పార్లమెంట్ రెండో విడత బడ్జెట్ సమావేశాలు హాట్ హాట్గా సాగుతున్న తరుణంలో ప్రతిపక్ష నేత, కాంగ్రెస్ అగ్ర నాయకుడు రాహుల్ గాంధీ షాకింగ్ ట్విస్ట్ ఇచ్చారు. అకస్మాత్తుగా హర్యానాలోని సోనిపట్లో ఒక రైతు కుమార్తె పెళ్లిలో ప్రత్యక్షమయ్యారు. దీంతో అందరూ ఆశ్చర్యపోయారు.
మంగళవారం ఉదయం సోనిపట్లోని ఒక రైతు కుమార్తె వివాహానికి రాహుల్ గాంధీ హాజరై ఆశ్చర్యపరిచారు. హఠాత్తుగా రావడంతో పెళ్లి వారంతా ఆనందానికి గురయ్యారు. దీంతో వధువును ఆశీర్వదించి.. పెళ్లి విందును ఆరగించారు.
సోనిపట్ జిల్లాలోని గోహానా ప్రాంతంలోని మదీనా గ్రామం. ఆ గ్రామంలో రైతు సంజయ్ మాలిక్ కుమార్తె వివాహం జరుగుతోంది. అకస్మాత్తుగా రాహుల్ గాంధీ గ్రామంలో ప్రత్యక్షమయ్యారు. దీంతో గ్రామస్తులు ఆనందోత్సవాలతో పొంగిపోయారు. రాహుల్ గాంధీని ఘనంగా స్వాగతించారు. అనంతరం గ్రామస్తులతో ముచ్చటించారు. విందు భోజనం చేసి వధువును ఆశీర్వదించారు. ఇందుకు సంబంధించిన ఫొటోలు, వీడియోలు వైరల్ అవుతున్నాయి.
రైతు సంజయ్ మాలిక్కు మంగళవారం ఉదయం ఒక ఫోన్ కాల్ వచ్చినట్లు సమాచారం. రాహుల్ గాంధీ కుమార్తె వివాహానికి హాజరవుతున్నారని సమాచారం ముందుగా అందించినట్లు తెలుస్తోంది. అన్నట్టుగానే రాహుల్ గాంధీ తన భద్రతా బృందంతో ఉదయం 10:15 గంటల ప్రాంతంలో మదీనా గ్రామానికి చేరుకుని కుటుంబంతో గంటకు పైగా గడిపారు.
గతంలో రైతు సంజయ్ మాలిక్, అతని సోదరుడు బల్జీత్ మాలిక్ రాహుల్ గాంధీని వివాహానికి ఆహ్వానించడానికి ఢిల్లీకి వెళ్లారని కుటుంబ సభ్యులు తెలిపారు. ఆ సమయంలో రాహుల్ గాంధీ హాజరవుతానని హామీ ఇచ్చారని.. హామీని నిలబెట్టుకున్నారని కుటుంబ సభ్యులు తెలిపారు. రోహ్తక్ ఎంపీ దీపేందర్ సింగ్ హుడా ఈ కార్యక్రమానికి హాజరై వధువును ఆశీర్వదించారు.
