Bhuvneshwar Kumar: పెద్దగా అంచనాలు లేవు.. ఎలా రాసిపెట్టి ఉందో..!

టీమిండియా సీనియర్ పేసర్ భువనేశ్వర్ కుమార్ తన అంతర్జాతీయ క్రికెట్ పునరాగమనంపై ఆసక్తికర వ్యాఖ్యలు చేశాడు. నాలుగేళ్ల పాటు భారత జట్టుకు దూరంగా ఉన్నప్పటికీ.. తిరిగి జాతీయ జట్టులోకి రావాలని తాను ఎప్పుడూ ప్రత్యేకంగా ప్రయత్నించలేదని వెల్లడించాడు. తన కుటుంబం అందించిన మద్దతు, ప్రస్తుతంపై దృష్టి పెట్టడం, ఎలాంటి అంచనాలు లేకుండా ఆటను కొనసాగించడం తన ప్రయాణంలో కీలక పాత్ర పోషించాయని తెలిపాడు. 2022 తర్వాత తొలిసారి న్యూజిలాండ్‌తో క్రైస్ట్‌చర్చ్‌లో జరిగిన తొలి టీ20లో భారత ప్లేయింగ్ ఎలెవన్‌లో చోటు దక్కించుకున్న భువీ.. దాదాపు నాలుగేళ్ల విరామం తర్వాత మళ్లీ జాతీయ జట్టు తరఫున బరిలోకి దిగాడు. ఐపీఎల్‌లో వరుసగా నిలకడైన ప్రదర్శనలు చేయడంతో 36 ఏళ్ల ఈ పేసర్‌కు తిరిగి భారత జట్టులో అవకాశం లభించింది.

బీసీసీఐ విడుదల చేసిన వీడియోలో భువనేశ్వర్ కుమార్ తన పునరాగమన ప్రయాణం గురించి వివరించాడు. ఈ సందర్భంగా తన కుటుంబానికి ప్రత్యేకంగా కృతజ్ఞతలు తెలిపాడు. ‘కుటుంబం గురించి చెప్పడానికి పెద్దగా ఏమీ ఉండకపోవచ్చు. కానీ నా కుటుంబానికి కూడా క్రెడిట్ ఇవ్వాలి. మీకు ఆశ్చర్యంగా అనిపించవచ్చు.. ఒక్కరోజు కూడా రీఎంట్రీ గురించి మాట్లాడలేదు. అది నా ప్రయాణంలో చాలా కీలక పాత్ర పోషించింది.పునరాగమనంలో నా ఆటతీరుపై పెద్దగా అంచనాలు పెట్టుకోవడం లేదు. ఎలా రాసిపెట్టి ఉంటే అలానే జరుగుతుంది. గత మూడు, నాలుగేళ్లలో నా ప్రయాణం సాఫీగా సాగింది. ఎలాంటి అంచనాలు లేకుండా.. నా పని నేను చేసుకుంటూ వెళ్లాను. ప్రస్తుతంలో ఉండాలి, భవిష్యత్తు గురించి ఆలోచించకూడదు అని సాధారణంగా చెబుతుంటాం. ప్రస్తుతం నేను అదే చేస్తున్నా’ అని భువనేశ్వర్ చెప్పాడు.

మళ్లీ భారత జట్టుకు ప్రాతినిధ్యం వహించే అవకాశం రావడం తనకు ఎంతో సంతోషాన్ని కలిగించిందని భువనేశ్వర్ తెలిపాడు. ‘ఇప్పుడు నేను చాలా ఫ్రీగా ఉన్నా. టీమిండియాకు ఆడకపోయినా శ్రమించడం మాత్రం ఎప్పుడూ ఆపలేదు. వ్యక్తిగతంగా ఆ పరిణతిని నేను సాధించా. మన దేశానికి ప్రాతినిధ్యం వహించడం కంటే గొప్ప గర్వం మరొకటి ఉండదు. ఇప్పుడు మళ్లీ ఆ అవకాశం వచ్చింది. అందుకు నేను చాలా సంతోషంగా ఉన్నాను’ అని భువీ భావోద్వేగంగా చెప్పాడు. భారత జట్టుకు దూరంగా ఉన్న సమయంలో భువనేశ్వర్ తన కెరీర్‌ను ఐపీఎల్ ద్వారా తిరిగి గాడిలో పెట్టుకున్నాడు. రాయల్ ఛాలెంజర్స్ బెంగళూరు (ఆర్‌సీబీ) తరఫున అద్భుతమైన ప్రదర్శన చేశాడు. ఐపీఎల్‌లో 31 మ్యాచ్‌లు ఆడి 45 వికెట్లు పడగొట్టాడు. 22.55 సగటు, 8.52 ఎకానమీతో రాణించాడు. అతడి ప్రదర్శన ఆర్‌సీబీకి 2025, 2026 సీజన్లలో వరుసగా రెండు టైటిళ్లు సాధించడంలో కీలకంగా నిలిచింది.

న్యూజిలాండ్‌తో జరిగిన తొలి టీ20లో భువనేశ్వర్ కుమార్ అంతర్జాతీయ క్రికెట్‌లోకి తిరిగి అడుగుపెట్టాడు. అయితే ఆ మ్యాచ్‌లో నాలుగు ఓవర్లు వేసి 49 పరుగులు ఇచ్చినప్పటికీ ఒక్క వికెట్ కూడా తీయలేకపోయాడు. భారీ స్కోరు నమోదైన ఈ మ్యాచ్‌లో భువీ ఆశించిన స్థాయిలో రాణించలేకపోయాడు. రెండో టీ20లో కూడా ఈ వెటరన్ పేసర్ నిరాశపరిచాడు. నాలుగు ఓవర్లలో ఏకంగా 50 రన్స్ ఇచ్చి ఒక వికెట్ పడగొట్టాడు. భువీ తిరిగి గాడిన పడాలని ఆయన ఫాన్స్ కోరుకుంటున్నారు.