Suryakumar Yadav: “ప్రధాని మోడీని కలిశాకే నా లక్ మారింది.. మళ్లీ ఫామ్‌లోకి వచ్చా”.. సూర్యకుమార్ ఆసక్తికర వ్యాఖ్యలు..

Suryakumar Yadav Pm Modi Meeting

Suryakumar Yadav Pm Modi Meeting

Suryakumar Yadav: ప్రధానమంత్రి నరేంద్ర మోడీ (PM Narendra Modi) ని కలిసిన తర్వాత తన లక్ (Luck) మారిపోయిందని, అందుకే మళ్లీ ఫామ్‌లోకి వచ్చి పరుగులు చేయడం మొదలుపెట్టానని టీమిండియా స్టార్ బ్యాటర్ సూర్యకుమార్ యాదవ్ (Suryakumar Yadav) చెప్పాడు. నవంబర్ 6న తన ఫ్యామిలీతో కలిసి ప్రధానిని కలిసిన విషయం తెలిసిందే. ఇక ఈ అంశంపై తాజాగా ఢిల్లీలో ఏర్పాటు చేసిన ఓ సమావేశంలో సూర్య మాట్లాడాడు. మోడీ తమతో ఇంత సమయం గడుపుతారని అస్సలు ఊహించలేదని సూర్య అన్నాడు. కేవలం ఐదు లేదా పది నిమిషాలు దొరకొచ్చేమో అనుకుంటే, ఏకంగా 40-45 నిమిషాల పాటు తమతో మాట్లాడారని తెలిపాడు. ఆ మీటింగ్ తనకు బాగా కలిసి వచ్చిందని, ఆ తర్వాత నుంచే పరుగుల వరద మొదలైందని సరదాగా చెప్పాడు. క్రికెట్ ఆడేటప్పుడు తమకు చాలా ప్రెజర్ ఉంటుంది కదా.. మరి ప్రధానిగా అన్ని బాధ్యతలు మోస్తూ ఒత్తిడిని ఎలా హ్యాండిల్ చేస్తారని అడిగానని, దానికి ఆయన చాలా బాగా సమాధానాలు ఇచ్చారని సూర్య వివరించాడు. ఆ సంభాషణ చాలా సరదాగా, హాయిగా సాగిందని వెల్లడించాడు.

ఇక, సయ్యద్ ముస్తాక్ అలీ ట్రోఫీ (Syed Mushtaq Ali Trophy) 2026-27లో ముంబై (Mumbai)కి కెప్టెన్‌గా వ్యవహరిస్తున్న సూర్య.. ఇప్పుడు తన పాత స్టైల్‌లో చెలరేగిపోతున్నాడు. నవంబర్ 14న హైదరాబాద్ (Hyderabad)పై కేవలం 21 బంతుల్లోనే 60 నాటౌట్ గా నిలిచాడు. ఆ ఇన్నింగ్స్ లో ఆరు ఫోర్లు, ఐదు సిక్సర్లు ఉన్నాయి. ఆ తర్వాత గుజరాత్ (Gujarat) తో జరిగిన మ్యాచ్ లో 29 బంతుల్లోనే 82 పరుగులతో ఊచకోత కోశాడు. గోవా (Goa)తో జరిగిన తదుపరి మ్యాచ్ లోనూ 12 బంతుల్లో మూడు సిక్సర్లతో 25 రన్స్ చేశాడు. ఈ మ్యాచ్ లో ముంబై 18 పరుగుల తేడాతో గెలిచింది. అయితే గత ఐపీఎల్ సీజన్ (IPL Season) సూర్యకు అంతగా కలిసి రాలేదు. 13 ఇన్నింగ్స్ లలో కేవలం 269 పరుగులే చేశాడు. ఆ ప్రదర్శన కూడా భారత టీ20 కెప్టెన్సీ (T20 Captaincy) మారడానికి ఒక కారణమైంది. జూన్‌లో సెలెక్టర్లు శ్రేయాస్ అయ్యర్ (Shreyas Iyer)ని భారత టీ20 కెప్టెన్ గా నియమించారు. కాగా, అంతకుముందు సూర్య సారథ్యంలోనే భారత్ 2026 టీ20 వరల్డ్ కప్ (T20 World Cup) టైటిల్ ని నిలబెట్టుకుని, వరుసగా రెండోసారి కప్ గెలిచిన తొలి జట్టుగా నిలిచింది. ఆ టోర్నీలో సూర్య 9 ఇన్నింగ్స్ లలో 242 పరుగులు చేయగా, అమెరికా (USA) పై ఆడిన 84 పరుగుల మ్యాచ్ విన్నింగ్ ఇన్నింగ్స్ (Match-winning innings) ఎంతో కీలకంగా మారింది.