల్పోయి మళ్లీ తిరిగి రావడం బాగుంది. కొన్నిసార్లు జట్టుకు దూరంగా ఉండటం మన ఆలోచనా విధానాన్ని మార్చేస్తుంది. మానసికంగా కాస్త ఫ్రెష్ అవ్వడానికి సమయం దొరుకుతుంది. నిజం చెప్పాలంటే ఈ సీజన్ ప్రారంభంలో నాపై నేనే చాలా ఒత్తిడి పెట్టుకున్నాను. కాబట్టి కొంత విరామం తీసుకుని ప్రశాంతంగా ఆలోచించి మళ్లీ తిరిగి రావడం చాలా బాగుంది’ అని ఫిన్ అలెన్ తెలిపాడు.