Vishnu Manchu: హీరోయిన్ రిచా చద్దా పై బాధను వ్యక్తం చేస్తున్న సినీ ఇండస్ట్రీ

Vishnu Manchu: కొన్ని సార్లు తెలియక చేస్తారో లేక తెలిసి చేస్తారో కానీ వారు చేసే చిన్న పొరపాట్లు తీవ్ర విమర్శలకు దారి తీస్తాయి. అది సెలబ్రిటీలే అయితే ఈ మధ్య కాలంలో వారిని సోషల్ మీడియాలో ఏకి పారేస్తుంటారు నెటిజన్స్. అలాంటిదే చేసి నటి రిచా చద్దా చిక్కుల్లో పడ్డారు. ఇటీవల ఆమె చేసిన ట్వీట్ వివాదాస్పదమైంది. ‘పాకిస్థాన్‌ ఆక్రమిత కశ్మీర్‌లోని కొన్ని ప్రాంతాలను తిరిగి స్వాధీనం చేసుకునే విషయంలో ప్రభుత్వం నుంచి వచ్చే ఏ ఆదేశానికైనా సైన్యం ఎల్లప్పుడూ సిద్ధంగా ఉంటుంది. పాక్‌ను ఉద్దేశించి గట్టి సమాధానం ఇస్తామని నార్తర్న్‌ ఆర్మీ కమాండర్ లెఫ్టినెంట్‌ జనరల్‌ ఉపేంద్ర ద్వివేది అన్నట్లు ఓ నెటిజన్‌ ట్వీట్‌ చేశారు. ఆ ట్వీట్‌ను కోట్‌ చేస్తూ రిచా చద్దా గల్వాన్ సేస్ హాయ్ అంటూ రీట్వీట్‌ చేశారు. ఆమె ఉద్దేశం ఏంటో తెలియడం లేదు గానీ, ఆమె ట్వీట్‌లో వాడిన గల్వాన్‌ పదం ఇప్పుడు తీవ్ర విమర్శలకు దారితీసింది.

Read Also: BJP: శ్రద్ధా వాకర్ హత్యపై ఉద్ధవ్ ఠాక్రే ఎందుకు మౌనంగా ఉంటున్నారు..?

బాలీవుడ్‌ నటి రిచా చద్దా గల్వాన్ సేస్ హాయ్ అని ఆమె రాయడంతో నెటిజన్ల నుంచి తీవ్ర స్థాయిలో ఆగ్రహం వ్యక్తమైంది. ఆ వివాదాస్పద ట్వీట్‌పై పలువురు ప్రముఖులూ స్పందించారు. ఆమె చేసిన ట్వీట్‌ స్క్రీన్‌ షాట్‌ను మంచు విష్ణు పోస్ట్‌ చేస్తూ.. ‘‘ఆమెకు ఏమైంది… అసలు ఈ విధంగా ఎలా ఆలోచించగలరు.. సైనికులను మనం గౌరవించాలి. కృతజ్ఞతాభావం లేని వారిని చూస్తుంటే బాధగా ఉందని ట్వీట్‌ చేశారు. ‘‘ఈ పోస్ట్‌ చూస్తుంటే బాధగా ఉంది. ఏ అంశమూ.. సాయుధ దళాల పట్ల మనల్ని కృతజ్ఞత లేనివారిగా మార్చకూడదు’’ అని అక్షయ్‌ కుమార్‌ పేర్కొన్నారు. గల్వాన్‌ లోయలో ప్రాణాలు కోల్పోయిన వారిని రిచా అవమానించారన్న బాలీవుడ్‌ నిర్మాత అశోక్‌ పండిట్‌ ఆమెపై చర్యలు తీసుకోవాలంటూ జూహు పోలీస్‌ స్టేషన్‌లో ఫిర్యాదు చేశారు. ఈ క్రమంలో ఆమె.. ‘ఎవర్నీ బాధించాలన్నది నా ఉద్దేశం కాదు. ఎవరినైనా బాధపెట్టి ఉంటే క్షమించండి’ అంటూ మరో పోస్ట్‌ పెట్టారు. తన తాత కూడా సైన్యంలో పనిచేశారన్న ఆమె.. చైనాతో యుద్ధంలో దేశం కోసం పోరాడినట్టు తెలిపారు.