Off The Record : విజయనగరం కూటమిలో రెబల్స్ చిచ్చు.. సీట్ల సర్దుబాటు బెడిసికొట్టిందా?

Off The Record : ఉమ్మడి విజ‌య‌న‌గ‌రం జిల్లాలో స్థానిక ఎన్నికల బరిలో కూటమి పార్టీల మధ్య సీట్ల సర్దుబాటుపై అసమ్మతి సెగలు రాజుకుంటున్నాయనే చర్చ జరుగుతోంది. టీడీపీ, జనసేన, బీజేపీ నేతలు తమకు కేటాయించిన స్థానాల్లో అభ్యర్థులను బరిలోకి దింపారు. బీఫారాల ప్రక్రియ కూడా పూర్తయింది. అయినప్పటికీ కొందరు ఆశావహులు వెనక్కి తగ్గకపోవడంతో పొత్తుల లెక్కలు తారుమారయ్యే పరిస్థితి కనిపిస్తోందనే ప్రచారం నడుస్తోంది. కూటమి అభ్యర్థులకు వ్యతిరేకంగా సొంత కూటమి నేతలే పోటీలో ఉండటంపై ఆయా పార్టీల్లో అభ్యంతరాలు వ్యక్తమవుతున్నాయని టాక్‌. రెబల్స్‌ వ్యవహారాన్ని అధిష్ఠానాల దృష్టికి తీసుకెళ్లినట్లుగా ప్రచారం సాగుతోంది. మరోవైపు స్థానిక నాయకత్వం రంగంలోకి దిగి బుజ్జగింపులు ప్రారంభించినా, కొందరు అభ్యర్థులు మాత్రం పోటీ నుంచి తప్పుకునేందుకు సుముఖంగా లేరన్న చర్చా జిల్లాలో నడుస్తోంది. నెల్లిమర్ల నగర పంచాయతీలో రెబల్స్‌ వ్యవహారం కూటమి నేతలకు తలనొప్పిగా మారిందనే టాక్‌ నడుస్తోంది. మొత్తం 23 వార్డులున్న ఈ నగర పంచాయతీలో జనసేనకు 10 వార్డులు కేటాయించినట్లు సమాచారం. అయితే జనసేన నాయకులు 15 వార్డుల్లో నామినేషన్లు దాఖలు చేయడం చర్చనీయాంశంగా మారింది. సీట్ల సర్దుబాటు, నామినేషన్ల సంఖ్య మధ్య తేడా కనిపిస్తుండటంతో స్థానిక రాజకీయాల్లో ఉత్కంఠ నెలకొంది.

ఇక చైర్మన్‌ స్థానం బీజేపీకి కేటాయించినట్లు ప్రచారం జరుగుతున్న తరుణంలో టీడీపీకి చెందిన లెంక అప్పలనాయుడు స్వతంత్ర అభ్యర్థిగా బరిలో ఉండటం మరో వివాదానికి దారితీసిందన్న చర్చ జరగుతోంది. కూటమి నిర్ణయానికి విరుద్ధంగా పోటీలో కొనసాగుతున్నారంటూ మండిపడుతున్నారట మిగిలిన పార్టీల నాయకులు. ఆయన వ్యవహారంపై పార్టీ వర్గాల్లో అభ్యంతరాలు వ్యక్తమవుతున్నట్లు సమాచారం. నెల్లిమర్లలో కూటమి నేతలు బుజ్జగింపులకు ప్రయత్నించినా ఫలితం కనిపించడం లేదన్న చర్చ నడుస్తోంది. నియోజకవర్గ ఇన్‌ఛార్జి సువ్వాడ రవిశేఖర్‌తో పాటు ఇతర స్థానిక నేతలు జోక్యం చేసుకున్నట్లుగా ప్రచారం జరిగింది. అయినప్పటికీ అప్పలనాయుడు పోటీ నుంచి తప్పుకోవడానికి అంగీకరించడం లేదన్న వార్తలు వినిపిస్తున్నాయి. దీంతో ఈ వివాదాన్ని పార్టీ అధిష్ఠానం ఎలా పరిష్కరిస్తుందన్నది ఆసక్తికరంగా మారింది.

మరోవైపు…సాలూరు మున్సిపాలిటీలోనూ పరిస్థితి భిన్నంగా ఏమీ లేదనే టాక్‌ వినిపిస్తోంది. మొత్తం 34 వార్డులున్న ఈ మున్సిపాలిటీలో చైర్మన్‌ పదవి కేటాయింపే రాజకీయ వివాదానికి కేంద్రబిందువుగా మారినట్లు కనిపిస్తోంది. తొలి నుంచి టీడీపీకి చెందిన హర్షవర్ధన్‌ చైర్మన్‌ రేసులో ఉన్నారని స్థానికంగా చర్చ జరిగింది. అయితే రిజర్వేషన్‌ మార్పుతో సమీకరణాలు మారిపోయాయనే ప్రచారం సాగుతోంది. రిజర్వేషన్‌ మారిన తరుణంలో హర్షవర్ధన్‌ తన భార్యను బరిలోకి దింపే ప్రయత్నం చేశారన్న ప్రచారం వినిపిస్తోంది. అయితే మున్సిపల్‌ చైర్మన్‌ స్థానం జనసేనకు కేటాయించడంతో ఆ పార్టీ అభ్యర్థి రంగంలోకి దిగారు. ఇదే సమయంలో హర్షవర్ధన్‌ భార్య స్వతంత్ర అభ్యర్థిగా పోటీలో ఉండటం వివాదానికి కారణమైంది. కూటమి సీట్ల సర్దుబాటు ప్రకారం జనసేనకు చైర్మన్‌ స్థానం దక్కినప్పుడు.. స్వతంత్ర అభ్యర్థిగా పోటీ కొనసాగించడం పొత్తు ధర్మానికి విరుద్ధమని జనసేన వర్గాలు అభ్యంతరం వ్యక్తం చేస్తున్నట్లు సమాచారం. ఈ వ్యవహారంపై పార్టీ అధిష్ఠానానికి ఫిర్యాదు చేసినట్లు ప్రచారం జరుగుతోంది. దీంతో సాలూరు మున్సిపాలిటీలోనూ రెబల్స్‌ రాజకీయంపై ఉత్కంఠ పెరిగింది. మంత్రి గుమ్మడి సంధ్యారాణి ఈ వివాదాన్ని సర్దుబాటు చేసే దిశగా ప్రయత్నిస్తున్నారన్న చర్చ స్థానికంగా వినిపిస్తోంది. అయితే ఆమె పాత్రపైనా భిన్నాభిప్రాయాలు వ్యక్తమవుతున్నట్లు ప్రచారం ఉంది.

మరోవైపు సాలూరులోని ఇతర వార్డుల్లోనూ అసమ్మతి అభ్యర్థులు పోటీలో ఉన్నారన్న సమాచారం కూటమి పార్టీలను కలవరపెడుతోంది. సాలూరు మున్సిపాలిటీలో చైర్మన్‌ పీఠం ఎవరికి దక్కుతుందన్న దానికంటే.. కూటమి నిర్ణయాన్ని నాయకులు ఎంతవరకు గౌరవిస్తారన్నదే ఇప్పుడు ప్రధాన చర్చగా మారిందట. ఒకవైపు అధికారిక అభ్యర్థులు.. మరోవైపు స్వతంత్రంగా బరిలోకి దిగిన ఆశావహులు.. ఈ పోటీ కూటమి ఓట్లను చీల్చే పరిస్థితి తీసుకొస్తుందా అన్న ఆందోళన వ్యక్తమవుతోంది. రెబల్స్‌ వ్యవహారంపై కూటమి పార్టీల అధిష్ఠానాలు ఎలా స్పందిస్తాయన్నది ఇప్పుడు కీలకంగా మారింది. పార్టీ నిర్ణయానికి వ్యతిరేకంగా పోటీ చేసే వారిపై క్రమశిక్షణ చర్యలు తీసుకునే అవకాశం ఉందన్న ప్రచారం సైతం సాగుతోంది. అవసరమైతే సస్పెన్షన్‌ వంటి చర్యలు కూడా ఉండవచ్చన్న చర్చ నడుస్తోంది. రెబల్స్‌ నామినేషన్లు ఉపసంహరించుకునేలా చేయడంలో స్థానిక నాయకత్వం విఫలమైతే నియోజకవర్గ ఇన్‌ఛార్జుల బాధ్యతపైనా చర్చ మొదలయ్యే అవకాశం ఉందని రాజకీయ వర్గాలు అంచనా వేస్తున్నాయి. అయితే ఇన్‌ఛార్జులపై చర్యలు తప్పవన్న ప్రచారానికి అధికారిక ధ్రువీకరణ ఏమీలేదు. పార్టీ నాయకత్వం చివరి వరకు బుజ్జగింపులకే ప్రాధాన్యం ఇస్తుందా.. లేక క్రమశిక్షణ విషయంలో కఠినంగా వ్యవహరిస్తుందా.. అన్నది చూడాల్సి ఉంది.