టాలీవుడ్ ప్రముఖ నటుడు సుబ్బరాజు సంతోష్ వివాహ బంధంలోకి అడుగుపెట్టారు. ఈ విషయాన్ని స్వయంగా సోషల్‌ మీడియా ద్వారా ఆయనే వెల్లడించారు. ఇన్‌స్టాగ్రామ్‌లో ఓ పోస్ట్ చేసి.. పెళ్లి ఫోటోను షేర్ చేశారు. సుబ్బరాజు తన పెళ్లి గురించి ఎలాంటి హడావుడి చేయకుండా.. సైలెంట్‌గా కానిచ్చేరు.పెళ్లి ఫోటోను ఇన్‌స్టాగ్రామ్‌ ద్వారా షేర్ చేయడంతో అందరూ షాక్ అయ్యారు. అదే సమయంలో శుభాకాంక్షలు చెబుతున్నారు. ప్రస్తుతం సుబ్బరాజు పెళ్లి ఫొటోలు నెట్టింట వైరల్ అవుతున్నాయి.
ఎన్నో సార్లు ఇంటర్వ్యూల్లో పెళ్లి గురించి ప్రస్తావన వచ్చినప్పుడు ఆసక్తి లేదు అని సుబ్బరాజు చెప్పిన విషయం తెలిసిందే. ఎట్టకేలకు 47 ఏళ్ల వయసులో పెళ్లి పీటలు ఎక్కారు. ప్రముఖ కమెడియన్ వెన్నెల కిషోర్‌తో పాటు పలువురు ప్రముఖులు నూతన జంటకు శుభాకాంక్షలు తెలియజేశారు. సుబ్బరాజు సతీమణి గురించి డీటెయిల్స్ ఇంకా తెలియరాలేదు. భీమవరంలో పుట్టి పెరిగిన సుబ్బరాజు అనుకోకుండా ఇండస్ట్రీలోకి వచ్చారు. డైరెక్టర్ కృష్ణవంశీ కంప్యూటర్ బాగు చేసేందుకు వచ్చిన సుబ్బరాజు.. అనుకోకుండా సినీ అవకాశం దక్కించుకున్నారు. ఖడ్గం సినిమాలో ఒక చిన్న పాత్రతో ఇండస్ట్రీలోకి ఎంట్రీ ఇచ్చారు.
అమ్మా నాన్న ఓ తమిళ అమ్మాయి సినిమాలో నటించిన సుబ్బరాజుకు మంచి గుర్తింపు దక్కింది. పూరి జగన్నాధ్‌ సినిమాలలో వరుసగా నటిస్తూ.. పాపులర్ అయ్యారు. తక్కువ సమయంలోనే మంచి పాత్రల్లో నటించి స్టార్‌ అయ్యారు. క్యారెక్టర్ ఆర్టిస్టుగా, విలన్‌గా, కమెడియన్‌గా.. అన్ని పాత్రల్లో అలరించారు. తమిళ్‌, మలయాళం, కన్నడ, హిందీ భాషల్లోనూ సుబ్బరాజు సినిమాలు చేశారు. అన్ని భాషల్లో కలిపి వందకు పైగా సినిమాల్లో నటించారు. ఆర్య, అమ్మానాన్న ఓ తమిళ అమ్మాయి, పోకిరి, ఖలేజా, బిజినెస్‌ మ్యాన్‌, బాహుబలి 2, దూకుడు, గీతా గోవిందం, ఎఫ్ 2, సర్కారు వారి పాట లాంటి హిట్ సినిమాల్లో సుబ్బరాజు నటించారు.