Brendan Taylor: 40 ఏళ్ల వయసులో బ్రెండన్ టేలర్ సెంచరీ.. 8 ఏళ్ల నిరీక్షణకు తెర.. టెస్టు క్రికెట్‌లో అరుదైన రికార్డు..!

Brendan Taylor: వయసు కేవలం ఒక సంఖ్య మాత్రమేనని జింబాబ్వే స్టార్ బ్యాటర్ బ్రెండన్ టేలర్ నిరూపించాడు. 40 ఏళ్ల వయసులో అద్భుతమైన సెంచరీ సాధించి చరిత్ర సృష్టించాడు. ఆఫ్ఘనిస్థాన్‌తో జరుగుతున్న తొలి టెస్టులో టేలర్ ఈ ఘనత సాధించాడు. దాదాపు ఎనిమిదేళ్ల సుదీర్ఘ నిరీక్షణ తర్వాత అతడి బ్యాట్ నుంచి మరో టెస్టు శతకం సాధించాడు.

షార్జా వేదికగా ఆఫ్ఘనిస్థాన్, జింబాబ్వే మధ్య తొలి టెస్టు మ్యాచ్ జరుగుతోంది. ఈ మ్యాచ్ మొదటి రోజు ఆట ముగిసే సమయానికి జింబాబ్వే 6 వికెట్ల నష్టానికి 326 పరుగులు చేసింది. జట్టు భారీ స్కోరు సాధించడంలో అనుభవజ్ఞుడైన బ్రెండన్ టేలర్ కీలక పాత్ర పోషించాడు. అద్భుతమైన బ్యాటింగ్‌తో సెంచరీ సాధించి జట్టును పటిష్ట స్థితిలో నిలిపాడు. ఇది అతడి టెస్టు కెరీర్‌లో ఏడో సెంచరీ. ఈ సెంచరీతో బ్రెండన్ టేలర్ జింబాబ్వే తరఫున టెస్టు క్రికెట్‌లో శతకం సాధించిన అత్యంత పెద్ద వయస్కుడైన ఆటగాడిగా రికార్డు సృష్టించాడు. 40 ఏళ్ల 272 రోజుల వయసులో ఈ ఘనత అందుకున్నాడు. అంతేకాకుండా 2000 సంవత్సరం తర్వాత టెస్టుల్లో సెంచరీ చేసిన అత్యంత పెద్ద వయస్కుల జాబితాలో రెండో స్థానానికి చేరుకున్నాడు.

2000 సంవత్సరం తర్వాత టెస్టు క్రికెట్‌లో అత్యధిక వయసులో సెంచరీలు చేసిన ఆటగాళ్ల జాబితాలో పాకిస్థాన్ మాజీ కెప్టెన్ మిస్బా ఉల్ హక్ అగ్రస్థానంలో ఉన్నాడు. ఆయన 42 ఏళ్ల 37 రోజుల వయసులో సెంచరీ సాధించాడు. బ్రెండన్ టేలర్ 40 ఏళ్ల 272 రోజుల వయసులో శతకం బాది రెండో స్థానంలో నిలిచాడు. ఈ జాబితాలో వెస్టిండీస్‌కు చెందిన శివనారాయణ్ చందర్‌పాల్, జింబాబ్వే ఆటగాడు క్రెయిగ్ ఎర్విన్, ఇంగ్లండ్ మాజీ ఆటగాడు అలెక్ స్టీవర్ట్ కూడా ఉన్నారు. టెస్టు క్రికెట్ చరిత్రలో అత్యధిక వయసులో సెంచరీ చేసిన ప్రపంచ రికార్డు ఇంగ్లండ్ దిగ్గజ ఆటగాడు జెబీ హాబ్స్ పేరిట ఉంది. 1929లో ఆస్ట్రేలియాతో జరిగిన మ్యాచ్‌లో ఆయన 46 ఏళ్ల 82 రోజుల వయసులో శతకం సాధించాడు. ఇప్పటికీ ఈ అరుదైన రికార్డు పదిలంగానే ఉంది.

2000 తర్వాత టెస్టుల్లో అత్యధిక వయసులో సెంచరీ చేసిన టాప్-5 ఆటగాళ్లు:

* మిస్బా ఉల్ హక్ (పాకిస్థాన్) – 42 ఏళ్ల 37 రోజులు.
* బ్రెండన్ టేలర్ (జింబాబ్వే) – 40 ఏళ్ల 272 రోజులు.
* శివనారాయణ్ చందర్‌పాల్ (వెస్టిండీస్) – 40 ఏళ్ల 31 రోజులు.
* క్రెయిగ్ ఎర్విన్ (జింబాబ్వే) – 39 ఏళ్ల 130 రోజులు.
* అలెక్ స్టీవర్ట్ (ఇంగ్లండ్) – 39 ఏళ్ల 68 రోజులు.