India All Out List: వన్డేల్లో టీమిండియాకు ఘోర పరాభవం.. 100 లోపే భారత్ ఇన్నిసార్లు ఆలౌట్ అయిందా?

Team India Lowest ODI Scores in ODI: ప్రపంచ క్రికెట్‌లో అత్యంత పటిష్టమైన జట్లలో ఒకటిగా ఉన్న టీమిండియాకు న్యూజిలాండ్‌తో జరిగిన నాలుగో వన్డేలో ఘోర పరాభవం ఎదురైంది. మౌంట్ మాంగనూయిలోని బే ఓవల్ వేదికగా శుక్రవారం (నవంబర్ 13) జరిగిన మ్యాచ్‌లో భారత్ కేవలం 89 పరుగులకే ఆలౌట్ అయింది. దీంతో కివీస్ 244 పరుగుల భారీ తేడాతో విజయాన్ని అందుకుంది. 334 పరుగుల లక్ష్యంతో బరిలోకి దిగిన టీమిండియా 26.4 ఓవర్లలోనే చేతులెత్తేసింది. న్యూజిలాండ్ స్టార్ బౌలర్ మాట్ హెన్రీ 27 పరుగులిచ్చి ఆరు వికెట్లు పడగొట్టి భారత బ్యాటింగ్‌ను కుప్పకూల్చాడు.

100 పరుగుల లోపే తొమ్మిదిసార్లు:

వన్డే క్రికెట్ చరిత్రలో భారత్ 100 పరుగుల మార్కును కూడా అందుకోకుండా ఆలౌట్ కావడం ఇది తొమ్మిదోసారి. గతంలోనూ పలుమార్లు టీమిండియా చిత్తుచిత్తుగా ఓడింది. వన్డేల్లో భారత్ అత్యల్ప స్కోర్లు 54. 2000లో షార్జాలో శ్రీలంకపై 54 పరుగులకే కుప్పకూలింది. దాయాది పాకిస్థాన్‌పై కూడా 79 పరుగులకే ఆలౌట్ ఆయింది. టీమిండియాను 100 పరుగుల లోపే ఎక్కువసార్లు ఆలౌట్ చేసిన జట్టుగా న్యూజిలాండ్‌ ఉంది. ఏకంగా మూడుసార్లు 100 పరుగుల లోపే ఆలౌట్ చేసింది.

వన్డేల్లో భారత్ అత్యల్ప స్కోర్లు ఇవే!
54 పరుగులు: శ్రీలంకపై, షార్జా, 2000.
63 పరుగులు: ఆస్ట్రేలియాపై, సిడ్నీ, 1981.
78 పరుగులు: శ్రీలంకపై, కాన్పూర్, 1986.
79 పరుగులు: పాకిస్థాన్‌పై, సియాల్‌కోట్, 1978.
88 పరుగులు: న్యూజిలాండ్‌పై, దంబుల్లా, 2010.
89 పరుగులు: న్యూజిలాండ్‌పై, మౌంట్ మాంగనూయి, 2026.
91 పరుగులు: దక్షిణాఫ్రికాపై, డర్బన్, 2006.
92 పరుగులు: న్యూజిలాండ్‌పై, హామిల్టన్, 2019.

హెన్రీ దెబ్బకు పేకమేడలా:
నాలుగో వన్డేలో తొలుత బ్యాటింగ్ చేసిన న్యూజిలాండ్ నిర్ణీత 50 ఓవర్లలో 333 పరుగుల భారీ స్కోరు సాధించింది. అనంతరం 334 పరుగుల లక్ష్యంతో బరిలోకి దిగిన భారత బ్యాటర్లు కివీస్ బౌలర్లను ఎదుర్కోవడంలో పూర్తిగా విఫలమయ్యారు. ముఖ్యంగా మాట్ హెన్రీ పదునైన బంతులతో భారత బ్యాటర్లకు చుక్కలు చూపించాడు. కేవలం 27 పరుగులిచ్చి ఆరు వికెట్లు పడగొట్టి ‘ప్లేయర్ ఆఫ్ ద మ్యాచ్’ అవార్డును అందుకున్నాడు. ఈ మ్యాచ్‌లో భారత బ్యాటింగ్ వైఫల్యం అభిమానులను తీవ్ర నిరాశకు గురిచేసింది. ప్రపంచ క్రికెట్‌లో ఎన్నో రికార్డులు సృష్టించిన టీమిండియా ఇలా 100 పరుగుల లోపే ఆలౌట్ కావడం అభిమానులకు మింగుడుపడడం లేదు. ముఖ్యంగా న్యూజిలాండ్‌పై భారత్ గతంలోనూ అత్యల్ప స్కోర్లు నమోదు చేయడం గమనార్హం.