FIFA World Cup 2026: ఫుట్బాల్ ఫ్యాన్స్‌కు బిగ్ షాక్.. టికెట్లను ధరలు భారీగా పెంచిన FIFA.. సామాన్యులకు దూరమేనా..?
- Follow Us :
-
-
Add as a preferred
source on google
FIFA World Cup 2026: ఫుట్బాల్ అభిమానులకు షాక్ ఇస్తూ ఈ ఏడాది ప్రపంచ కప్ టికెట్ల ధరలను FIFA భారీగా పెంచింది.. ఇప్పటికే ఉన్న కేటగిరీలకు తోడు కొత్తగా “ఫ్రంట్ కేటగిరీ” పేరుతో మరింత ఖరీదైన టిక్కెట్లను ప్రవేశపెట్టింది. దీంతో మ్యాచ్‌లను ప్రత్యక్షంగా వీక్షించడం సాధారణ అభిమానులకు మరింత ఖరీదైన వ్యవహారంగా మారింది. జూన్ 12న అమెరికాలోని ఇంగిల్‌వుడ్‌లో జరిగే యూఎస్ ఆరంభ మ్యాచ్ టికెట్ల ధరలు భారీగా పెరిగాయి. ముందువరుసలోని ఫ్రంట్ కేటగిరీ 1 టికెట్ ధర $4,105గా నిర్ణయించగా, ఇది భారత కరెన్సీలో సుమారు రూ.3.4 లక్షలు (అంచనా) అవుతుంది. గతంలో ఇదే కేటగిరీ గరిష్ట ధర $2,735 (సుమారు రూ.2.25 లక్షలు)గా ఉండేది. ఇప్పుడు కొత్త కేటగిరీలతో ధరలు మరింత పెరిగాయి.
Read Also: Babar Azam: విరాట్ కోహ్లీ రికార్డు బ్రేక్ చేసిన బాబర్ ఆజామ్.. టీ20 క్రికెట్ చరిత్రలో సువర్ణ అధ్యాయం
అదేవిధంగా, ఫీఫా కొత్తగా ప్రవేశపెట్టిన “ఫ్రంట్ కేటగిరీ 2” టిక్కెట్ల ధరలు $1,940 నుంచి $2,330 వరకు ఉన్నాయి. ఇది భారత కరెన్సీలో సుమారు రూ.1.6 లక్షల నుంచి రూ.1.9 లక్షల వరకు ఉంటుంది. ఈ ధరలు చూసి అభిమానులు ఆశ్చర్యపోతున్నారు. ఈ ప్రపంచ కప్ జూన్ 11 నుంచి జూలై 19 వరకు అమెరికా, మెక్సికో, కెనడా దేశాల్లోని 16 నగరాల్లో జరుగనుంది. కెనడా ఆరంభ మ్యాచ్‌కు కూడా ఫ్రంట్ కేటగిరీ 1 టిక్కెట్ల ధర $3,360 (సుమారు రూ.2.8 లక్షలు)గా నిర్ణయించారు. రౌండ్ ఆఫ్ 16 మ్యాచ్‌లకు కూడా ధరలు తక్కువగా లేవు. ఫిలడెల్ఫియాలో జరిగే మ్యాచ్‌కు టికెట్ ధర $905 (సుమారు రూ.75,000)గా ఉంది. ఇక ఫైనల్ మ్యాచ్ విషయానికి వస్తే, టికెట్ ధరలు రికార్డు స్థాయికి చేరుకున్నాయి.
న్యూజెర్సీలోని మెట్‌లైఫ్ స్టేడియంలో జూలై 19న జరిగే ఫైనల్ మ్యాచ్ టికెట్ గరిష్ట ధర $10,990గా నిర్ణయించగా, ఇది భారత కరెన్సీలో సుమారు రూ.9 లక్షలకు పైగా ఉంటుంది. డిసెంబర్‌లో ఇదే టికెట్ ధర $8,680 (సుమారు రూ.7.2 లక్షలు)గా ఉండేది. అదేవిధంగా, కేటగిరీ 2 టిక్కెట్లు $5,575 నుంచి $7,380 (రూ.4.6 లక్షలు – రూ.6.1 లక్షలు), కేటగిరీ 3 టిక్కెట్లు $4,185 నుంచి $5,785 (రూ.3.5 లక్షలు – రూ.4.8 లక్షలు) వరకు పెరిగాయి. మొత్తం మీద, ఈసారి ప్రపంచ కప్ టికెట్ ధరలు భారీగా పెరిగాయి. ప్రీమియం అనుభవం పేరుతో ఫీఫా కొత్త కేటగిరీలను తీసుకువచ్చినప్పటికీ, సాధారణ అభిమానులకు మ్యాచ్‌లను ప్రత్యక్షంగా వీక్షించడం కష్టతరంగా మారింది.