CJP Protest: జంతర్ మంతర్ వద్ద ‘కాక్రోచ్ జనతా పార్టీ’ (CJP) చేపట్టిన నిరసన ప్రదేశంలో ఇంకా కంటికి కనిపించని కన్నీటి వాయువు ఆనవాళ్లు, కొత్తగా కురిసిన వర్షపు సువాసనతో మిళితమై ఉన్నాయి. సోమవారం నాటి ‘ఛలో సంసద్’ మార్చ్ ముగిసిన కొన్ని గంటల తర్వాత కూడా అక్కడ యుద్ధ వాతావరణాన్ని తలపించే దృశ్యాలే కనిపించాయి. అయితే, ఈసారి జంతర్ మంతర్ వద్ద చోటుచేసుకున్న నిరసనలో ఒక సరికొత్త మార్పు స్పష్టంగా కనిపించింది. ఇది కేవలం క్రమం తప్పకుండా పాల్గొనే ఎన్ఎస్ యుఐ (NSUI), ఐఎస్ఎఫ్ (AISF), ఐసా (AISA) వంటి విద్యార్థి సంఘాల ఆందోళన మాత్రమే కాదు. పరిస్థితి ఎంత దారుణంగా తయారైందంటే, చివరకు ఉన్నత వర్గాలు, ధనికులు కూడా వీధుల్లోకి రాక తప్పలేదనేలా వాతావరణం మారింది.
సాధారణంగా ఏసీ గదులకే పరిమితమయ్యే యువత, ఈసారి ప్రత్యక్ష పోరాటానికి సిద్ధపడ్డారు. రూ. 300 నుంచి రూ. 500 వరకు చెల్లించి ఆటోలు, క్యాబ్లలో రావడం, చేతుల్లో లేటెస్ట్ ఐఫోన్లు (iPhones) పట్టుకుని లోపలి దృశ్యాలను సోషల్ మీడియాలో నిరంతరం డాక్యుమెంట్ చేయడం కనిపించింది. విదేశీ విశ్వవిద్యాలయాల్లో చదివేందుకు సిద్ధమవుతున్న పాఠశాల విద్యార్థులు, లక్షల రూపాయల ఫీజులు చెల్లించే ధనిక కుటుంబాల పిల్లలు కూడా భవిష్యత్తు కోసం పోరాడుతున్న సామాన్య విద్యార్థులకు మద్దతుగా నిలిచారు. 2012 డిసెంబర్ 16 నిర్భయ ఘటన తర్వాత ఢిల్లీలో ఎగువ మధ్యతరగతి, ధనిక వర్గాలు ఈ స్థాయిలో వీధుల్లోకి రావడం ఇదే మొదటిసారి.
ఈ నిరసనలో ధనిక, పేద వ్యత్యాసాలు కొట్టొచ్చినట్లు కనిపించినా, లక్ష్యం మాత్రం ఒక్కటే. ఒకవైపు గమ్చాలో చుట్టిన పల్లీలు, ఊరగాయ డబ్బాలు తెచ్చుకున్న ఢిల్లీ యూనివర్సిటీ సాధారణ విద్యార్థులు.. మరొకవైపు ఖరీదైన మోకోబారా (Mokobara) బ్యాగులతో వచ్చిన యువత జోరున కురుస్తున్న వర్షంలో కలిసికట్టుగా నిలబడ్డారు. పాఠ్యాంశాల్లో హక్కుల గురించి చదవడం వేరని, ప్రజల గొంతును తొక్కేసే విధానాలు వచ్చినప్పుడు మౌనంగా ఉండటం సరికాదని 18 ఏళ్ల అర్జున్ శర్మ అనే విద్యార్థి పేర్కొనగా, తమకు రక్షణ, మాట్లాడే వెసులుబాటు ఉన్నప్పుడు తామే ముందుకు రాకపోతే ఇంకెవరు వస్తారని ప్రియా మెహ్రా అనే విద్యార్థిని వ్యాఖ్యానించారు.
జర్నలిజం విద్యార్థి రచిత్ కుమార్, మరొక విద్యార్థి హార్దిక్ మాట్లాడుతూ.. దేశంలో మధ్యతరగతి కుటుంబాలకు విద్య, వైద్యమే పెద్ద ఖర్చులని, వ్యవస్థ విఫలమైనప్పుడు భారతీయులుగా ప్రశ్నించే హక్కు అందరికీ ఉందని స్పష్టం చేశారు. లాఠీఛార్జ్, కన్నీటి వాయుగోళాల మధ్య ఈ తరం (Gen Z) నిరసన తెలియజేయడంలో సరికొత్త పాఠాలు నేర్చుకుంటోంది. ధనిక వర్గాల రాక వల్ల వ్యవస్థాగత సమస్యలన్నీ ఒక్కసారిగా తుడిచిపెట్టుకుపోకపోయినా, వీధుల్లో వారి భాగస్వామ్యం ఈ పోరాటానికి ఒక కొత్త రూపాన్ని, బలాన్ని ఇచ్చిందనడంలో సందేహం లేదు.