Ramdev on Owaisi: ఉత్తరప్రదేశ్‌లో వచ్చే ఏడాది అసెంబ్లీ ఎన్నికలు జరగున్నా.. అప్పుడే రాజకీయ వాతావరణం వేడెక్కుతోంది. ఏఐఎంఐఎం అధినేత అసదుద్దీన్ ఒవైసీ.. ఉత్తరప్రదేశ్‌లో పోటీ చేయడంపై యోగా గురు రామ్‌దేవ్ ఆసక్తికర వ్యాఖ్యలు చేశారు. ఒవైసీ ఉత్తరప్రదేశ్‌కు మంచివారని, ఆయన పోటీ చేయడం వల్ల కొన్ని వర్గాల ఓట్లు చీలిపోయి ముఖ్యమంత్రి యోగి ఆదిత్యనాథ్‌కు ప్రయోజనం కలగవచ్చని అభిప్రాయపడ్డారు.
సోమవారం సంభాల్ జిల్లాలోని బాబ్రాలాలో నిర్వహించిన ప్రాంతీయ ఆర్య మహా సమ్మేళనానికి రామ్‌దేవ్ హాజరయ్యారు. ఈ సందర్భంగా ఒవైసీ చేసిన వ్యాఖ్యలపై స్పందించారు. ఉత్తరప్రదేశ్‌లో బీజేపీ మళ్లీ అధికారంలోకి రాకుండా ప్రతిపక్షాలతో కలిసి పనిచేయడానికి సిద్ధంగా ఉన్నట్లు ఒవైసీ గతంలో ప్రకటించారు. అలాగే, యోగి ఆదిత్యనాథ్ మూడోసారి ముఖ్యమంత్రి కావడం తమ పార్టీకి ఇష్టం లేదని అక్టోబర్ 25న షామ్లీ జిల్లా కైరానాలో జరిగిన సభలో పేర్కొన్నారు.. అయితే, ఒవైసీ ఉత్తరప్రదేశ్‌కు మంచివారా? అని ప్రశ్నించగా, ఇతర ప్రాంతాల గురించి చెప్పలేమని, అయితే ఉత్తరప్రదేశ్‌లో ఆయన పోటీ చేయడం వల్ల కొన్ని వర్గాల ఓట్లు చీలి యోగి ఆదిత్యనాథ్‌కు లాభం కలగవచ్చని రామ్‌దేవ్ వ్యాఖ్యానించారు. యోగి వరుసగా మూడోసారి ముఖ్యమంత్రి కావాలని కోరుకుంటున్నారా? అని అడిగిన ప్రశ్నకు, దేశాన్ని మంచి వ్యక్తులు పాలించాలని తాను కోరుకుంటున్నట్లు సమాధానమిచ్చారు.
ఖర్గే వ్యాఖ్యలపైనా స్పందన
ప్రధాని నరేంద్ర మోడీపై కాంగ్రెస్ అధ్యక్షుడు మల్లికార్జున్ ఖర్గే చేసిన వ్యాఖ్యలపైనా రామ్‌దేవ్ స్పందించారు. అధికార పార్టీకి చెందినవారైనా, ప్రతిపక్ష నేతలైనా సరే, చౌకబారు వ్యాఖ్యలు చేయకూడదని అన్నారు. రాజకీయ నాయకులు పరస్పరం గౌరవంగా మాట్లాడాలని అభిప్రాయపడ్డారు. మరోవైపు.. సనాతన ధర్మం గురించి మాట్లాడుతూ, కపటత్వం, ఆర్భాటం, మూఢనమ్మకాలు, మతపరమైన వంచనల వల్ల మత ప్రతిష్ఠ దెబ్బతింటోందని ఆవేదన వ్యక్తం చేశారు.. శ్రీరాముడు, శ్రీకృష్ణుడు, హనుమంతుడు, శివుడి వేషధారణలతో కొందరు వ్యక్తులు మత గ్రంథాలు, పుణ్యక్షేత్రాల పేర్లను దుర్వినియోగం చేస్తూ మతాన్ని అపఖ్యాతిపాలు చేస్తున్నారని మండిపడ్డారు..
ఒవైసీ ఏమన్నారంటే?
గత వారం రాంపూర్‌లో జరిగిన బహిరంగ సభలో అసదుద్దీన్ ఒవైసీ.. ఉత్తరప్రదేశ్ ప్రభుత్వంతో పాటు సమాజ్‌వాదీ పార్టీ, అఖిలేష్ యాదవ్‌లపై విమర్శలు చేశారు. రాష్ట్రంలో అఖిలేష్ యాదవ్ ప్రభుత్వం ఏర్పడకపోయినా, ముస్లిం సమాజానికి చెందిన వ్యక్తి ఎమ్మెల్యే, ఎంపీగా ఎదుగుతారని వ్యాఖ్యానించారు. ఏఐఎంఐఎం ప్రతినిధులు చట్టసభల్లోకి ప్రవేశించి అన్యాయాలకు వ్యతిరేకంగా గళం విప్పుతారని పేర్కొన్నారు. అయితే, 2027 ఉత్తరప్రదేశ్ అసెంబ్లీ ఎన్నికలకు ఇంకా సమయం ఉన్నప్పటికీ, ఒవైసీ పోటీ, ఓట్ల చీలిక, బీజేపీకి కలిగే రాజకీయ ప్రయోజనాలపై రామ్‌దేవ్ చేసిన వ్యాఖ్యలు పొలిటికల్‌ సర్కిల్‌ హాట్‌ టాపిక్‌గా మారాయి..