Virat Kohli Record: టీమిండియా స్టార్ బ్యాటర్, రికార్డుల రారాజు విరాట్ కోహ్లీ మరో అరుదైన ఘనత సాధించాడు. న్యూజిలాండ్‌తో జరిగిన రెండో వన్డేలో కేవలం 7 పరుగులకే ఔటైనప్పటికీ.. ఓ చరిత్ర సృష్టించాడు. వన్డే క్రికెట్‌లో న్యూజిలాండ్‌పై అత్యధిక పరుగులు చేసిన ఆటగాడిగా నిలిచాడు. ఈ క్రమంలో ఆస్ట్రేలియా దిగ్గజ క్రికెటర్ రికీ పాంటింగ్ రికార్డును అధిగమించాడు. వెల్లింగ్టన్ వేదికగా శనివారం జరిగిన రెండో వన్డేలో కోహ్లీ 7 బంతులు ఎదుర్కొని ఒక ఫోర్ సాయంతో 7 పరుగులు మాత్రమే చేసి పేసర్ జాకబ్ డఫీ బౌలింగ్‌లో కవర్స్‌లో విల్ యంగ్‌కు క్యాచ్ ఇచ్చి పెవిలియన్ చేరాడు. అయితే ఈ ఇన్నింగ్స్‌లోనే ఒక పరుగు చేయడంతో పాంటింగ్ పేరిట ఉన్న రికార్డును బద్దలు కొట్టాడు.
న్యూజిలాండ్‌పై ఇప్పటివరకు 38 వన్డేలు ఆడిన కోహ్లీ 56.51 సగటుతో 1,978 పరుగులు సాధించాడు. ఇందులో ఏడు సెంచరీలు, 11 హాఫ్ సెంచరీలు ఉన్నాయి. 2010లో న్యూజిలాండ్‌పై తన తొలి వన్డే ఆడిన కోహ్లీ.. ఇప్పుడు ఆ జట్టుపై అత్యధిక పరుగులు చేసిన బ్యాటర్‌గా నిలిచాడు. ఇప్పటివరకు ఈ రికార్డు ఆస్ట్రేలియా మాజీ కెప్టెన్ రికీ పాంటింగ్ పేరిట ఉండేది. ఆయన న్యూజిలాండ్‌పై 51 వన్డేల్లో 45.83 సగటుతో 1,971 పరుగులు చేశాడు. ఇందులో ఆరు సెంచరీలు, 12 అర్ధ సెంచరీలు ఉన్నాయి. తొలి వన్డేలో 74 పరుగులు చేసిన కోహ్లీ.. పాంటింగ్ రికార్డును సమం చేయగా, రెండో వన్డేలో ఒక పరుగు సాధించడంతో అతడిని అధిగమించాడు.
ఇక రెండో వన్డేలో 135 పరుగుల లక్ష్యంతో బరిలోకి దిగిన భారత్‌కు ఆరంభంలోనే ఎదురుదెబ్బలు తగిలాయి. కెప్టెన్ శుభ్‌మన్ గిల్ గోల్డెన్ డక్‌గా వెనుదిరిగాడు. రోహిత్ శర్మ 28 బంతుల్లో రెండు ఫోర్లు, ఒక సిక్సర్‌తో 23 పరుగులు చేసి ఔటయ్యాడు. కోహ్లీ కూడా ఎక్కువసేపు క్రీజులో నిలవలేకపోయినా.. తన పేరిట అరుదైన రికార్డును లిఖించుకున్నాడు. న్యూజిలాండ్‌పై వన్డేల్లో అత్యధిక పరుగులు చేసిన ఆటగాళ్ల జాబితాలో విరాట్ కోహ్లీ అగ్రస్థానంలో ఉండగా.. ఈ జాబితాలో దిగ్గజ క్రికెటర్ సచిన్ టెండూల్కర్ మూడో స్థానంలో ఉన్నాడు.
న్యూజిలాండ్‌పై అత్యధిక వన్డే పరుగులు చేసిన ఆటగాళ్లు:
1. విరాట్ కోహ్లీ – 1,978 పరుగులు.
2. రికీ పాంటింగ్ – 1,971 పరుగులు.
3. సచిన్ టెండూల్కర్ – 1,750 పరుగులు.
4. కుమార సంగక్కర – 1,568 పరుగులు.
5. సనత్ జయసూర్య – 1,519 పరుగులు.
6. జాక్వెస్ కలిస్ – 1,449 పరుగులు.