Peddi-Paradise: బాక్సాఫీస్ దగ్గర సస్పెన్స్.. మార్చి రేసు నుండి చరణ్, నాని అవుట్?

టాలీవుడ్ బాక్సాఫీస్ దగ్గర మార్చి నెలలో భారీ పోటీ ఉంటుందని భావించిన ఫ్యాన్స్‌కు ఇప్పుడు నిరాశ తప్పేలా కనిపిస్తోంది. గ్లోబల్ స్టార్ రామ్ చరణ్ నటిస్తున్న ‘పెద్ది’, నాచురల్ స్టార్ నాని క్రేజీ ప్రాజెక్ట్ ‘పారడైజ్’.. ఈ రెండు సినిమాలు మార్చి రిలీజ్ నుండి వెనక్కి తగ్గే అవకాశాలు మెండుగా ఉన్నాయని ఫిలిం నగర్ వర్గాల్లో గట్టిగా వినిపిస్తోంది.

మొదట రామ్ చరణ్ ‘పెద్ది’ విషయానికి వస్తే, బుచ్చిబాబు సానా దర్శకత్వంలో వస్తున్న ఈ స్పోర్ట్స్ డ్రామాపై అంచనాలు భారీగా ఉన్నాయి. మార్చి నెలాఖరున ఈ సినిమాను థియేటర్లోకి తీసుకురావాలని చిత్ర యూనిట్ భావించినా, ఇంకా దాదాపు 30 రోజుల షూటింగ్ పెండింగ్ ఉందట. ఆ తర్వాత పోస్ట్ ప్రొడక్షన్, గ్రాఫిక్స్ పనులకు మరికొంత సమయం పట్టేలా ఉంది. క్వాలిటీ విషయంలో ఎక్కడా కాంప్రమైజ్ అవ్వకూడదని భావిస్తున్న చరణ్, ఈ సినిమాను సమ్మర్ రేసులోకి అంటే ఏప్రిల్ లేదా మే కి వాయిదా వేసే ఆలోచనలో ఉన్నారట.

మరోవైపు, నాని-శ్రీకాంత్ ఓదెల కాంబినేషన్లో వస్తున్న ‘పారడైజ్’ కూడా ఇదే బాటలో నడుస్తున్నట్లు సమాచారం. ఈ సినిమాలో హై-వోల్టేజ్ యాక్షన్ సీక్వెన్స్ కోసం భారీగా విజువల్ ఎఫెక్ట్స్ వాడుతున్నారు. ఆ పనులు పూర్తి కావడానికి అదనపు సమయం కావాలని దర్శకుడు కోరడంతో, మార్చి 26 రిలీజ్ డేట్‌ను మార్చి, మే నెలలో సమ్మర్ స్పెషల్‌గా రిలీజ్ చేయాలని ప్లాన్ చేస్తున్నారట. ఒకవేళ ఈ రెండు పెద్ద సినిమాలు వాయిదా పడితే, సమ్మర్ బాక్సాఫీస్ దగ్గర అసలైన పోరు మొదలవ్వడం ఖాయం. దీనిపై అధికారిక ప్రకటన కోసం మెగా .. నాని ఫ్యాన్స్ ఆసక్తిగా ఎదురుచూస్తున్నారు.