Inspiring Success Story: అమ్మ బంగారు గాజులు.. కూతురి బంగారు భవిష్యత్తు.. యువతి ఎమోషనల్ పోస్ట్ వైరల్

Inspiring Success Story: పిల్లల కెరీర్‌ కోసం.. తమ ఆశలు, ఆశయాలను త్యాగం చేసి.. పిల్లలు బాగుంటే చాలు.. వాళ్లు జీవితంలో సెటిల్‌ అయితే చాలు అని భావించే పేరెంట్స్ ఎంతో మంది ఉంటారు.. ఇక, కష్టకాలంలో తల్లి చేసిన ఒక త్యాగం.. కూతురి జీవితాన్ని మార్చేసింది. తల్లి తనపై పెట్టుకున్న నమ్మకాన్ని వమ్ము చేయకుండా.. ఉద్యోగం సాధించి.. ఆ తర్వాత చేసిన ఓ పోస్ట్ ఇప్పుడు సోషల్ మీడియాలో వైరల్‌గా మారిపోయింది.. బెంగళూరులో ఫ్లిప్‌కార్ట్‌లో పనిచేస్తున్న అనుస్మితా మహాపాత్ర తన విజయానికి కారణమైన తల్లి త్యాగాన్ని సోషల్ మీడియాలో పంచుకుని అందరి మనసులను కదిలించింది.

కాలేజీ అడ్మిషన్ ఫీజు చెల్లించేందుకు డబ్బులు లేకపోవడంతో తన తల్లి ఎలాంటి సందేహం లేకుండా బంగారు గాజులను తాకట్టు పెట్టిందని అనుస్మితా వెల్లడించింది. తన చదువు ఆగిపోకుండా చూడటమే ఆమె లక్ష్యమని తెలిపింది. అయితే, ఫ్లిప్‌కార్ట్‌లో ఉద్యోగం సంపాదించడం తనకు కేవలం ఒక ఉద్యోగం కాదని, అది తల్లి చేసిన త్యాగానికి దక్కిన ఫలితమని అనుస్మితా పేర్కొంది. ప్రతిరోజూ ఉద్యోగానికి వెళ్లే ప్రతిసారి తల్లి కష్టం గుర్తుకు వస్తుందని, తన విజయం అంతా ఆమెకే అంకితమని భావోద్వేగంగా తెలిపింది.

ఇన్‌స్టాగ్రామ్‌లో ఆమె పంచుకున్న వీడియోలో తల్లితో గడిపిన మధుర క్షణాలతో పాటు తన ఉద్యోగ జీవితానికి సంబంధించిన దృశ్యాలు ఉన్నాయి. ఈ పోస్ట్ సోషల్ మీడియాలో వైరల్‌గా మారగా, తల్లి–కూతుళ్ల అనుబంధాన్ని నెటిజన్లు ప్రశంసిస్తూ భావోద్వేగ వ్యాఖ్యలు చేస్తున్నారు. తల్లిదండ్రుల త్యాగం పిల్లల విజయానికి ఎంతటి ప్రేరణగా నిలుస్తుందో ఈ కథ మరోసారి చాటిచెప్పింది.

 

View this post on Instagram

 

Shared post on Time