TC Rajan Dead: పలమనేరు మాజీ ఎమ్మెల్యే రాజన్ కన్నుమూత.. నిరాడంబర జీవనానికి నిలువెత్తు నిదర్శనం!

Former Palamaner MLA TC Rajan Ded at 106: చిత్తూరు జిల్లాలోని పలమనేరు మాజీ ఎమ్మెల్యే ఠాణేదార్ చిన్న (టి.సి.) రాజన్ కన్నుమూశారు. 106 ఏళ్ల వయసులో ఆయన తుదిశ్వాస విడిచారు. కొంతకాలంగా అనారోగ్యంతో బాధపడుతున్న ఆయన.. బెంగుళూరులోని ఓ ప్రైవేట్ ఆసుపత్రిలో చికిత్స పొందుతూ మృతి చెందారు. ఆయన మరణ వార్తతో పలమనేరులో విషాదం నెలకొంది. రాజకీయ ప్రముఖులు రాజన్ మృతి పట్ల సంతాపం వ్యక్తం చేస్తున్నారు.

టి.సి. రాజన్ 1967లో స్వతంత్ర పార్టీ తరపున పలమనేరు నియోజకవర్గం నుంచి ఎమ్మెల్యేగా విజయం సాధించారు. రాజకీయాల్లో ఆయన తన సుదీర్ఘ సేవలతో ప్రత్యేక గుర్తింపు పొందారు. ముఖ్యంగా స్వాతంత్ర్య సమరయోధుడిగా ఆయన చేసిన సేవలు మరువలేనివి. దేశ స్వాతంత్ర్యం కోసం పోరాడిన రాజన్.. తన జీవితాంతం దేశ సేవకే అంకితమయ్యారు. గాంధీజీ, నేతాజీ సిద్ధాంతాలను అనుసరించిన రాజన్.. తన జీవితంలో ఎప్పుడూ విలువలకు ప్రాధాన్యం ఇచ్చారు.

Also Read: Rashmika Mandanna: నాకు యాక్టింగ్ రాదన్నారు.. గద్దర్ సినీ పురస్కారాల్లో రష్మిక ఎమోషన్!

రాజకీయాల్లో ఉన్నప్పటికీ మాజీ ఎమ్మెల్యే రాజన్ ఎలాంటి ఆస్తులు కూడబెట్టలేదు. సొంత ఇల్లు కూడా లేకుండా ఎంతో నిరాడంబరంగా జీవించారు. ప్రభుత్వ పింఛన్‌తోనే ఆయన తన జీవనాన్ని కొనసాగించారు. 2025లో తన 108వ జన్మదినాన్ని జరుపుకున్న రాజన్.. చివరి వరకు సరళ జీవనాన్ని పాటించారు. ప్రజాసేవలో ఆయన చూపిన నిబద్ధత, నిజాయితీ నేటి తరానికి ఆదర్శంగా నిలుస్తాయి. రాజన్ మృతితో ఒక గొప్ప నాయకుడిని, నిజాయితీ గల ప్రజా సేవకుడిని రాష్ట్రం కోల్పోయింది.