Salman Khan: బాలీవుడ్ నటుడు సల్మాన్ఖాన్ను చంపేస్తానని గ్యాంగ్స్టర్ లారెన్స్ బిష్ణోయ్ బెదిరించిన సంగతి తెలిసిందే. ఆయనకు మరోసారి బెదిరింపులు వచ్చాయి. ఈ సారి మాత్రం బెదిరించింది గ్యాంగ్స్టర్ కాదు.. ఓ విద్యార్థి. యునైటెడ్ కింగ్డమ్లో వైద్య విద్యను అభ్యసిస్తున్న భారతీయ విద్యార్థి బాలీవుడ్ నటుడు సల్మాన్ ఖాన్కు బెదిరింపు ఇమెయిల్ పంపాడనే ఆరోపణలపై ముంబై పోలీసులు లుక్ అవుట్ సర్క్యులర్ (LOC) జారీ చేసినట్లు ఒక అధికారి తెలిపారు. ఈమెయిల్ పంపిన వ్యక్తిగా విద్యార్థిని గుర్తించినందున, అతడిని భారత్కు తీసుకొచ్చేందుకు పోలీసులు ప్రక్రియను ప్రారంభించినట్లు అధికారి మంగళవారం తెలిపారు.విద్యార్థి హర్యానాకు చెందినవాడని విచారణలో తేలింది. అతను మెడికల్ కోర్సు మూడో సంవత్సరం చదువుతున్నాడు.
Read Also: Unethical: తల్లితో సహజీవనం కూతురిపై వ్యామోహం.. పెంపుడు తండ్రిపై కడితో దాడి
బ్రిటన్లో విద్యార్ధి సెషన్ ముగిసే సమయానికి ఈ ఏడాది చివరి నాటికి భారత్కు తిరిగి వచ్చే అవకాశం ఉందని అధికారి తెలిపారు. మార్చిలో జైలులో ఉన్న గ్యాంగ్స్టర్ గోల్డీ బ్రార్ పేరుతో విద్యార్థి సల్మాన్ ఖాన్కు బెదిరింపు సందేశాలు పంపినట్లు పోలీసులు అనుమానిస్తున్నారు. కొన్ని రోజుల క్రితం సల్మాన్ ఖాన్ తన అధికారిక ఐడీలలో ఒకదానిలో గ్యాంగ్స్టర్ లారెన్స్ బిష్ణోయ్ సహాయకుడు గోల్డీ బ్రార్ను కలవాలని, వారి విభేదాలను ఒకసారి పరిష్కరించుకోవాలని లేదా పరిణామాలను ఎదుర్కోవడానికి సిద్ధంగా ఉండాలని పేర్కొన్న ఇ-మెయిల్ను అందుకున్నాడు. సల్మాన్ఖాన్ను చంపేస్తానని బెదిరించిన ముంబై పోలీసులు ఇటీవల ఓ మైనర్ బాలుడిని అదుపులోకి తీసుకున్నారు.