ఉన్నట్టుండి ఆ కాంగ్రెస్ ఎమ్మెల్యే సారా గురించి ఎందుకు మాట్లాడుతున్నారు? దాదాపుగా అందరూ మర్చిపోయి… ఎక్కడో అడపా దడపా దొంగతనంగా కూచుకునే సారాను అధికారికం చేయమని సదరు శాసనసభ్యుడు ఎందుకు అడుగుతున్నారు? అది సొంత పబ్లిసిటీ స్టంటా? లేక ఆయన మాటల వెనక మర్మం వేరే ఉందా? ఎవరా ఎమ్మెల్యే? ఏంటా సారా స్టోరీ? తెలంగాణలో సారాయిని తిరిగి తీసుకు రావాలి. అమ్మకాలు జరగాలంటూ జడ్చర్ల ఎమ్మెల్యే అనిరుధ్ రెడ్డి చేసిన వ్యాఖ్యలపై తీవ్ర స్థాయిలో చర్చ మొదలైంది. మళ్లీ సారా తయారీ గురించి చిట్చాట్లో ఆయన చేసిన వ్యాఖ్యలు కలకలం రేపుతున్నాయి. అసలు జరుగుతున్న మద్యం అమ్మకాలనే నియంత్రించాలన్న డిమాండ్ పెరుగుతుంటే… ఈయనేంటి ఎప్పుడో మర్చిపోయిన సారాను ఇప్పుడు మళ్లీ తయారు చేసి అమ్మమంటున్నారంటూ హాట్ హాట్గా మాట్లాడుకుంటున్నారు.
గతంలో ఉమ్మడి రాష్ట్రంలో… అదీ కూడా ఎప్పుడో పాత రోజుల్లో సారా ప్యాకెట్లు అమ్మే సిస్టమ్ ఉండేది. దాన్ని నిషేధించమంటూ సారా వ్యతిరేక ఉద్యమాలు సైతం జరిగాయి. కాలక్రమంలో అది పూర్తిగా కనుమరుగైంది. ఈ పరిస్థితుల్లో సడన్గా జడ్చర్ల ఎమ్మెల్యే అనిరుథ్రెడ్డి సారాయి ప్రతిపాదన చేయడం వెనకున్న మతలబేంటన్న చర్చలు నడుస్తున్నాయి. సొంత పార్టీ ఎమ్మెల్యేనే సర్కార్ ను ఇరకాటంలో పెట్టడానికి అలా మాట్లాడారా? లేక ఆయన మాటల అర్ధం వేరే ఉందా అని ఆరా తీస్తున్నారు చాలామంది. గతంలో కూడా అనిరుధ్రెడ్డి ప్రభుత్వానికి వ్యతిరేకంగా, సొంత పార్టీ నేతలు… మంత్రి మీద ఆరోపణలు చేసిన క్రమంలో అనుమానాలు పెరుగుతున్నాయి. అసెంబ్లీలో బాంబు పేల్చుతానని ఎమ్మెల్యే అనడం పెద్ద చర్చకే దారి తీసింది. ఐతే అనిరుధ్ కామెంట్స్ వెనక వేరే వ్యూహం ఉన్నట్టు చెబుతున్నారు ఆయన సన్నిహితులు. సహజంగానే తెలంగాణలో అటవీ సంపద ఎక్కువ. అలాంటి ఫారెస్ట్ ఏరియాల్లో గిరిజనుల ఆదాయంతో పాటు ప్రభుత్వ ఆదాయాన్ని కూడా పెంచే ప్లాన్లో భాగమే సారా తయారీ సూచన అన్నది ఎమ్మెల్యే సన్నిహితవర్గాల మాట. సాధారణంగా అటవీ ప్రాంతంలో విప్ప పువ్వు ఎక్కువగా దొరుకుతుంది. ఇందులో ఔషధ గుణాలు ఉంటాయి. విటమిన్ సి…కార్పోహైడ్రేట్స్ ఉన్నట్టు పలు పరిశోధనల్లో తేలింది. సరిగ్గా ఈ పాయింట్నే వెలుగులోకి తీసుకొస్తున్నారు ఎమ్మెల్యే. గిరిజన ప్రాంతాల్లో చాలామంది ఇప్పటికీ విప్ప పువ్వుతో సారా తయారు చేసుకుంటారు. దాన్నే స్ట్రీమ్ చేయాలన్నది అనిరుధ్రెడ్డి ఆలోచన అట.
విప్ప పువ్వుతో సారా తయారు చేసి ఎగుమతి చేయాలన్న ఆలోచనను ప్రభుత్వం ముందు పెట్టాలనుకుంటున్నారట ఆయన. అసెంబ్లీ వేదికగానే తన మనసులో ఉన్నదాన్ని చెప్పాలనుకుంటున్నారు. విప్ప పువ్వుపై ఆయన ఇప్పటికే అధ్యయనం చేసి 200 పేజీల నివేదిక కూడా సిద్ధం చేశారట. విదేశాలకు సంబంధించిన ఇద్దరు శాస్త్రవేత్తలతో చర్చించి ఔషధ గుణాలను నిర్ధారించుకున్నాకే…ఈ ఆలోచనకు వచ్చినట్టు తెలిసింది. దీన్ని ఎగుమతి చేసినా ఆదాయ వనరుగా మారుతుందన్నది జడ్చర్ల ఎమ్మెల్యే అభిప్రాయం. ఆల్రెడీ మధ్యప్రదేశ్, ఒడిశాల్లో అధికారికంగా దీన్ని తయారు చేస్తున్నారనేది ఆయన వర్షన్. అలాగే తెలంగాణలో కూడా ప్లాన్ చేస్తే… గిరిజనులకు పని కల్పించడంతో పాటు ప్రభుత్వానికి కూడా ఆదాయ వనరుగా ఉంటుందంటూ నివేదికను అసెంబ్లీలో పెట్టే ఆలోచనలో ఉన్నారట అనిరుధ్రెడ్డి. ఐతే ప్రభుత్వం దాన్ని ఎలా స్వీకరిస్తుందన్నది చూడాలి. విప్పపువ్వు వికసిస్తుందా? లేక అక్కడితో రాలిపోతుందా అన్నది చూడాలి
