అనంత విశ్వంలో మనకు జీవనాధారమైన సూర్యుడు ఇప్పుడు ఉగ్రరూపం దాల్చుతున్నాడు. శాస్త్రవేత్తలను సైతం నివ్వెరపరిచేలా సూర్యుడి ఉపరితలంపై కేవలం ఒక్క రోజులోనే 17 భారీ పేలుళ్లు సంభవించాయి. ఇవి సాధారణ పేలుళ్లు కావు, అత్యంత ప్రమాదకరమైన ‘ఎక్స్-క్లాస్’ రకానికి చెందిన సౌరజ్వాలలు. సూర్యుడిపై తాజాగా కనిపిస్తున్న AR4366 అనే భారీ మచ్చ (Sunspot) ఈ విధ్వంసానికి కేంద్ర బిందువుగా మారింది. ఈ మచ్చ ఎంత పెద్దదంటే, గతంలో భూమిని వణికించిన చారిత్రాత్మక ‘క్యారింగ్టన్ ఈవెంట్’ నాటి పరిస్థితులతో ఖగోళ శాస్త్రవేత్తలు దీనిని పోలుస్తున్నారు. ఈ భారీ పేలుళ్ల వల్ల వెలువడే అయస్కాంత మేఘాలు భూమి దిశగా వస్తే, మన కమ్యూనికేషన్ వ్యవస్థలు అస్తవ్యస్తం కావడం ఖాయంగా కనిపిస్తోంది.
సూర్యుడి అంతర్భాగంలో అయస్కాంత క్షేత్రాల మధ్య ఏర్పడే తీవ్రమైన ఒత్తిడి ఒక్కసారిగా విడుదలైనప్పుడు ఈ సౌరజ్వాలలు వెలువడుతాయి. ఫిబ్రవరి 1వ తేదీన చోటుచేసుకున్న భారీ పేలుడు ఇప్పటికే తన ప్రభావాన్ని చూపడం ప్రారంభించింది. దీని కారణంగా ఆస్ట్రేలియా , న్యూజిలాండ్ వంటి ప్రాంతాల్లో రేడియో సిగ్నల్స్ నిలిచిపోయి ‘రేడియో బ్లాక్అవుట్’ సంభవించింది. ఇది కేవలం ఆరంభం మాత్రమేనని, రాబోయే రోజుల్లో ఈ ప్రభావం మరింత తీవ్రంగా ఉండవచ్చని శాస్త్రవేత్తలు హెచ్చరిస్తున్నారు. ఒకవేళ ఈ సౌర తుఫానులు నేరుగా భూమిని తాకితే, రోదసీలో ఉన్న ఉపగ్రహాలు దెబ్బతినడమే కాకుండా, మనం నిత్యం వాడే జీపీఎస్ (GPS) సిగ్నల్స్ పూర్తిగా తప్పుదారి పట్టే ప్రమాదం ఉంది.
ఈ సౌర తుఫానుల ప్రభావం కేవలం సిగ్నల్స్ వరకే పరిమితం కాదు. వీటి వల్ల వెలువడే ‘కరోనల్ మాస్ ఈజెక్షన్’ (CME) అనే ప్లాస్మా మేఘాలు భూమి చుట్టూ ఉన్న మాగ్నెటోస్పియర్ను దెబ్బతీస్తాయి. దీనివల్ల పవర్ గ్రిడ్లలో ఒక్కసారిగా ఓవర్లోడ్ పెరిగిపోయి, భారీ ఎత్తున విద్యుత్ నిలిచిపోయే (Blackouts) అవకాశాలు ఉన్నాయి. 1859 నాటి క్యారింగ్టన్ ఘటనలో టెలిగ్రాఫ్ వైర్లకు మంటలు అంటుకున్న చరిత్ర ఉంది. నేటి ఆధునిక కాలంలో అటువంటి పరిస్థితి వస్తే ఇంటర్నెట్ నుండి బ్యాంకింగ్ వరకు ప్రతి డిజిటల్ వ్యవస్థ కుప్పకూలే ప్రమాదం ఉంది. అందుకే నాసా (NASA) , మన దేశపు ఇస్రో (ISRO) నిరంతరం సూర్యుడిపై ఒక కన్నేసి ఉంచాయి. సూర్యుడు తన 11 ఏళ్ల చక్రంలో అత్యంత చురుకైన ‘సోలార్ మాగ్జిమం’ దశకు చేరుకుంటున్న తరుణంలో మనం అత్యంత అప్రమత్తంగా ఉండాలని నిపుణులు సూచిస్తున్నారు.
Biker Release Date: శర్వా స్పీడ్ మామూలుగా లేదుగా! ‘బైకర్’ రిలీజ్ డేట్ లాక్..
