Rules Change From 1st August: ఆగస్టు నుంచి కొత్త రూల్స్.. తెలుసుకోకపోతే భారీ నష్టం తప్పదు..!

ఆగస్టు నుంచి ప్రారంభమయ్యే నెలలో ఆర్థిక, బ్యాంకింగ్ నిబంధనలలో అనేక మార్పులు రానున్నాయి. ఈ నియమాలు వినియోగదారులను.. పెట్టుబడిదారులను ఒకే విధంగా ప్రభావితం చేస్తాయి. ఈ మార్పులు పన్నులు, బ్యాంకింగ్ ఛార్జీలు, పెట్టుబడి ఎంపికలు.. సామాన్య ప్రజలపై ప్రత్యక్ష ప్రభావం చూపనున్నాయి. ఆగస్ట్ 1 నుంచి జరిగే మార్పులేంటో తెలుసుకుందాం.

ITRలో ఆలస్యం..
2023-24 ఆర్థిక సంవత్సరానికి మీ ఆదాయపు పన్ను రిటర్న్ (ITR) ఫైల్ చేయడానికి ఈరోజు (31వ తేదీ) చివరి రోజు. మీరు ఈ అర్ధరాత్రి 12 గంటలలోపు ITR ఫైల్ చేయకపోతే మీరు సమస్యలను ఎదుర్కోవచ్చు. మీరు ITR ఫైల్ చేయడానికి గడువును కోల్పోతే.. ఆగస్టు 1 నుండి కొత్త పన్ను విధానం మీకు డిఫాల్ట్‌గా పరిగణించబడుతుంది. మీరు 2024 డిసెంబర్ 31 వరకు ఆలస్యమైన ITRని ఫైల్ చేసినప్పటికీ.. మీరు పన్ను లెక్కల కోసం పాత పన్ను విధానాన్ని ఎంచుకోలేరు.

ITR రిటర్న్‌ను దాఖలు చేయడానికి పెనాల్టీ..
మీరు ఆదాయపు పన్ను రిటర్న్‌ను దాఖలు చేయడానికి జూలై 31 గడువును కోల్పోతే.. దానిని డిసెంబరు 31 వరకు ఫైల్ చేసే అవకాశం ఉంది. కానీ దాని కోసం మీరు రూ. 5,000 వరకు జరిమానా చెల్లించాల్సి ఉంటుంది. మొత్తం ఆదాయం రూ. 5 లక్షలకు మించని చిన్న పన్ను చెల్లింపుదారులకు కొంత ఉపశమనం లభిస్తుంది.. వారికి గరిష్టంగా రూ. 1,000 జరిమానా ఉంటుంది. ఆదాయం రూ. 5 లక్షలు దాటితే.. పన్ను చెల్లింపుదారులు రూ. 5000 వరకు జరిమానా చెల్లించాల్సి ఉంటుంది.

HDFC బ్యాంక్ నియమాలు..
HDFC బ్యాంక్ క్రెడిట్ కార్డుల విషయంలో పలు మార్పులు ప్రకటించింది. ఇది దాని క్రెడిట్ కార్డ్ హోల్డర్‌లపై ప్రత్యక్ష ప్రభావాన్ని చూపుతుంది. ఇందులో క్రెడిట్, Paytm వంటి థర్డ్-పార్టీ యాప్‌ల ద్వారా చేసే ఛార్జీల చెల్లింపులపై 1 శాతం లావాదేవీ రుసుము, రూ. 15,000 కంటే ఎక్కువ ఫ్యూయల్ లావాదేవీలపై 1 శాతం ఛార్జీ, EMI లావాదేవీలకు రూ. 299 ప్రాసెసింగ్ రుసుము విధించనున్నారు. హెచ్‌డిఎఫ్‌సి బ్యాంక్ అన్ని అంతర్జాతీయ లేదా క్రాస్ కరెన్సీ లావాదేవీలకు 3.5 శాతం మార్కప్ ఛార్జీని కూడా విధిస్తుంది.

ఫాస్టాగ్‌కి సంబంధించిన సమాచారం..
వాహనం కొన్న 90 రోజుల్లో రిజిస్ట్రేషన్, ఛాసిస్ నంబర్లను ఫాస్టాగ్ నంబర్‌తో అప్‌లోడ్ చేయాలి. లేదంటే ఫాస్టాగ్ హిట్‌లిస్టులో ఉంటుంది. ఆ తర్వాత 30 రోజుల గడువులోనూ చేయకపోతే బ్లాక్‌లిస్టులో పెడతారు. 3 నుంచి ఐదేళ్ల క్రితం జారీ చేసిన అన్ని ఫాస్టాగ్స్‌కి KYC పూర్తి చేయాలి. KYC చేస్తున్నప్పుడు వాహనం ముందు, పక్కవైపు ఫొటోలు స్పష్టంగా అప్‌లోడ్ చేయాలి. ఇందుకోసం అక్టోబర్ 31 వరకు సదరు సంస్థలకు NPCI సమయం ఇచ్చింది.

గూగుల్‌ మ్యాప్స్‌ ఫీజు తగ్గింపు..
గూగుల్‌ సంస్థ మ్యాప్స్‌ ఫీజును 70 శాతం మేర తగ్గించింది. అయితే, ఈ తగ్గింపు అనేది డెవలపర్లకు మాత్రమే ప్రయోజనం కలిగించనుంది. సాధారణ పౌరులకు ఈ తగ్గింపుతో ఎలాంటి ప్రయోజనం లేదు. డాలర్‌ స్థానంలో రూపాయిలతో చెల్లించే విధానాన్నీ ఆగస్టు 1వ తేదీ నుంచి గూగుల్‌ మ్యాప్స్‌ అమలు చేయనుంది. దేశీయంగా ఓలా సంస్థ మ్యాప్స్‌ తీసుకొచ్చిన సంగతి తెలిసిందే. ఈ క్రమంలో గూగుల్‌ మ్యాప్స్‌ ఫీజును 70 శాతం మేర తగ్గించడం గమనార్హం.

LPG సిలిండర్ల ధరల్లో మార్పు..
LPG గ్యాస్ సిలిండర్ల ధరలు ప్రతి నెల మొదటి తేదీన నిర్ణయించబడతాయి. ఇది ప్రతి ఒక్కరి ఖర్చులను ప్రభావితం చేస్తుంది. జూలైలో ప్రభుత్వం 19 కిలోల వాణిజ్య సిలిండర్ల ధరలను తగ్గించింది. ఆగస్టులో గ్యాస్ సిలిండర్ల ధరలు మరింత తగ్గే అవకాశం ఉంది.