Cheyutha Pensions: తెలంగాణలోని నిరుపేద కుటుంబాలకు కాంగ్రెస్ ప్రభుత్వం పండుగ వేళ తీపి కబురు అందించింది. ప్రజా ప్రభుత్వ సంక్షేమ పథకాల్లో భాగంగా రాష్ట్రవ్యాప్తంగా మరో 4.5 లక్షల మంది అర్హులకు ‘చేయూత’ పింఛన్లను మంజూరు చేస్తున్నట్లు పంచాయతీ రాజ్, గ్రామీణాభివృద్ధి శాఖ మంత్రి సీతక్క ప్రకటించారు. నవంబర్ 8న వికారాబాద్ జిల్లా కోడంగల్ నియోజకవర్గ కేంద్రంలో ముఖ్యమంత్రి ఎనుముల రేవంత్ రెడ్డి స్వయంగా హాజరై, మంత్రి సీతక్కతో కలిసి లబ్ధిదారులకు నూతన పింఛన్ మంజూరు పత్రాలను అందజేసి ఈ బృహత్తర కార్యక్రమానికి శ్రీకారం చుట్టనున్నారు.
సామాజిక భద్రతే ప్రధాన ధ్యేయంగా చేపట్టిన ఈ పంపిణీలో వితంతువులు, ఒంటరి మహిళలు, దివ్యాంగులు, నేత, గీత కార్మికులతో పాటు మరికొందరు నూతన లబ్ధిదారులకు పెద్దపీట వేశారు. కోడంగల్‌లో ముఖ్యమంత్రి చేతుల మీదుగా ప్రారంభమైన వెంటనే, రాష్ట్రవ్యాప్తంగా అన్ని జిల్లాల్లోనూ స్థానిక మంత్రులు, ఎమ్మెల్యేలు, ప్రజాప్రతినిధులు, ఉన్నతాధికారుల ఆధ్వర్యంలో పంపిణీ మహోత్సవాలు జరగనున్నాయి. నూతనంగా ఎంపికైన లబ్ధిదారులకు ఈ నవంబర్ నెల నుంచే నేరుగా వారి బ్యాంక్ ఖాతాల్లో పింఛన్ సొమ్ము జమ చేయనున్నట్లు ప్రభుత్వం స్పష్టం చేసింది. దీపావళి వేళ లక్షలాది కుటుంబాల్లో వెలుగులు నింపుతూ ఆర్థిక భరోసా కల్పించడం పట్ల ప్రజలు సంతోషం వ్యక్తం చేస్తుండగా, అర్హులైన ప్రతి ఒక్కరికీ విడతల వారీగా పింఛన్లు అందజేస్తామని మంత్రి సీతక్క ఉద్ఘాటించారు.