Jana Nayagan: విజయ్ ‘లియో’, రజనీ ‘కూలీ’ రికార్డులను దాటలేకపోయిన ‘జన నాయగన్’.. డే-1 కలెక్షన్స్ ఎంతంటే?

Jana Nayagan Day 1 Box Office Collection: విజయ్ చివరి చిత్రం ‘జన నాయగన్’ విడుదలపై నెలకొన్న సెన్సార్ వివాదాలు వీడి, ఎట్టకేలకు నిన్న భారీ అంచనాల మధ్య ప్రపంచవ్యాప్తంగా థియేటర్లలోకి వచ్చింది. ఫ్యాన్స్ కోలాహలం, విపరీతమైన హైప్ మధ్య విడుదలైన ఈ సినిమా తొలిరోజు దేశీయ మార్కెట్‌లో రూ.41 కోట్ల నెట్ కలెక్షన్లు సాధించినట్లు ట్రేడ్ ట్రాకర్ ‘సాక్నిల్క్’ (Sacnilk) వెల్లడించింది.

కలెక్షన్ల వివరాలు ఇలా ఉన్నాయి:

దేశవ్యాప్తంగా దాదాపు 13,067 షోల ద్వారా భారత్‌లో రూ.48.27 కోట్ల గ్రాస్ (రూ.41 కోట్లు నెట్) వసూలు చేసింది. ఇక విదేశాల్లో రూ.30 కోట్ల గ్రాస్ కలెక్ట్ చేయడంతో, మొదటి రోజే ప్రపంచవ్యాప్తంగా మొత్తంగా రూ.78.27 కోట్ల గ్రాస్ వసూళ్లను రాబట్టింది. భాషల వారీగా చూస్తే.. మాతృమాతృక తమిళంలో అత్యధికంగా రూ.36.50 కోట్లు రాగా, తెలుగు వెర్షన్ రూ.2.75 కోట్లు, హిందీ వెర్షన్ రూ.1.75 కోట్లు సాధించాయి. అయితే, విజయ్ మునుపటి చిత్రాలైన ‘బీస్ట్’ (రూ.49.30 కోట్లు), ‘గోట్’ (GOAT – రూ.44 కోట్లు) లీగ్ ఓపెనింగ్స్ లెక్కలను ‘జన నాయగన్’ దాటలేకపోయింది. అంతేకాకుండా తమిళ చిత్రసీమలో తొలిరోజు రూ.50 కోట్ల నెట్ మార్కును చేరుకున్న విజయ్ ‘లియో’ (రూ.64.80 కోట్లు), రజనీకాంత్ ‘కూలీ’ (రూ.65 కోట్లు), ‘కూలీ 2.0’ (రూ.60.25 కోట్లు) సరసన ఈ సినిమా నిలవలేకపోయింది.

విడుదలకు ముందు ట్రేడ్ విశ్లేషకుడు రమేష్ బాలా అంచనా వేస్తూ.. భారతదేశంలో రూ.60 కోట్లు, ప్రపంచవ్యాప్తంగా రూ.90 కోట్ల ఓపెనింగ్స్ వస్తాయని, మొదటి వీకెండ్‌కు ఇండియాలో రూ.150–180 కోట్లు, వరల్డ్‌వైడ్‌గా రూ.250 కోట్లు సాధించే అవకాశం ఉందని పేర్కొన్నారు. మరో ప్రముఖ విశ్లేషకుడు తరణ్ ఆదర్శ్ నిర్దిష్ట సంఖ్యలను చెప్పకపోయినా, ఘనమైన ఓపెనింగ్స్ ఉంటాయని భావించారు. హెచ్.వినోత్ దర్శకత్వంలో కెవిఎన్ ప్రొడక్షన్స్ ఆధ్వర్యంలో దాదాపు రూ.500 కోట్ల భారీ బడ్జెట్‌తో నిర్మితమైన ఈ చిత్రం, రాజకీయాల్లోకి వెళ్తున్న విజయ్‌కి నటుడిగా చివరి సినిమా కావడంతో అభిమానుల్లో ప్రత్యేక ప్రాధాన్యత సంతరించుకుంది. పూజా హెగ్డే, బాబీ డియోల్, మమితా బైజు ముఖ్య పాత్రలు పోషించిన ఈ చిత్రానికి అనిరుధ్ రవిచందర్ సంగీతం అందించారు.