Heavy Rains: హైదరాబాద్ను వణికిస్తున్న వాన.. పండ్లమార్కెట్లో కొట్టుకుపోయిన బత్తాయిలు
హైదరాబాద్ నగర శివారు ప్రాంతాల్లో కూడా భారీగా వర్షం కురుస్తోంది. బాటసింగారం పండ్ల మార్కెట్లో వర్షం బీభత్సం సృష్టించింది. మార్కెట్లోని దుకాణాలన్నీ తడిసిముద్దయ్యాయి. మార్కెట్ ప్రాంగణంలో నిల్వ ఉంచిన పండ్లన్నీ తడిసిపోయాయి. భారీ వర్షం వల్ల మార్కెట్లోకి ప్రవాహం దూసుకొచ్చింది. బత్తాయితో పాటు వివిధ రకాల పండ్లు వర్షం నీటిలో కొట్టుకుపోవడంతో వాటిని కాపాడుకునేందుకు వ్యాపారులు, సిబ్బంది తీవ్ర ఇబ్బందులు పడ్డారు. ట్రేలు, నిల్వ చేసిన పండ్లపై టార్పాలిన్లు కప్పి ఉంచారు. బాటసింగారం మార్కెట్లో తాత్కాలికంగా ఏర్పాటు చేసిన టెంట్లు గాలికి ఎగిరిపోగా.. రేకుల షెడ్లు కూడా చాలా వరకు దెబ్బతిన్నాయి. మార్కెటింగ్ శాఖ కనీస మౌలిక సదుపాయాలు కల్పించకపోవడం వల్లే ఈ పరిస్థితి దాపురించిందని వ్యాపారులు, రైతులు ఆగ్రహం వ్యక్తం చేస్తున్నారు. గడ్డిఅన్నారం నుంచి బాటసింగారం హెచ్ఎండీఏ లాజిస్టిక్స్ పార్కులోకి తాత్కాలికంగా తరలించిన తర్వాత మార్కెట్ కార్యకలాపాలు కొనసాగుతున్న సంగతి తెలిసిందే.
మరో వైపు భాగ్యనగరంతో పాటు తెలంగాణలోని పలు జిల్లాల్లో భారీ వర్షం కురుస్తోంది. ఉదయం నుంచి ఎడతెరిపి లేకుండా కురుస్తున్న వర్షం కారణంగా హైదరాబాద్ నగరం తడిసిముద్దవుతోంది. ట్రాఫిక్ జామ్తో పలు ప్రాంతాల్లో ప్రజలు ఇబ్బందులు పడుతున్నారు. ఈ నేపథ్యంలో విపత్తు నిర్వహణ బృందాలు అప్రమత్తమయ్యాయి.రోడ్లన్నీ జలమయం కావడంతో వాహనదారులు ఇబ్బందులకు గురయ్యారు. రోడ్లపై వర్షపు నీరు నిలిచిపోవడంతో పాఠశాలలకు వెళ్లే ఉద్యోగులు, విద్యార్థులు అవస్థలు పడ్డారు. మూసాపేట మెట్రో స్టేషన్ కిందికి భారీగా చేరిన వరద నీరు చేరడంతో వాహనదారులు ఇబ్బందులు పడుతున్నారు. మోకాళ్ల లోతు వరకు వరద నీరు చేయడంతో రాకపోకలకు అంతరాయం. తెలంగాణలోని పలు ప్రాంతాల్లో షియర్ జోన్ ప్రభావంతో వర్షాలు కురుస్తున్నట్లు హైదరాబాద్ వాతావరణ కేంద్రం తెలిపింది.
Hyderabad Rains: నగరంలోని పలు ప్రాంతాల్లో భారీ వర్షం.. రోడ్లు జలమయం
ఇవాళ, రేపు హైదరాబాద్ సహా ఉత్తర, దక్షిణ తెలంగాణ జిల్లాల్లో భారీ వర్షాలు కురిసే అవకాశముందని ప్రకటించింది. ఈ నేపథ్యంలో ట్రాఫిక్ పోలీసులు నగర ప్రజలకు కీలక సూచన చేశారు. ఆగి ఆగి కొడుతున్న వర్షం కారణంగా ప్రజలు ఇబ్బంది పడుతున్నారు. అలాగే వర్షం ఆగగానే ఆగమాగం బయటకు రావద్దని ట్రాఫిక్ పోలీసులు ప్రజలకు సూచించారు. కొద్ది సమయం తర్వాతే బయటకు రావాలని.. అప్పుడే ట్రాఫిక్ సమస్యల నుంచి బయటపడొచ్చని తెలిపారు. భారీ వర్షాలతో రోడ్లపైకి భారీగా వరదనీరు చేరే అవకాశం ఉంది. దీంతో ట్రాఫిక్లో ఇరుక్కపోవచ్చు. కావున కాస్త చూసుకుని బయటకు రావాలని ప్రజలకు సూచిస్తున్నారు. ఈ నేపథ్యంలో నగర ప్రజలు అప్రమత్తంగా ఉండాలని జీహెచ్ఎంసీ ప్రజలను కోరుతోంది.
Hyderabad High Alert: హైదరాబాద్ కు కుంభవృష్టి.. హై అలర్ట్
గ్రేటర్ హైదరాబాద్ పరిధిలో 6గంటల వరకు నమోదైన వర్షపాతం వివరాలు ఇలా ఉన్నాయి. హఫీజ్ పేట 9.3సెం.మీ, బాలానగర్ 9.2సెం.మీ, గాజుల రామారం 9, బాలాజీ నగర్ 8.7, రాజేంద్ర నగర్ 8.5, హైదర్ నగర్ 8.1, మాదాపూర్ 7, మౌలాలి 6.8, నేరేడ్మెట్ 6.7, మైలార్దేవ్ పల్లి 6.7, కూకట్ పల్లిలో 6.7సెంటిమీటర్ల వర్షపాతం నమోదైంది.