YS Sharmila: ఇందిరాపార్క్ వద్ద దీక్షకు బయలుదేరిన వైఎస్సార్టీపీ అధ్యక్షురాలు వైఎస్ షర్మిలను పోలీసులు అరెస్ట్ చేశారు. లోటస్ పాండ్ నుంచి బయటకు వస్తున్న క్రమంలో షర్మిలను పోలీసులు అడ్డుకున్నారు. ఈ నేపథ్యంలో ఆమె పోలీసులతో వాగ్వాదానికి దిగింది. సొంత పనులకు కూడా బయటకు రాకుండా అడ్డుకుంటారా? తనను హౌస్ అరెస్ట్ చేయడానికి పోలీసులకు ఏమి అధికారం ఉందని షర్మిల పోలీసులను ప్రశ్నించారు. ఆమెను ఇంట్లో నుంచి బయటకు రాకుండా పోలీసులు అడ్డుకుంటున్న క్రమంలో వారిని షర్మిల తోసేసి మరి బయటకు వచ్చారు. ఇంటి నుంచి బయటకు వచ్చిన షర్మిలను అడ్డుకోగా.. ఆమె ఓ ఎస్సై, మహిళా కానిస్టేబుల్తో దురుసుగా ప్రవర్తించింది. ఓ ఎస్సైపై చేయి చేసుకోగా.. మాపై ఎందుకు చేయి వేస్తున్నారని ఎస్సై షర్మిలను ప్రశ్నించారు. నిరుద్యోగ ధర్నాకు వెళ్తున్న షర్మిలను పోలీసులు అడ్డుకోవడంతో ఆమె దురుసుగా ప్రవర్తించారు. ఇందుకు సంబంధించిన వీడియోల్లో ఈ విషయం అర్ధమవుతుంది. చివరకు షర్మిలను మహిళా పోలీసులు బలవంతంగా అరెస్ట్ చేసి పోలీస్ స్టేషన్ కు తరలించారు.
Read Also:Bhatti Vikramarka: మత కల్లోలం సృష్టించేందుకే బీజేపీ కుట్రలు
వైఎస్ షర్మిల తీరుతో పోలీసులు చుక్కలు చూశారు. అడ్డుకుంటున్న మహిళా కానిస్టేబుళ్లను నెట్టేయడం చేయగా.. పురుషులను ప్రశ్నిస్తూ వచ్చారు. అలా నడుచుకుంటూ వస్తున్న ఆమె తన కాన్వాయ్ ఎక్కే ప్రయత్నం చేశారు. దీనితో అక్కడి పోలీసులు ఆమె కారును అడ్డుకున్నారు. దీనితో ఆమె దిగగా పోలీస్ వాహనంలోకి ఎక్కించేందుకు చూశారు. కానీ అక్కడే ఉన్న ఓ ఎస్సైపై కూడా షర్మిల చేయి చేసుకున్నారు. దీనితో ఆ ఎస్సై తిరిగి ప్రశ్నించగా ఆమె కూడా అంతే ఆగ్రహానికి గురయ్యారు. ఇదిలా ఉండగా.. పోలీసులపై చేయి చేసుకున్న వైఎస్ షర్మిలపై బంజారాహిల్స్ పోలీసులు కేసు నమోదు చేశారు. షర్మిలపై బంజారాహిల్స్ పోలీస్ స్టేషన్లో ఐపీసీ 353, 330 కింద కేసు నమోదు చేసినట్టు తెలుస్తుంది. ప్రస్తుతం షర్మిల అదే పీఎస్లో ఉండగా..ఆమె తల్లి విజయమ్మ స్టేషన్కు బయలుదేరినట్టు తెలుస్తోంది. ప్రస్తుతం స్టేషన్ వద్దకు భారీగా కార్యకర్తలు చేరుకుంటున్నారు.
కాగా రాష్ట్రంలో నిరుద్యోగుల సమస్యలపై వైఎస్ షర్మిల ఇతర పార్టీ నాయకులతో కలిసి బీఆర్ఎస్పై పోరాడడానికి కంకణం కట్టుకున్నారు. ఈ మేరకు నిరుద్యోగ దీక్షకు పూనుకున్నారు. కానీ పోలీసులు ఆమె దీక్షకు అనుమతి నిరాకరించగా హైకోర్టును ఆశ్రయించారు. హైకోర్టు షరతులతో కూడిన దీక్షకు అనుమతి ఇచ్చింది. ఈ క్రమంలో షర్మిల సోమవారం నిరుద్యోగ దీక్షకు వెళ్తుండగా పోలీసులు అడ్డుకోవడంతో వారి పట్ల దురుసుగా ప్రవర్తించినట్లు సమాచారం.
