Jake Fraser-McGurk Joins Delhi Capitals ahead of IPL 2024: ఇండియన్ ప్రీమియర్ లీగ్ (ఐపీఎల్) 2024 ఆరంభానికి ముందు ఢిల్లీ క్యాపిటల్స్ జట్టుకు మరో షాక్ తగిలింది. ఇంగ్లండ్‌ బ్యాటర్ హ్యారీ బ్రూక్‌ ఇప్పటికే ఐపీఎల్ 17వ సీజన్ నుంచి తప్పుకోగా.. తాజాగా దక్షిణాఫ్రికా పేసర్‌ లుంగి ఎంగిడి కూడా తప్పుకొన్నాడు. గాయం కారణంగా ఈ ఎడిషన్ మొత్తానికి ఎంగిడి దూరం అయ్యాడు. ఎంగిడి స్థానంలో ఆస్ట్రేలియా ఆల్‌రౌండర్‌ జేక్‌ ఫ్రేజర్‌ మెగర్క్‌ను ఢిల్లీ తీసుకుంది. ఈ విషయాన్ని ఇండియన్ ప్రీమియర్ లీగ్ తన ఎక్స్ ఖాతాలో పేర్కొంది.
జేక్‌ ఫ్రేజర్‌ మెగర్క్‌ను రూ. 50 లక్షల ధర (రిజర్వ్ ప్రైస్‌)కు ఢిల్లీ క్యాపిటల్స్ జట్టులోకి తీసుకుంది. ‘ఐపీఎల్ 2024 ఎడిషన్ కోసం లుంగి ఎంగిడి స్థానంలో ఆల్‌రౌండర్‌ జేక్‌ ఫ్రేజర్‌ మెగర్క్‌ను ఢిల్లీ క్యాపిటల్స్ ఎంపిక చేసింది. 14 ఐపీఎల్ మ్యాచ్‌లు ఆడి 25 వికెట్లు తీసిన ఎంగిడి.. గాయం కారణంగా ఐపీఎల్ 2024 నుండి తప్పుకున్నాడు. ఆస్ట్రేలియా తరపున జేక్‌ ఫ్రేజర్‌ మెగర్క్‌ 2 వన్డేలు ఆడాడు. తన రిజర్వ్ ధర రూ.50 లక్షలతో ఢిల్లీలో చేరాడు’ అని ఐపీఎల్ పేర్కొంది.
21 ఏళ్ల జేక్‌ ఫ్రేజర్‌ మెగర్క్‌ బ్యాటర్ మాత్రమే కాదు లెగ్‌ స్పిన్నర్‌ కూడా. వెస్టిండీస్‌తో గత నెలలో జరిగిన వన్డే సిరీస్‌ ద్వారా అతడు అంతర్జాతీయ క్రికెట్‌లో అడుగుపెట్టాడు. ఇప్పటివరకు ఆడిన రెండు మ్యాచ్‌లలో 51 పరుగులు చేశాడు. హ్యారీ బ్రూక్‌పై ఢిల్లీ భారీ ఆశలు పెట్టుకుంది. అయితే అతడు వ్యక్తిగత కారణాలతో టోర్నీకి దూరమయ్యాడు. ఇక ఐపీఎల్ 2024 మార్చి22న ఆరంభం కానుంది. ఢిల్లీ మార్చి 23న తమ తొలి మ్యాచ్‌లో మొహాలీ వేదికగా పంజాబ్‌ కింగ్స్‌తో తలపడనుంది.
