VB-G RAM G : ఎట్టకేలకు 20 ఏళ్ల కష్టానికి ఫలితం.. ఉపాధి హామీ ఉద్యోగులకు శుభవార్త చెప్పిన ప్రభుత్వం..

తెలంగాణ ప్రభుత్వం ఉపాధి హామీ (వీబీ-జీరాంజీ) పథకంలో పనిచేస్తున్న దాదాపు 3,800 మంది ఫిక్స్డ్ టెన్యూర్ (ఎఫ్‌టీఈ) ఉద్యోగులకు తీపి కబురు అందించింది. దసరా పండుగ కానుకగా వీరికి గ్రాట్యుటీ సౌకర్యాన్ని కల్పిస్తూ పంచాయతీరాజ్, గ్రామీణాభివృద్ధి శాఖ జీవో నంబర్ 548 ద్వారా అధికారిక ఉత్తర్వులు జారీ చేసింది. మంత్రి సీతక్క ప్రత్యేక చొరవతో ఉద్యోగులు దాదాపు 20 ఏళ్లుగా చేస్తున్న సుదీర్ఘ పోరాటానికి ఎట్టకేలకు ఉపశమనం లభించింది.

ఈ నిర్ణయం వల్ల ఉద్యోగులకు పదవీ విరమణ సమయంలో సర్వీసు ప్రాతిపదికన రూ. 4 లక్షల నుంచి గరిష్టంగా రూ. 10 లక్షల వరకు ఆర్థిక ప్రయోజనం చేకూరనుంది. పదేళ్లకు పైగా పనిచేసిన వారికి రూ. 10 లక్షల వరకు గ్రాట్యుటీ మంజూరవుతుంది. ఈ పథకం అమలు కోసం నెలకు అవసరమయ్యే రూ. కోటి నిధులను ఉపాధి పథకం నుంచే చెల్లించాలని ప్రభుత్వం ఆదేశించింది. ఎంతో కాలంగా పెండింగ్‌లో ఉన్న ఈ డిమాండ్‌ను పరిష్కరించడంపై ఉద్యోగ సంఘాలు సంతోషం వ్యక్తం చేశాయి.

దీంతోపాటు రాష్ట్రంలో ఉపాధి హామీ పనుల పర్యవేక్షణను మరింత వేగవంతం చేసేందుకు ప్రభుత్వం సాంకేతిక సహాయాన్ని పెంపొందించాలని నిశ్చయించింది. ప్రస్తుతం ఎల్-నినో ప్రభావం వల్ల రోజూ లక్షలాది మంది కూలీలు పనులకు వస్తుండటంతో, వారి సంఖ్యను మరింత పెంచాలనే లక్ష్యంతో ఉద్యోగులకు ఆధునిక సాధనాలు అందించాలని నిర్ణయించారు.

ఇందులో భాగంగా రాష్ట్రవ్యాప్తంగా పనిచేస్తున్న 7,612 మంది ఫీల్డ్ అసిస్టెంట్లకు స్మార్ట్‌ఫోన్లు, అలాగే 2,172 మంది టెక్నికల్ అసిస్టెంట్లకు ట్యాబ్‌లను పంపిణీ చేయనున్నారు. ఈ మేరకు గ్రామీణాభివృద్ధి శాఖ కమిషనర్ దివ్యాదేవరాజన్ సంబంధిత పత్రాలపై సంతకం చేశారు. ప్రభుత్వ ఈ రెండు నిర్ణయాలు ఉద్యోగుల ఆర్థిక భద్రతను పెంచడంతో పాటు ఉపాధి హామీ పథకం అమలులో పనితీరును మరింత మెరుగుపరచడానికి దోహదపడతాయి.