Password: మన దేశంలో ఎక్కువ మంది వాడుతున్న పాస్‌వర్డ్ ఏంటో తెలుసా?

Password: ప్రస్తుత టెక్నాలజీ యుగంలో యాప్‌లు ఎక్కువగా వాడాల్సి వస్తోంది. యాప్‌లలో ఉండే మన వ్యక్తిగత డేటాను కాపాడుకోవాలంటే పాస్ వర్డ్ తప్పనిసరిగా పెట్టాల్సిందే. ఎందుకంటే మన ఖాతాల్లోకి మరొకరు సులభంగా ప్రవేశించకుండా అడ్డుకునే మొదటి గేటు పాస్‌వర్డ్. అందుకే పాస్ వర్డ్‌ను బలంగా సెట్ చేసుకోవాలని నిపుణులు సూచిస్తుంటారు. అయితు కొంత మందికి పాస్ వర్డ్ ఎలా పెట్టాలో కూడా అవగాహన ఉండటం లేదు. సులభంగా గుర్తు ఉండేలా కొందరు ఎక్కువ ప్రచారంలో ఉన్న సంస్థలు, పదాలు, పేర్లను పెట్టుకుంటూ ఉంటారు. దీనివల్ల వారి ఖాతాలు దుర్వినియోగం అయ్యే ప్రమాదం లేకపోలేదు. టెక్నాలజీ ఎంత పెరుగుతుందో దాన్ని అందిపుచ్చుకోవడంలో సైబర్ నేరగాళ్లు ఒక అడుగు ముందే ఉంటున్నారు. అందుకే టెక్నాలజీకి టెక్నాలజీతోనే చిల్లు పెడుతున్నారు.

బలహీన పాస్ వర్డులు పెట్టుకుంటే హ్యాకర్లు సులభంగా చేధించగలరు. నార్డ్ పాస్ అనే సంస్థ 2022 సంవత్సరానికి సంబంధించి సాధారణ పాస్ వర్డుల వివరాలను విడుదల చేసింది. ఆశ్చర్యకరంగా 3.5 లక్షల మంది password అనే పదాన్ని పాస్ వర్డ్‌గా ఉపయోగిస్తున్నారు. మరో ఆసక్తికర విషయం ఏంటంటే.. ‘బిగ్ బాస్కెట్’ అనే పదాన్ని 75వేల మంది పాస్ వర్డ్ గా పెట్టుకున్నారు. ఎక్కువ మంది ఉపయోగించే టాప్-10 పాస్ వర్డులలో.. 123456, 12345678, 123456789, pass@123, 1234567890, anmol123, abcd1234, googledummy ఉన్నాయి.

Read Also: Benefits of Anjeer : ప్రతిరోజు అంజీర పండ్లు తినడంవల్ల కలిగే ప్రయోజనాలు

ప్రపంచవ్యాప్తంగా 30 దేశాల్లో నార్డ్ పాస్ సర్వే నిర్వహించింది. గెస్ట్, వీఐపీ, 123456ను ప్రపంచవ్యాప్తంగా ఎక్కువ మంది పాస్ వర్డ్ కింద ఉపయోగిస్తున్నారు. ప్రచారంలో ఉన్న పేర్లను పాస్ వర్డుగా వాడుతున్నారని, వీటివ్లల హ్యాకర్ల పని సులభం అవుతోంది. ఎవరూ ఊహించలేని విధంగా, అక్షరాలు (క్యాపిటల్, స్మాల్), నంబర్లు, ప్రత్యేక క్యారెక్టర్లతో పాస్ వర్డ్ రూపొందించుకోవడం ద్వారా మన ఖాతాలకు రక్షణ కల్పించుకోవాలని నిపుణులు సూచిస్తున్నారు. సింపుల్‌ పాస్‌వర్డ్‌లను సైబర్ నేరగాళ్లు దాదాపు 39 నిమిషాల్లోనే చేధిస్తారని.. బిగ్, స్మాల్, సింబల్స్‌ కలయికతో పెట్టే 18 అక్షరాల స్ట్రాంగ్ పాస్‌వర్డ్‌ను 438 ట్రిలియన్ సంవత్సరాల వరకు కూడా బ్రేక్ చేయలేరని వారు అభిప్రాయపడుతున్నారు.