Umpire Nitin Menon: అనుకూల నిర్ణయాలు ఇవ్వాలని ఒత్తిడి తెస్తున్నారు.. భారత ఆటగాళ్లపై అంపైర్ నితిన్ మీనన్ సంచలన వ్యాఖ్యలు!

Umpire Nitin Menon Makes Sensational Comments on India Star Players: టీమిండియా స్టార్‌ ఆటగాళ్లపై భారత అంపైర్‌ నితిన్‌ మీనన్‌ సంచలన వ్యాఖ్యలు చేశాడు. స్టార్‌ ఆటగాళ్లు అంపైరింగ్‌ నిర్ణయాలు తమకు అనుకూలంగా వచ్చేలా ఒత్తిడి తీసుకొస్తారన్నాడు. 50-50 నిర్ణయాలను తమకు అనుకూలంగా మలుచుకునేందుకు భారత స్టార్స్ ప్రయత్నిస్తారని పేర్కొన్నాడు. తన దృష్టి ఎప్పుడూ అంపైరింగ్‌ మీదే ఉంటుందని ఐసీసీ ఎలైట్ ప్యానెల్ అంపైర్ నితిన్ మీనన్ చెప్పుకొచ్చాడు. భారత్ నుంచి ఐసీసీ ప్యానల్‌కు ప్రాతినిథ్యం వహిస్తున్న అంపైర్లలో నితిన్ మీనన్ ఒకడన్న సంగతి తెలిసిందే.

ప్రస్తుతం ఇంగ్లండ్, ఆస్ట్రేలియా జట్ల మధ్య జరుగుతున్న యాషెస్ 2023లో చివరి మూడు టెస్ట్‌లకు నితిన్ మీనన్ అంపైర్‌గా బాధ్యతలు నిర్వర్తించబోతున్నాడు. ఈ నేపథ్యంలో ఓ క్రీడా చానెల్‌కు ఇచ్చిన ఇంటర్వ్యూలో ఆసక్తికర వ్యాఖ్యలు చేశాడు. ‘సొంత గడ్డపై ఆడుతున్నపుడు భారత జట్టుపై భారీ అంచనాలు ఉంటాయి. మైదానం మొత్తం అభిమానులతో నిండిపోతుంది. దాంతో భారత స్టార్లు ఆన్‌ ఫీల్డ్‌ అంపైర్లపై ఒత్తిడి తెచ్చేందుకు ప్రయత్నిస్తారు. 50-50గా ఉన్నప్పుడు నిర్ణయాలు తమకు అనుకూలంగా వచ్చేలా ఒత్తిడి తెస్తారు. అయితే ఒత్తిడి కూడా మేం నియంత్రణలో ఉండి.. దృష్టి మరలకుండా చూసుకుంటాం’ అని నితిన్ చెప్పాడు.

‘ఏదైనా పరిస్థితిని ఎదుర్కోవడానికి నేను బలంగా ఉన్నానని నమ్మితే.. ప్లేయర్స్ సృష్టించే ఒత్తిడి నుంచి బయటపడొచ్చు. ఐసీసీ ప్యానల్‌లో స్వదేశంలో భారత్‌ తరఫున సేవలందించడం పెద్ద బాధ్యత. ఈ ప్యానల్‌లో చేరినప్పుడు నాకు అనుభవం లేదు. కానీ గత మూడేళ్లుగా అంపైర్‌గా ఎంతో ఎదిగాను. ప్రస్తుతం యాషెస్‌ సిరీస్‌లో బాధ్యతలు చేపట్టా. ఇది గొప్ప సిరీస్ అవుతుంది. ఈ ప్రతిష్టాత్మక సిరీస్‌కు అంపైరింగ్ చేయాలనేది నా కల. ఇప్పుడు అది నెరవేరబోతోంది. ‘బాజ్‌బాల్’ అంటే ఏమిటో చూడగలిగాను. ఆస్ట్రేలియా అద్భుతమైన బౌలింగ్ లైనప్‌ని కలిగి ఉంది. ఇంగ్లండ్ ఆడే విధానం టెస్ట్ క్రికెట్‌ను పునర్నిర్వచించడమే’ అని నితిన్ మీనన్ పేర్కొన్నాడు.

Also Read:Virat Kohli Net Worth: సంపాదనలోనూ ‘కింగే’.. విరాట్‌ కోహ్లీ నికర ఆస్తుల విలువ ఎంతో తెలుసా?