US News: అమెరికాలో హిందూ దేవాలయంపై దాడికి కుట్ర.. 19 ఏళ్ల యువకుడి అరెస్ట్..!

US News: అమెరికాలో హిందూ దేవాలయాన్ని లక్ష్యంగా చేసుకుని సామూహిక కాల్పులకు పాల్పడాలని కుట్ర పన్నిన ఘటన వెలుగులోకి వచ్చింది. ఇల్లినాయిస్‌లోని పలైటైన్‌లో నివసించే 19 ఏళ్ల అలెగ్జాండ్రోస్ పాపోరాకిస్ అనే యువకుడిని ఈ కేసుకు సంబంధించి పోలీసులు అరెస్ట్ చేశారు. నవరాత్రి ఉత్సవాల సమయంలో ఆరోరా ప్రాంతంలోని ఏదైనా ఒక హిందూ ధార్మిక కేంద్రాన్ని అతడు టార్గెట్ చేయాలని ప్రణాళిక వేసినట్లు పోలీసులు అనుమానిస్తున్నారు. ఈ నేపథ్యంలోనే అతడిపై ఉగ్రవాద బెదిరింపులకు పాల్పడినట్లు అభియోగాలు నమోదయ్యాయి. ఏ దేవాలయంపై దాడి చేయాలనే దానిపై ఇంకా స్పష్టత రాలేదని పోలీసులు తెలిపారు. పలైటైన్ పోలీసుల సమాచారం ప్రకారం.. అక్టోబర్ 11న మౌంట్ ప్రాస్పెక్ట్ పోలీసుల నుంచి సామూహిక కాల్పులకు సంబంధించిన సమాచారం అందింది. పాపోరాకిస్ నుంచి తనకు కొన్ని ఆందోళనకరమైన ఎలక్ట్రానిక్ సందేశాలు అందాయని ఒక వ్యక్తి పోలీసులకు ఫిర్యాదు చేశాడు. ఈ విచారణలో భాగంగా నిందితుడు సామూహిక కాల్పుల పథకానికి సంబంధించిన ఒక పత్రంతో పాటు రైఫిల్, తూటాల గూళ్లు, బాడీ ఆర్మర్ తదితర ఆయుధాలు, వ్యూహాత్మక పరికరాల చిత్రాలను పంచుకున్నట్లు తేలింది.

ఈ సమాచారం అందిన వెంటనే పలైటైన్, మౌంట్ ప్రాస్పెక్ట్ పోలీసులు సంయుక్తంగా రంగంలోకి దిగారు. అక్టోబర్ 11 సాయంత్రం నిందితుడు తన ఇంట్లో నుంచి బయటకు వస్తుండగా అదుపులోకి తీసుకున్నారు. ఆ తర్వాత అతడి నివాసంలో సోదాలు నిర్వహించగా ఒక రైఫిల్, నిండిన అనేక తూటాల గూళ్లు, వందలాది తూటాలు, వ్యూహాత్మక పరికరాలు, బాడీ ఆర్మర్ వెస్ట్ లభించాయి. ఆ వెస్ట్ మీద శ్వేతజాతీయ ఆధిపత్య తీవ్రవాదానికి సంబంధించిన గుర్తుతో ఉన్న ప్యాచ్ కూడా దొరికింది. ఈ విచారణ సమయంలో నిందితుడు రాసిన ఒక పత్రం పోలీసులకు లభించింది. ‘నేను ఎందుకు పోరాడాను: ఆరోరా షూటర్ ప్రకటన పత్రం’ అనే శీర్షికతో ఉన్న ఆ పత్రంలో శ్వేతజాతీయ ఆధిపత్య, తీవ్రవాద భావజాలంతో పాటు దక్షిణాసియా మూలాలున్న వ్యక్తులు, ముఖ్యంగా భారతీయులపై హింసకు పాల్పడాలనే ఉద్దేశం ఉన్నట్లు వెల్లడైంది. ఈ కేసు దర్యాప్తులో ఫెడరల్ బ్యూరో ఆఫ్ ఇన్వెస్టిగేషన్ (ఎఫ్‌బీఐ) షికాగో కార్యాలయం కూడా భాగస్వామ్యమైంది. ఉగ్రవాద హెచ్చరికల జారీ, నిర్ణీత పరిమితి కంటే తక్కువ పొడవున్న బ్యారెల్ కలిగిన రైఫిల్‌ను కలిగి ఉండటం వంటి అభియోగాలను పోలీసులు నిందితుడిపై మోపారు. అక్టోబర్ 14న జరిగిన విచారణ అనంతరం కోర్టు అతడిని కస్టడీలో ఉంచాలని ఆదేశాలు జారీ చేసింది. ఈ కేసులో తదుపరి విచారణ అక్టోబర్ 30కి ఖరారైంది.