Triumph Bikes: భారత్‌లో విడుదలైన బజాజ్‌ ట్రయంఫ్‌ బైక్స్‌.. ధరెంతో తెలుసా?

Triumph Bikes: దాదాపు ఆరు సంవత్సరాల క్రితం, ఆగస్టు 2017లో దిగ్గజ బ్రిటీష్ మోటార్‌సైకిల్ తయారీదారు ట్రయంఫ్, అభివృద్ధి చెందుతున్న మార్కెట్‌ల కోసం చిన్న నుంచి మధ్య స్థాయి సామర్థ్యం గల మోటార్‌సైకిళ్లను రూపొందించడానికి భారతీయ ద్విచక్ర వాహన దిగ్గజం బజాజ్‌తో జతకట్టింది. నేడు ఈ జాయింట్ వెంచర్ మొదటి రెండు ఉత్పత్తులు ట్రయంఫ్ స్పీడ్ 400, ట్రయంఫ్ స్క్రాంబ్లర్ 400X భారతదేశంలో ప్రారంభించబడ్డాయి. ట్రయంఫ్ బజాజ్‌ భాగస్వామ్యంతో భారతదేశంలో తన వ్యాపారాన్ని నిర్వహిస్తోంది. ట్రయంఫ్ రూపొందించిన బైకులను బజాజ్ భారతదేశంలో తయారు చేసి విక్రయించనుంది. ట్రయంఫ్ స్పీడ్ 400 జూలై ద్వితీయార్థంలో వినియోగదారులకు అందుబాటులోకి వస్తుంది. ట్రయంఫ్ స్క్రాంబ్లర్ 400 X అక్టోబర్‌లో విక్రయంలోకి రానుంది.

ధరెంతంటే..
ఈ బైక్‌ల ధర విషయానికి వస్తే.. ప్రస్తుతం స్పీడ్ 400 బైక్ ధర మాత్రమే ప్రకటించారు. రూ. 2.33 లక్షల ధరతో ఈ బైక్‌ను విడుదల చేశారు. ఈ బైక్‌ను కొనుగోలు చేసిన మొదటి 10,000 మంది వినియోగదారులకు మాత్రమే రూ.2.23 లక్షల ధరకు విక్రయానికి అందుబాటులో ఉంది. స్క్రాంబ్లర్ 400 ఎక్స్ బైక్ ధరను తర్వాత వెల్లడించనున్నారు. ఈ రెండు ట్రయంఫ్ బైక్‌లు రాయల్ ఎన్‌ఫీల్డ్, ఇటీవల ప్రకటించిన హార్లీ డేవిడ్‌సన్ బైక్‌లతో మార్కెట్లో పోటీపడనున్నాయి.

మైలేజ్‌ ఎంతంటే.. 

గతంలో, హార్లీ డేవిడ్‌సన్‌ భారత్‌కు హార్లీ డేవిడ్‌సన్ బైక్‌లను తీసుకురావడానికి ఇదే విధమైన ఒప్పందంతో హీరో మోటార్‌సైకిల్స్‌తో భాగస్వామ్యం కుదుర్చుకుంది. ఈ నేపథ్యంలో బజాజ్ భారతదేశంలో ట్రయంఫ్ బైక్‌లను విక్రయిస్తోంది. ఇప్పుడు ఈ రెండు కంపెనీల మధ్య గట్టి పోటీ నెలకొంది. ట్రయంఫ్ స్పీడ్ 400, ట్రయంఫ్ స్క్రాంబ్లర్ 400 X జూన్ 27న ప్రపంచవ్యాప్తంగా పరిచయం అయ్యాయి. ట్రయంఫ్ స్క్రాంబ్లర్ 400 X, స్పీడ్ 400 రెండూ సరికొత్త ‘TR’ సిరీస్ సింగిల్-సిలిండర్ ఇంజిన్‌తో రూపొందించబడ్డాయి. కొత్త ఫోర్-వాల్వ్, DOHC, 398.15cc సింగిల్ ఆయిల్ కూలింగ్, ఫ్యూయల్ ఇంజెక్షన్‌ను కలిగి ఉన్నాయి. అంతే కాకుండా 6-స్పీడ్ గేర్‌బాక్స్‌తో జత చేయబడి ఉన్నాయి. ట్రయంఫ్ క్లెయిమ్ చేసిన ఇంధన సామర్థ్యం గాలన్‌కు 80 మైళ్లు లేదా లీటరుకు 28 కిలోమీటర్లు.

ఫీచర్లు ఇవే.. 

స్పీడ్ 400, స్క్రాంబ్లర్ 400 X కొత్త ఇంజిన్ 8,000 RPM వద్ద 40 PS గరిష్ట శక్తిని, 6,500 RPM వద్ద 37.5 NM గరిష్ట టార్క్‌ను విడుదల చేస్తుంది. ఇంజిన్ స్టెయిన్‌లెస్ స్టీల్ హెడర్, సైలెన్సర్ సెటప్‌ను కలిగి ఉంది. రెండు బైక్‌లు స్లిప్పర్ క్లచ్‌తో వస్తాయి. ఈ రెండు బైక్‌లు ట్రయంఫ్ స్పీడ్ 900, స్క్రాంబ్లర్ 900/1200 ఆధారంగా రూపొందించబడ్డాయి. దాదాపు రెండింటినీ ఒకేలా కనిపించేలా డిజైన్ చేశారు. రెండు బైక్‌లలో అనేక సాధారణ ఫీచర్లు ఉన్నాయి. UST ఫోర్కులు, వెనుక మోనోషాక్ సస్పెన్షన్, 2-వీల్ డిస్క్ బ్రేక్‌లు, డ్యూయల్-ఛానల్ ABS, LED లైటింగ్, ట్రాక్షన్ కంట్రోల్, సెమీ-డిజిటల్ ఇన్‌స్ట్రుమెంట్ డిస్‌ప్లే, అల్లాయ్ వీల్స్‌తో కూడిన ట్యూబ్‌లెస్ టైర్లు, 790ఎంఎం సీట్ ఎత్తును కలిగి ఉన్నాయి.

రెండు బైక్‌లు కొన్ని విభిన్నమైన ఫీచర్లను కలిగి ఉన్నాయి. బ్రేక్‌ల విషయానికొస్తే, స్క్రాంబ్లర్ 400X బైక్‌కు 320 మిమీ డిస్క్ బ్రేక్‌ను కలిగి ఉంది. స్పీడ్ 400 బైక్‌కు 300 ఎంఎం డిస్క్ బ్రేక్‌తో వస్తుంది. బరువు విషయానికి వస్తే స్క్రాంబ్లర్ బైక్ బరువు 179 కిలోలు కాగా, స్పీడ్ 400 బైక్ బరువు 170 కిలోలుగా ఉంది. భారతీయ వెర్షన్ బైక్‌లో నంబర్ ప్లేట్, సైడ్‌కార్, గ్రాబ్ హ్యాండిల్స్ అందించబడ్డాయి. ఈ బైక్‌లకి సంబంధించిన వారంటీ విషయానికి వస్తే, ఇది 16 వేల కి.మీ సర్వీస్ ఇంటర్వెల్‌తో 2 సంవత్సరాల అపరిమిత వారంటీతో వస్తుంది. ఈ మధ్యలో ఏదైనా సమస్య ఎదురైనా ట్రయంఫ్ ద్వారా పరిష్కరించబడుతుంది.

అందుబాటులోకి ఎప్పుడు వస్తాయంటే..

ఈ రెండు బైక్‌లలో, స్పీడ్ 400 బైక్ ఈ నెల మధ్యలో షోరూమ్‌లలోకి రానుంది, స్క్రాంబ్లర్ 400 X బైక్‌ అక్టోబర్‌లో వినియోగదారులకు అందుబాటులోకి రానుంది. ప్రస్తుతం, బజాజ్ కంపెనీ నెలకు 5 వేల బైక్‌లను ఉత్పత్తి చేయగల సామర్థ్యాన్ని కలిగి ఉన్నట్లు సమాచారం. ఇప్పటికే ఈ బైక్‌ల బుకింగ్ ప్రారంభం కావడంతో చాలా మంది రూ.2 వేలు చెల్లించి ఈ బైక్‌లను బుక్ చేసుకుంటున్నారు. స్పీడ్ 400 బైక్ డెలివరీ ఈ నెల మధ్యలో ప్రారంభమవుతుందని, అక్టోబర్‌లో స్క్రాంబ్లర్ 400 ఎక్స్ బైక్ డెలివరీ ఉంటుందని సమాచారం.

ఈ రెండు మోటార్‌సైకిళ్లతో, భారతదేశంలో రాయల్ ఎన్‌ఫీల్డ్ అమ్మకాల గణాంకాలను ట్రయంఫ్ లక్ష్యంగా చేసుకుంది. రాయల్ ఎన్‌ఫీల్డ్ 350 cc మోటార్‌సైకిళ్లు దేశంలో అత్యధికంగా అమ్ముడవుతున్న మిడ్-కెపాసిటీ బైక్‌లు, సరసమైన మార్జిన్‌తో ఉన్నాయి. బేబీ ట్రయంఫ్‌లు నిన్ననే విడుదల చేసిన హార్లే డేవిడ్‌సన్ X440, KTM 390 సిరీస్ (డ్యూక్ మరియు అడ్వెంచర్), BMW G310 మరియు G310GS మరియు పూర్తిగా కొత్త ప్లాట్‌ఫారమ్‌పై నిర్మించిన రాయల్ ఎన్‌ఫీల్డ్ హిమాలయన్ 450 నుండి గట్టి పోటీని ఎదుర్కోవలసి ఉంటుంది.