General Syed Amar Raza: “పాకిస్థాన్ ఎప్పుడూ యుద్ధాన్ని కోరుకోదు.. మా జోలికొస్తే ఊరుకోం”.. పాక్ జనరల్ అణు హెచ్చరిక..

General Syed Amar Raza: పాకిస్థాన్ మరోసారి అణు హెచ్చరికలతో తెరపైకి వచ్చింది. దేశ భద్రత విషయంలో శత్రువులు ఎలాంటి తప్పుడు అంచనాలకు పోవద్దని, ఒకవేళ పొరపాటున దురాక్రమణకు దిగితే ఊహకందని రీతిలో ప్రతీకారం ఉంటుందని పాకిస్థాన్ నేషనల్ స్ట్రాటజిక్ కమాండ్ కమాండర్ జనరల్ సయ్యద్ ఆమర్ రజా తీవ్రస్థాయిలో హెచ్చరించారు. కాకుల్‌లోని పాకిస్థాన్ మిలటరీ అకాడమీ (పీఎంఏ)లో జరిగిన పాసింగ్ అవుట్ పరేడ్‌ను ఉద్దేశించి ఆయన ప్రసంగించారు. పాకిస్థాన్ ఎప్పుడూ యుద్ధాన్ని కోరుకోదని, అయితే తమ దేశంపై దుష్ట ఉద్దేశాలు పెట్టుకునేవారికి మాత్రం తమ వైఖరి చాలా కఠినంగా ఉంటుందని తేల్చిచెప్పారు. అణు వాతావరణంలో యుద్ధాలకు ఎలాంటి తావులేదని, శత్రువులు చేసే చిన్న పొరపాటు కూడా వాళ్ల ఊహకు అందని స్థాయి ప్రతిఘటనను ఎదుర్కోవాల్సి వస్తుందని జనరల్ రజా హెచ్చరించారు. దేశ సార్వభౌమాత్వాన్ని కాపాడుకోవడానికి, దేశంలోని ప్రతి అంగుళాన్ని రక్షించడానికి తమ సాయుధ బలగాలు ఎప్పుడూ సిద్ధంగా ఉంటాయని స్పష్టం చేశారు.

ఇదే సమయంలో ప్రాంతీయ భద్రత గురించి మాట్లాడుతూ.. సరిహద్దు దాటి జరిగే చొరబాట్లను ఏ పరిస్థితుల్లోనూ సహించేది లేదని జనరల్ రజా స్పష్టం చేశారు. కశ్మీర్ అంశంపై పాకిస్థాన్ తన పాత వైఖరినే మరోసారి గట్టిగా వినిపించారు. ఐక్యరాజ్యసమితి భద్రతా మండలి (యూఎన్‌ఎస్‌సీ) తీర్మానాల ఆధారంగానే పరిష్కారం కావాల్సిన అంతర్జాతీయ వివాదంగా కశ్మీర్ మిగిలిపోయిందని ఆయన పునరుద్ఘాటించారు. మరోవైపు, ప్రాంతీయ ఉద్రిక్తతలను తగ్గించేందుకు పాకిస్థాన్ మధ్యవర్తిత్వ ప్రయత్నాలు చేసిందని, ప్రపంచ దేశాల మధ్య తలెత్తిన ఉద్రిక్తతల వేళ పాకిస్థాన్ సానుకూల పాత్ర పోషించిందని అంతర్జాతీయ సమాజం చూసిందని చెప్పుకొచ్చారు. ఈ సందర్భంగా పాలస్తీనాలో జరుగుతున్న మానవ హక్కుల ఉల్లంఘనలు వెంటనే నిలిచిపోవాలని ఆయన డిమాండ్ చేశారు. చివరగా, ప్రసంగం ముగింపులో కొత్తగా కమిషన్ అయిన అధికారులకు దేశ భద్రత, గౌరవ రక్షణ విషయంలో వారిపై ఉన్న భారీ బాధ్యతను జనరల్ రజా గుర్తుచేశారు. ఆపరేషనల్ రంగాలన్నింటిలోనూ తమ సత్తా చాటుతున్న సాయుధ బలగాలకు నిజాయితీ, ధైర్యం, సాహసమే మూలస్తంభాలన్నారు.