Bengaluru IT Jobs: బెంగళూరులో ఉద్యోగాలు తెలుగు, తమిళులకేనా? యువతి ఆరోపణలపై సీఎం వార్నింగ్!

Bengaluru IT Jobs: కర్ణాటకలో స్థానిక కన్నడిగులను ఉద్దేశపూర్వకంగా ఉద్యోగాలకు దూరంగా ఉంచినట్లు తెలిస్తే కఠిన చర్యలు తీసుకుంటామని సీఎం డీకే శివకుమార్ వార్నింగ్ ఇచ్చారు. బెంగళూర్ ఐటీ కంపెనీలు కన్నడ మాతృభాషగా ఉన్న వ్యక్తులకు ఉద్యోగాలు ఇవ్వడం లేదని ఓ యువతి చేసిన వీడియో సోషల్ మీడియాలో వైరల్‌గా మారడంతో సీఎం స్పందించారు. ఎక్స్‌లో స్పందించిన సీఎం.. “ఏదైనా ప్రైవేట్ సంస్థ ఉద్దేశపూర్వకంగా కన్నడిగులను పక్కనపెట్టినట్లు తేలితే ప్రభుత్వం తగిన చర్యలు తీసుకుంటుంది” అని అన్నారు. కర్ణాటకలో కన్నడిగులు హక్కులు, గౌరవం, ఉద్యోగావకాశాలు ఏ కారణంతో నిర్లక్ష్యం చేయడాన్ని ప్రభుత్వం అనుమతించదని అన్నారు. బెంగళూరు ప్రపంచవ్యాప్తంగా గుర్తింపు పొందిన భారత సాంకేతిక రాజధాని అని డీకే శివకుమార్ పేర్కొన్నారు. కన్నడిగుల నైపుణ్యాలు, ప్రతిభపై తమకు గర్వం ఉందని, వారి ప్రయోజనాలకు ప్రభుత్వం అండగా ఉంటుందని తెలిపారు.

బెంగళూర్‌లోని ఐటీ కంపెనీ రిక్రూట్మెంట్ ప్రక్రియలో భాష ఆధారంగా వివక్ష చూపుతున్నారని ఓ యువతి వీడియోలో ఆరోపించింది. కన్నడ మాతృభాషగా ఉన్న అభ్యర్థులను ఇంటర్వ్యూ దశలో లేదా అంతకుముందే షార్ట్ లిస్టింగ్ సమయంలోనే తొలగిస్తున్నట్లు ఆమె చెప్పింది. తెలుగు, తమిళం మాట్లాడే వారికి ప్రాధాన్యత ఇస్తున్నారని, తమిళనాడు, ఆంధ్రప్రదేశ్, తెలంగాణ నుంచి వచ్చే యువతను తక్కువ వేతనాలకు నియమించుకుంటున్నారని కూడా ఆమె ఆరోపించింది. బెంగళూర్ కాలేజీల్లో క్యాంపస్ ఇంటర్వ్యూలు నిర్వహించడం లేదని, సమస్య పరిష్కరించాలని సీఎంను కోరారు.

యువతి ఆరోపణలు ఇప్పుడు రాజకీయంగా ప్రాధాన్యత సంతరించుకున్నాయి. బీజేపీ అధికార ప్రతినిధి అశోక గౌడ స్పందిస్తూ.. ప్రైవేట్ రంగంలో కన్నడిగులకు మరిన్ని ఉద్యోగాలు కల్పించే విసయంలో కాంగ్రెస్ ఏం చర్యలు తీసుకుందో చెప్పాలని డిమాండ్ చేశారు. ప్రభుత్వ ఉద్యోగాలు మాత్రమే కాదని, ప్రైవేట్ రంగంలో కొత్తగా ఎన్ని ఉద్యోగాలు కల్పించారో సీఎం చెప్పాలని అడిగారు.