IND vs USA: యూఎస్‌ఏ బౌలర్లకు చుక్కలు చూపించిన సూర్యా భాయ్.. టార్గెట్‌ ఎంతంటే!

IND vs USA: టీ20 ప్రపంచకప్‌లో భాగంగా అమెరికాతో జరుగుతున్న పోరులో టీమిండియా స్టార్ బ్యాటర్ సూర్యకుమార్ యాదవ్ తన విశ్వరూపాన్ని చూపించాడు. ఒకానొక దశలో స్వల్ప స్కోరుకే పరిమితం అవుతుందనుకున్న భారత్‌ను తన సూపర్ ఇన్నింగ్స్‌తో ఆదుకున్నాడు. మైదానం నలుమూలలా సిక్సర్లు, ఫోర్లతో విరుచుకుపడి నిర్ణీత 20 ఓవర్లలో భారత్ 9 వికెట్ల నష్టానికి 161 పరుగులు చేసేలా ముందు ఉండి నడిపించాడు. యూఎస్‌ఏ విజయం సాధించాలంటే 162 పరుగులు చేయాల్సి ఉంది.

READ ALSO: OFF THE RECORD: మున్సిపల్‌ ప్రచారంలో పేలుతున్న మాటల తూటాలు!

నిరాశపరిచిన టాప్ ఆర్డర్
టాస్ ఓడి బ్యాటింగ్‌కు దిగిన భారత్‌కు ఆరంభంలోనే గట్టి షాక్ తగిలింది. ఓపెనర్ అభిషేక్ శర్మ (0) తొలి బంతికే డకౌట్‌గా వెనుదిరిగి అభిమానులను నిరాశపరిచాడు. ఆ తర్వాత ఇషాన్ కిషన్ (20), తిలక్ వర్మ (25) ఇన్నింగ్స్‌ను చక్కదిద్దే ప్రయత్నం చేసినా.. షాడ్లీ వేసిన ఆరో ఓవర్ మ్యాచ్‌ను మలుపు తిప్పింది. ఆ ఓవర్లో ఇషాన్, తిలక్ వర్మలతో పాటు శివమ్ దూబే (0) కూడా వెనుదిరగడంతో భారత్ 46 పరుగులకే 4 వికెట్లు కోల్పోయి పీకల్లోతు కష్టాల్లో పడింది.

సూర్య ‘స్కై’ లెవల్ బ్యాటింగ్
వికెట్లు పడుతున్నా ఒకవైపు సూర్యకుమార్ యాదవ్ మొండిగా నిలబడ్డాడు. హార్దిక్ పాండ్యా (5), రింకూ సింగ్ (6) స్వల్ప వ్యవధిలోనే అవుట్ కావడంతో భారత్ 77 పరుగులకే 6 వికెట్లు కోల్పోయింది. ఈ దశలో అక్షర్ పటేల్ (14) తో కలిసి సూర్య ఇన్నింగ్స్‌ను నిర్మించాడు. 36 బంతుల్లోనే తన కెరీర్‌లో 25వ హాఫ్ సెంచరీ పూర్తి చేసుకున్న సూర్య.. ఆఖరి ఓవర్లో ఆకాశమే హద్దుగా చెలరేగాడు. చివరి ఓవర్లో 2 ఫోర్లు, 2 సిక్సర్లు బాది స్కోరును 161కు చేర్చాడు. సూర్య 84 (నాటౌట్) పరుగులతో టాప్ స్కోరర్‌గా నిలిచాడు.

యూఎస్‌ఏ బౌలర్లు భారత బ్యాటర్లపై పక్కా హోంవర్క్ చేసినట్లు కనిపించింది. ముఖ్యంగా షాడ్లీ ఒకే ఓవర్లో మూడు వికెట్లు తీసి భారత మిడిల్ ఆర్డర్ నడ్డి విరిచాడు. అయితే సూర్య తన అనుభవంతో అమెరికా వ్యూహాలను చిత్తు చేశాడు. ఆఖరిలో అర్ష్‌దీప్ (4) అవుట్ కాగా, వరుణ్ రనౌట్‌గా వెనుదిరిగాడు.

స్కోరు వివరాలు:
భారత్: 161/9 (20 ఓవర్లు)
యూఎస్‌ఏ లక్ష్యం: 162 పరుగులు.

READ ALSO: India vs USA: చెత్త రికార్డ్‌ను సొంతం చేసుకున్న అభిషేక్..