Washing Machine Tips: వాషింగ్ మెషీన్‌లో ఈ 2 పదార్థాలు కలిపితే చాలు.. మీ బట్టలు కొత్తవాటిలా మెరిసిపోతాయి..!

Washing Machine Tips: ఉరుకులు, పరుగుల జీవితంలో బట్టలు ఉతకడం కూడా పెద్ద టాస్క్‌ గా మారిపోయింది.. చాలా మంది చేతితో బట్టలు ఉతకడం మానేసి వాషింగ్ మెషీన్లపై ఆధారపడుతున్నారు. ఖరీదైన లిక్విడ్ డిటర్జెంట్లు, ఆధునిక వాషింగ్ మెషీన్లు ఉపయోగించినప్పటికీ, చాలాసార్లు బట్టలపై మరకలు అలాగే ఉండిపోవడం, చెమట వాసన పోకపోవడం, బట్టలు కాంతిహీనంగా కనిపించడం వంటి సమస్యలు ఎదురవుతుంటాయి. అయితే, ఇంట్లో సులభంగా దొరికే రెండు సాధారణ పదార్థాలను డిటర్జెంట్‌తో కలిపి ఉపయోగిస్తే, మీ బట్టలు మరింత శుభ్రంగా, సువాసనగా, కొత్తవాటిలా మెరిసేలా మారతాయి. ముఖ్యంగా వేసవికాలంలో చెమట వాసన తొలగించడంలో ఇవి చాలా ఉపయోగకరంగా పనిచేస్తాయి.

బేకింగ్ సోడా – బట్టలకు కొత్త మెరుపు
బేకింగ్ సోడా వంటింట్లో మాత్రమే కాకుండా బట్టల శుభ్రతలో కూడా ఎంతో ప్రభావవంతంగా పనిచేస్తుంది. ఇది బట్టలపై ఉన్న మురికి, చెమట వాసన, తేలికపాటి మరకలను తొలగించడంలో సహాయపడుతుంది. ముఖ్యంగా తెల్లని బట్టలకు ప్రకాశం తీసుకురావడంలో బేకింగ్ సోడా చాలా బాగా పనిచేస్తుంది. డిటర్జెంట్‌తో కలిపి ఉపయోగిస్తే, డిటర్జెంట్ పనితీరు మరింత మెరుగై బట్టలు లోతుగా శుభ్రపడతాయి. అయితే, ముందుగా బట్టలను వాషింగ్ మెషీన్‌లో వేయాలి. ఆ తర్వాత లిక్విడ్ డిటర్జెంట్‌లో 1 నుంచి 2 టీస్పూన్ల బేకింగ్ సోడా కలపాలి. అనంతరం సాధారణంగా మెషీన్‌ను రన్ చేస్తే సరిపోతుంది.

తెల్ల వెనిగర్ – దుర్వాసనకు చెక్
తెల్ల వెనిగర్ బట్టలలోని చెమట వాసనను తగ్గించడంలో, బట్టలను మృదువుగా మార్చడంలో ఎంతో సహాయపడుతుంది. అలాగే బట్టలపై పేరుకుపోయిన డిటర్జెంట్ అవశేషాలను తొలగించి, బట్టలను తాజాగా ఉంచుతుంది. లేత రంగు బట్టలకు తిరిగి మెరుపు తీసుకురావడంలో కూడా ఇది ఉపయోగపడుతుంది. అయితే, వెనిగర్‌ను డిటర్జెంట్‌తో నేరుగా కలపకూడదు. దానిని వాషింగ్ మెషీన్‌లోని రిన్స్ లేదా ఫ్యాబ్రిక్ సాఫ్ట్‌నర్ విభాగంలో పోయాలి. అర కప్పు తెల్ల వెనిగర్ సరిపోతుంది. ఆ తర్వాత సాధారణ విధానంలో వాషింగ్ చేయాలి.

పాత బట్టలు కూడా కొత్తవాటిలా కనిపిస్తాయి
లిక్విడ్ డిటర్జెంట్‌తో పాటు బేకింగ్ సోడా, తెల్ల వెనిగర్‌ను సరైన మోతాదులో ఉపయోగిస్తే బట్టలు మరింత శుభ్రంగా అవుతాయి. మొండి మరకలు తగ్గి, బట్టలు ఎక్కువకాలం తాజాగా కనిపిస్తాయి. ముఖ్యంగా స్కూల్ యూనిఫాంలు, తెల్ల బట్టలు, రోజువారీ దుస్తుల కోసం ఈ చిట్కా ఎంతో ఉపయోగకరంగా ఉంటుంది. అయితే వెనిగర్ లేదా డిటర్జెంట్‌ను ఎక్కువ మోతాదులో ఉపయోగించకూడదు. అధికంగా వాడితే బట్టల నాణ్యత దెబ్బతినే అవకాశం ఉంటుంది.