వైభవ్ నుండి సూర్యకుమార్ వరకు.. స్టార్ క్రికెటర్ల సందడి..! SMAT 2026లో 34 జట్ల వివరాలు ఇవే..

Syed Mushtaq Ali Trophy 2026: భారత దేశవాళీ క్రికెట్‌లో ఎంతో ప్రాచుర్యం పొందిన టీ20 టోర్నమెంట్ సయ్యద్ ముస్తాక్ అలీ ట్రోఫీ (SMAT) 2026కు రంగం సిద్ధమైంది. ఈ టోర్నీ నవంబర్ 14 నుంచి ప్రారంభం కానుంది. డిసెంబర్ 6న ఫైనల్ మ్యాచ్ జరగనుంది. ఈ మేరకు భారత క్రికెట్ నియంత్రణ మండలి (BCCI) టోర్నీ షెడ్యూల్‌ను ప్రకటించడంతో పాటు జట్ల సన్నాహాలు కూడా వేగవంతమయ్యాయి. ఈసారి టోర్నీలో మొత్తం 38 జట్లు పాల్గొననున్నాయి. వీటిని ఎలైట్, ప్లేట్ గ్రూపులుగా విభజించి పోటీలు నిర్వహించనున్నారు.

తాజా సమాచారం ప్రకారం ఇప్పటివరకు 34 జట్లు తమ స్క్వాడ్లను ప్రకటించాయి. ఆయా జట్ల కెప్టెన్ల వివరాలు కూడా వెల్లడయ్యాయి. ఆంధ్రప్రదేశ్ జట్టుకు రికీ భుయ్ నాయకత్వం వహించనుండగా, అరుణాచల్ ప్రదేశ్‌కు నీలం ఓబీ, అస్సాంకు డెనిష్ దాస్ కెప్టెన్లుగా వ్యవహరించనున్నారు. బరోడా జట్టును క్రునాల్ పాండ్యా, బెంగాల్ జట్టును అభిమన్యు ఈశ్వరన్, బీహార్ జట్టును యువ సంచలనం వైభవ్ సూర్యవంశీ నడిపించనున్నారు. ఇక చండీగఢ్‌కు శివమ్ భాంబ్రీ, ఛత్తీస్‌గఢ్‌కు వికల్ప్ తివారీ, ఢిల్లీకి ఆయుష్ బడోనీ, గోవాకు అభినవ్ తేజరాణా కెప్టెన్లుగా ఉండనున్నారు. హిమాచల్ ప్రదేశ్ జట్టుకు పుఖ్‌రాజ్ మాన్, హైదరాబాద్‌కు చామ మిలింద్, జమ్మూ కాశ్మీర్‌కు శుభమ్ ఖజూరియా నాయకత్వం వహించనున్నారు. జార్ఖండ్ జట్టుకు అనుకూల్ రాయ్, కర్ణాటకకు రవిచంద్రన్ స్మరణ్, కేరళకు సంజూ శాంసన్ కెప్టెన్లుగా వ్యవహరించనున్నారు.

మధ్యప్రదేశ్ జట్టుకు రజత్ పాటిదార్, మహారాష్ట్రకు రుతురాజ్ గైక్వాడ్, ముంబైకి సూర్యకుమార్ యాదవ్ కెప్టెన్లుగా ఎంపికయ్యారు. పంజాబ్ జట్టుకు రమణదీప్ సింగ్, రైల్వేస్‌కు మహమ్మద్ సైఫ్, రాజస్థాన్‌కు దీపక్ చాహర్, సౌరాష్ట్రకు జయదేవ్ ఉనద్కత్ నాయకత్వం వహించనున్నారు. అలాగే మిజోరంకు జెహూ ఆండర్సన్, ఒడిశాకు స్వస్తిక్ సామల్, సిక్కింకు లీ యోంగ్ లెప్చా, తమిళనాడుకు సాయి కిషోర్, త్రిపురకు మణిశంకర్ మురాసింగ్, ఉత్తరప్రదేశ్‌కు కరణ్ శర్మ, ఉత్తరాఖండ్‌కు కునాల్ చందేలా, విదర్భకు అథర్వ తాయడే కెప్టెన్లుగా వ్యవహరించనున్నారు.

ఈసారి సయ్యద్ ముస్తాక్ అలీ ట్రోఫీలో పలువురు స్టార్ క్రికెటర్లు తమ ప్రతిభను చాటుకునేందుకు సిద్ధమయ్యారు. ముంబై జట్టులో సూర్యకుమార్ యాదవ్‌తో పాటు శార్దూల్ ఠాకూర్, శివమ్ దూబే, సర్ఫరాజ్ ఖాన్ వంటి ఆటగాళ్లు ఉన్నారు. కేరళ జట్టులో సంజూ శాంసన్, మహమ్మద్ అజరుద్దీన్, జలజ్ సక్సేనా వంటి క్రికెటర్లు చోటు దక్కించుకున్నారు. బరోడా జట్టులో క్రునాల్ పాండ్యా, జితేశ్ శర్మ, దీపక్ హుడ్డా, రసిఖ్ సలామ్ వంటి ఆటగాళ్లు ఉన్నారు. బెంగాల్ జట్టులో మహమ్మద్ షమీ, ముకేశ్ కుమార్, అభిమన్యు ఈశ్వరన్ బరిలోకి దిగనున్నారు. ఢిల్లీ జట్టులో ఆయుష్ బడోనీతో పాటు ఇషాంత్ శర్మ, హర్షిత్ రాణా, మయాంక్ యాదవ్ ఉన్నారు. కర్ణాటక జట్టులో కరుణ్ నాయర్, మనీష్ పాండే, అభినవ్ మనోహర్ వంటి ఆటగాళ్లు చోటు దక్కించుకున్నారు.

ఇక మహారాష్ట్ర జట్టులో రుతురాజ్ గైక్వాడ్‌తో పాటు పృథ్వీ షా, రాహుల్ త్రిపాఠి, అర్షిన్ కులకర్ణి ఆడనున్నారు. రాజస్థాన్ జట్టులో దీపక్ చాహర్, రాహుల్ చాహర్, మహిపాల్ లోమ్రోర్ ఉండగా.. తమిళనాడు జట్టులో సాయి కిషోర్, నటరాజన్, వరుణ్ చక్రవర్తి వంటి ఆటగాళ్లు ఉన్నారు. ఉత్తరప్రదేశ్ జట్టులో భువనేశ్వర్ కుమార్, యశ్ దయాల్, శివమ్ మావి, సమీర్ రిజ్వీ వంటి క్రికెటర్లు ఉన్నారు. ఈ టోర్నీలో బీహార్ జట్టుకు కెప్టెన్‌గా వ్యవహరించనున్న వైభవ్ సూర్యవంశీపై ప్రత్యేక ఆసక్తి నెలకొంది. ఇప్పటికే తన బ్యాటింగ్‌తో అందరి దృష్టిని ఆకర్షించిన ఈ యువ ఆటగాడు కెప్టెన్‌గా జట్టును ఎలా నడిపిస్తాడన్నది ఆసక్తికరంగా మారింది. మరోవైపు భారత టీ20 జట్టు కెప్టెన్ సూర్యకుమార్ యాదవ్ ముంబై జట్టుకు నాయకత్వం వహించనుండటం కూడా ఈ టోర్నీకి ప్రత్యేక ఆకర్షణగా నిలవనుంది.