Agnipath Protest: సికింద్రాబాద్ ఎఫెక్ట్.. అన్ని రైల్వేస్టేషన్లకు భారీ భద్రత
అగ్నిపథ్ స్కీంకు సంబంధించిన అంశంపై ఆందోళనకారులు సికింద్రాబాద్ రైల్వేస్టేషన్లో పలు రైళ్లకు, స్టాళ్లకు నిప్పు పెట్టడంతో పరిస్థితులు ఉద్రిక్తంగా మారాయి. ఈ నేపథ్యంలో పోలీసులు ఆందోళనకారులపై కాల్పులు కూడా జరిపారు. ఈ కాల్పుల్లో ఇద్దరి పరిస్థితి విషమంగా ఉన్నట్లు తెలుస్తోంది. అటు సికింద్రాబాద్ రైల్వేస్టేషన్లో ఉద్రిక్త ఘటనల కారణంగా కేంద్రం ఆదేశాల మేరకు అన్ని రైల్వే స్టేషన్ల వద్ద భద్రతను అధికారులు కట్టుదిట్టం చేశారు.
హైదరాబాద్ నాంపల్లి రైల్వే స్టేషన్ వద్ద భారీ భద్రతను పోలీసులు ఏర్పాటు చేశారు. నాంపల్లి రైల్వే స్టేషన్ మెయిన్ గేట్తో పాటు ప్లాట్ఫారాలపై పోలీసులు పహారా కాస్తున్నారు. తెలంగాణలోని నిజామాబాద్ రైల్వేస్టేషన్కు కూడా అగ్నిపథ్ స్కీం సెగ తాకింది. నిజామాబాద్ రైల్వే పోలీసులు కూడా అలర్ట్ కావడంతో రైల్వేస్టేషన్లో భారీ భద్రత ఏర్పాటు చేశారు. రైల్వే, సివిల్ పోలీసుల మోహరింపుతో ప్రయాణికుల్లో టెన్షన్ వాతావరణం నెలకొంది. అటు రైల్వే స్టేషన్ల వద్ద జరుగుతున్న ఆందోళనల నేపథ్యంలో ఏపీలోని విజయవాడ రైల్వే స్టేషన్ వద్ద అధికారులు హై అలర్ట్ ప్రకటించారు. స్టేషన్కు వస్తున్న వారిని పోలీసులు క్షుణ్ణంగా పరిశీలిస్తున్నారు.