బంగ్లాదేశ్ జట్టు దిగ్గజ ఆల్ రౌండర్ షకీబ్ అల్ హసన్ టెస్టు క్రికెట్‌కు రిటైర్మెంట్ ప్రకటించాడు. అయితే.. అతని రిటైర్మెంట్ తక్షణమే అమల్లోకి రాలేదు. వెంటనే అమలులోకి వచ్చేలా టీ20 అంతర్జాతీయ క్రికెట్ నుండి రిటైర్మెంట్ ప్రకటించాడు. కాగా.. రేపటి నుంచి కాన్పూర్‌లో జరగనున్న రెండో టెస్టు మ్యాచ్‌లో షకీబ్ అల్ హసన్ ఆడనున్నాడు. ఆ తర్వాత.. మరో టెస్ట్ సిరీస్ లో ఆడనున్నాడు. అనంతరం.. రెడ్ బాల్ క్రికెట్‌కు వీడ్కోలు చెప్పనున్నాడు.
సౌతాఫ్రికాతో స్వదేశంలో జరగనున్న టెస్టు సిరీస్ ఈ ఫార్మాట్‌లో తనకు చివరి సిరీస్ అని షకీబ్ అల్ హసన్ వెల్లడించాడు. ఈ అనుభవజ్ఞుడైన ఆల్ రౌండర్ కాన్పూర్ టెస్ట్ మ్యాచ్‌కు ముందు తక్షణమే టీ20 అంతర్జాతీయ క్రికెట్ నుండి రిటైర్మెంట్ ప్రకటించాడు. భారత్‌తో రెండో టెస్టుకు ముందు కాన్పూర్‌లో షకీబ్ మీడియాతో మాట్లాడాడు. ఈ సందర్భంగా ఆయన తన రిటైర్మెంట్ గురించి తెలియజేశారు. అక్టోబరు మధ్యలో రెండు మ్యాచ్‌ల టెస్ట్ సిరీస్ కోసం దక్షిణాఫ్రికా బంగ్లాదేశ్‌లో పర్యటించాల్సి ఉంది.
Read Also: Killer Wolf: డ్రోన్ కెమెరాకు చిక్కిన 10 మందిని చంపిన కిల్లర్ తోడేలు..
Cricbuzz ప్రకారం.. ఆల్ రౌండర్ షకీబ్ అల్ హసన్ గురువారం బంగ్లాదేశ్ క్రికెట్ బోర్డు (BCB)కి మిర్పూర్‌లో దక్షిణాఫ్రికాతో స్వదేశంలో జరిగే సిరీస్ ముగింపుతో టెస్ట్ క్రికెట్ నుండి రిటైర్ కావాలనే కోరికను వ్యక్తం చేసినట్లు గురువారం ప్రకటించాడు. అయితే, ఆ సిరీస్‌లో ఆడేందుకు వెటరన్ ఆల్‌రౌండర్‌కు సెక్యూరిటీ క్లియరెన్స్ లభిస్తుందా లేదా అనే దానిపై ఆధారపడి ఉంటుంది. ఒకవేళ షకీబ్ ఆ టెస్టులో ఆడలేకపోతే, కాన్పూర్ టెస్టు అతని చివరి టెస్టు కావచ్చు. మరోవైపు.. ఈ టెస్ట్ సిరీస్ తర్వాత బంగ్లాదేశ్ జట్టు భారత్‌తో మూడు మ్యాచ్‌ల టీ20 సిరీస్ ఆడాల్సి ఉంది. ఆ సిరీస్ లో షకీబ్ ఆడలేడు. కాగా.. టీ20 సిరీస్‌కు బంగ్లాదేశ్ జట్టును ఇంకా ప్రకటించలేదు. మరోవైపు.. షకీబ్ అల్ హసన్ ఫిబ్రవరి-మార్చి వరకు వన్డే ఇంటర్నేషనల్ క్రికెట్‌లో ఆడటం చూడవచ్చు. ఎందుకంటే ICC ఛాంపియన్స్ ట్రోఫీ వచ్చే ఏడాది ఆ సమయంలో పాకిస్తాన్‌లో నిర్వహించనున్నారు.
షకీబ్ కెరీర్
షకీబ్ అల్ హసన్ టీ20 అంతర్జాతీయ క్రికెట్‌లో బంగ్లాదేశ్ తరపున 129 మ్యాచ్‌లు ఆడాడు. అతని 126 ఇన్నింగ్స్‌లలో అతను మొత్తం 2551 పరుగులు చేశాడు. 16 సార్లు నాటౌట్‌గా ఉన్నాడు. అతని అత్యుత్తమ స్కోరు 84 పరుగులు. సగటు 23.19. అతను 13 అర్ధ సెంచరీలతో సహా 121.25 స్ట్రైక్ రేట్‌తో పరుగులు చేశాడు. బౌలింగ్‌లో షకీబ్ 149 వికెట్లు తీశాడు. టెస్టు క్రికెట్‌లో షకీబ్ 70 మ్యాచ్‌లలో 242 వికెట్లు పడగొట్టాడు. బ్యాట్స్‌మెన్‌గా అతను టెస్ట్ క్రికెట్‌లో 5 సెంచరీలు, 31 హాఫ్ సెంచరీలతో సహా 4600 పరుగులు చేశాడు. ఒక డబుల్ సెంచరీ కూడా ఉంది.